Hazırkı "Bakı"da əvvəlki heyətdən cəmi 2-3 nəfər qalıb. Xalidu Sissoko 2004-cü ildən Azərbaycan çempionatında çıxış edir. Komanda bu müddətdə ölkə çempionu və kubokunu qazanıb, çempionatda bürünc medal əldə edib. Seneqallı qpapıçının bu uğurlarda müstəsna payı var. Azərbaycana gələn azsaylı səviyyəli legionerlər arasında onun adını xüsusi vurğulamalıyıq. Kiper üçün lazım olan hər şey onda var: Boy, əla fiziki göstəricilər, düzgün mövqe seçimi və ən nəhayət, cəldlik. Təbii ki, bəzi futbolçular kimi onun da "zəif yeri" var. Amma bu, "Bakı" rəhbərliyini afrikalını saxlamaq fikrindən daşındırmayıb. Qyoko Hacıyevskinin fikirləri isə fərqlidir. Ötən mövsüm yaşanan olaylardan sonra Sissokonu ikinci plana atan baş məşqçisi Marko Şarliyaya güvənir. Mövsümlərarası fasilədə Xorvatiyanın "İnter" klubundan gələn "əlcək sahibi" çempionatın ilk 3 turunda 270 dəqiqə meydanda olub. Qaradərili həmkarının nə vaxtadək ehtiyatda qalacağı isə bilinmir. Düşdüyü qeyri-müəyyənlik, əlbəttə ki, Sissokonu sıxır. Bunu söhbətin gedişində da sezdim.
Srağagün həm də ad günü idi. 30 yaşını qeyd edən Sissokonun şərəfinə futbolçular tort kəsdi. O isə bir kənara çəkilib Fernando Peresin itinə "Koka-Kola" içizdirirdi. Başı balaca "buldok"a qarışan qapıçının xoşhal olduğu gözlərindən oxunurdu.
- Əsas heyətdən kənarda qalmağımın səbəbini özüm də bilmirəm. Bunu baş məşqçiyə də sual verə bilərsiniz.
- Heç bu haqda Hacıyevski ilə söhbətin olmayıb?
- Mən futbolçuyam, o isə məşqçi. Hacıyevskinin işinə müdaxilə edə bilmərəm. Mənim üzərimə düşən hazırlaşmaqdır. Məşqlərdə var gücümlə çalışıram. İndi əla formadayam.
- Şarliyanı özündən güclü sayırsan?
- O da yaxşı qapıçıdır. Mən isə özümü daha güclü sayıram.
- Bəs Hacıyevski niyə ona şans verir, sənə yox? Bəlkə başqa səbəb var?
- Bilmirəm. Dörd ildir ki, burdayam. Komanda üçün nələr etmişəm, bunu hamı bilir. Sissoko zəif qapıçı deyil. Mən "Bakı"da ardıcıl 12 oyun qapıdan top buraxmamışam. Dəfələrlə komandanı məğlubiyyətdən qurtarmışam, qələbə qazandırmışam. "Bakı"ya gələn qapıçılardan heç biri məndən güclü olmayıb. Bu gün kənarda qalmağım mənim özümə də pis təsir edir.
- Şans gözləyirsən?
- Özümə çox inanıram. Qoy, Hacıyevski mənə bircə dəfə şans versin. Çox demirəm, bircə dəfə.
- Ondan sonra nə olacaq?
- Nə olacaq? Bir dəfə qapıda durandan sonra "bir nömrə" adı məndə qalacaq. Ondan sonrakı oyunlara yalnız özüm çıxacam. Mənim necə qapıçı olduğumu Hacıyevski də bilir.
- Bu vəziyyət nə vaxtadək davam edəcək.
- Bilmirəm. Mən gözləyirəm.
- Mövsümün əvvəlində "Bakı"nı tərk edə bilərdin. Səni saxlayan nə oldu?
- Bu kluba artıq öyrəşmişəm. "Bakı"da yaxşı günlərim çox olub. Rəhbərlik məni qiymətləndirir. Prezident Hafiz Məmmədov və qardaşı Zeynal Məmmədov qalmağımı istədilər, mən də razılq verdim. Mən "Bakı"da iz qoymuşam. Hələ 10 il də keçəcək, Sissoko kimisi bura gəlməyəcək.
- Kənardan oyunu izləmək necə hissdir?
- Çox ağır. Şəxsən mənə ağır gəlir. Oynadığım klubların heç birində ehtiyatda qalmamışam. "Sissoko, sənə güvənirəm" deyən bütün məşqçilərin heç birnin üzünü qara eləməmişəm. Düşdüyüm vəziyyətə çox üzülürəm. Çoxlarından eşitmişəm ki, mənə "sən Aəzrbaycanda oynayan ən yaxşı qapıçılardan birisən" deyir. Onlar havadan danışmır. Dörd ildə nəyə qadir olduğumu görüblər. Komanda üçün çəkdiyim zəhmət əksər futbolçulardan daha artıqdır.
- Ötən mövsümün gedişində bəzi klubların səninlə maraqlandığını eşitmişdik. Yaxınlarda necə, dəvət göndərən olub?
- Azərbaycan klublarından təklif gəlməyib. İki xarici ölkədən dəvət almışam. Dubay və İrandan. Sərfəli müqavilə təklif eləsələr də, Azərbaycandan getmədim. "Bakı"nı tanıyıram, ikinci evimdir. Ailəm də, özüm də bura öyrəşmişəm. Mən özümü naxçıvanlı sayıram. Hafiz Məmmədovu özümə qardaş bilirəm.
- Çempionat yeni başlayıb. Bir çox komandalar iddialıdır. Sənin proqnozların nədən ibarətdir?
- Hələ heç nə demək olmaz. Üç tur keçib. Son illər hansı komandanın çempion olması son turda bilinir. Mübarizə sonadək getdiyindən, çempionatın bitməsini gözləməliyik. Verdiyiniz suala ən yaxşı cavabım bu ola bilər. "Bakı"nın məqsədi həmişə yüksək yerlərdən birini tutmaqdır. Bu dəfə necə olacağını zaman göstərəcək.
- Neçə ildir klubdasan. Hazırkı heyət keçən mövsümki komandadan güclüdür?
- Çempionatın gedişində görəcəyik. İlk üç tur komandanın real gücünü bilmək üçün tezdir.