Dünən AFFA-nın inzibati binasında millinin baş məşqçisi Berti Foqtsun mətbuat konfransı keçirilib. Almaniyalı mütəxəssis əvvəlcə İran millisi ilə keçirilən yoldaşlıq görüşü barədə fikirlərini bildirib: "İranda da bizimlə bərabər olsaydınız, çox şad olardım. İran yığması ilə oyun haqda danışmaq fikrim yoxdur. Əsas olan bir neçə futbolçunu yoxlamaq idi ki, bunun da öhdəsindən gəldik.
   Biz İran yığmasına qarşı bir saat yaxşı futbol nümayiş etdirdik. Şanslarımız da var idi. Təəssüf ki, imkanlardan istifadə edə bilmədik. Son 30 dəqiqədə oynamırsansa, sözsüz ki, məğlub olmalısan. Artıq o oyunu unutmuşuq. Bazar ertəsi məşqlərə başlayırıq. Ümid edirəm ki, Premyer Liqanın qarşıdakı turunda heç bir futbolçu zədə almayacaq".
   Sonra Berti Foqts jurnalistlərin suallarını cavablandırdı:
   - Demək olarmı ki, artıq yığma komandanın "skeletini" müəyyənləşdirmisiniz?
   - Xeyr.
   - Bəs Uelslə görüşdə heç-heçə vəd edirsinizmi?
   - Ümid edirəm ki, sizdə Uels haqda tam məlumat var. Bilirsiniz ki, onlar necə futbol oynayırlar. Uels yığmasının üzvlərinin çoxu İngiltərə Premyer Liqasında çıxış edir. Çətin oyun olacaq. Əgər səhvlərə az yol versək və şanslarımızdan maksimum yararlansaq, yaxşı nəticə qazana bilərik. Həm də ümid edirəm ki, gücümüz sonadək mübarizə aparmağa bəs edəcək.
   - Start heyətini müəyyənləşdirmisinizmi?
   - Bəli.
   - Komandanın "skeleti" yoxdursa, start heyətini necə müəyyənləşdirmisiniz?
   - Mən heç vaxt heyəti oyuna 10 gün qalmış açıqlamıram. Kimsə zədə ala bilər, kimsə müəyyən səbəblərdən heyətdən çıxarılar. Ona görə də qarşılaşmaya bir-iki saat qalmış heyəti açıqlayacağam.
   - İranla oyunda müdafiə xətti kifayət qədər səhvlərə yol verdi. Əgər yoldaşlıq görüşündə bu qədər səhvlər olursa, kim zəmanət verir ki, seçmə mərhələnin oyunlarında eyni hal təkrarlanmayacaq?
   - Sual başqa cür verilməli idi. Bu problemər haradan başlayır? Niyə belə səhvlər ortaya çıxır? Çünki beynəlxalq futbollla ayaqlaşa bilmirik. Rəqiblərimiz daha sürətli futbol nümayiş etdirirlər.
   - Lixtenşteynlə görüşdə qələbəyə ümid edə bilərikmi?
   - Bizim ilk oyunumuz Uelsə qarşıdır. Lixtenşteynlə görüş məni hələ ki, maraqlandırmır. Vaxtı çatanda o barədə verilən sualları da cavablandıraram. İndi bilirik ki, rəqibimiz güclü yığmadır. Uels sürətli futbol nümayiş etdirir və başla gözəl oynayan futbolçuları var. Təəssüf ki, bu cəhətdən zəifik. Hava toplarında çox uduzuruq. Sadəcə, oyunçularımda olan istək məni sevindirir. Onlar məşqlərə ciddi yanaşırlar.
   - 10 ildir bu problem qabardılır. Yığmada işləyən məşqçilərin hamısı futbolçularımızın hava mübarizələrində zəif olmalarından şikayətlənirlər. Bütün məşqçilər də bunun üzərində işlədiklərini deyirlər. Bəs niyə biz işin bəhrəsini görmürük?
   - Mən onların yerinə danışa bilmərəm. Əgər məndən əvvəlki məşqçilər 10 il bu problemin öhdəsindən gələ bilməyiblərsə, mən 10 günün içərisində nə edə bilərəm?
   - "Neftçi"yə yeni baş məşqçinin sizin məsləhətinizlə dəvət olunduğu söylənilir. Ad açıqlaya bilərsinizmi?
   - Xeyr, belə bir söhbət yoxdur. Mən heç bir həmyerlimi "Neftçi"yə məsləhət görməmişəm. Qəzetlərin nə yazdığından da xəbərim yoxdur. Çünki mətbuatı izləyə bilmirəm.
   - Vurğuladınız ki, İranla oyunda bir neçə futbolçunu sınamaq imkanınız oldu. Həmin oyunçular kimlər idi və Uelslə start heyətində onları görə biləcəyikmi?
   - Mən mətbuata oyunçu adı çəkmək istəmirəm. Belə söhbətlər futbolçularla öz aramızda olur. Kimin necə oynadığını söyləyə bilmərəm.
   - Artıq futbolumuza yaxşı bələdsiniz. Yığma komandanın baş məşqçisi kimi də kifayət qədər yoxlama oyunu keçirmisiniz. Azarkeşlər və futbol ictimaiyyəti qarşıdakı seçmə mərhələdə nəyə ümid edə bilərlər? AFFA rəhbərliyi sizin qarşınıza hansı məqsədləri qoyub?
   - Mənə elə gəlir ki, məqsədimizi bilirsiniz. Bacardıqca çox xal toplamağa çalışacağıq.
   - İranla oyun göstərdi ki, yığmamız fiziki cəhətdən tam hazırlıqlı deyil. Bəs psixoloji cəhətdən necə? Çünki Uels yığmasının çıxış etdiyi "Millenium" stadionu Avropanın ən böyük arenalarından biridir...
   - Əgər yığma fiziki cəhətdən hazır deyilsə, psixoloji cəhətdən necə hazır ola bilər? Siz özünüz klublarımızın avrokuboklardakı çıxışlarını gördünüz. Onların rəqiblərinin göstərdikləri oyunlara da şahidlik etdiniz. Hələ ki, yenə deyirəm Avropa futbolu ilə ayaqlaşa bilmirik. Gözəl kollektiv formalaşdırmaq və Azərbaycan futbolunu inkişaf etdirmək yolunda addımlar atırıq. İnanırıq ki, bu işin öhdəsindən gələ biləcəyik. Seçmə mərhələdə yığmamızı məğlub etmək güclü rəqiblər üçün heç də asan olmayacaq. Yaxşı oyun nümayiş etdirib azarkeşləri standionlara cəlb etməyə çalışacağıq. Çempionat oyunlarındakı tamaşaçı sayı heç də ürəkaçan hal deyil. Mən burdayam ki, Azərbaycan futboluna kömək edim. AFFA prezidenti, vitse-prezident və baş katiblə birlikdə inkişaf üçün çalışırıq. Görüşləri uduzsaq belə, nümayiş etdirdiyimiz oyunla azarkeşlərin zövqünü oxşamağa çalışacağıq. Onlar stadionu tərk edəndə komandalarından razı qalsınlar.
   - IV turun oyunları Uelslə görüşdən əvvəl heyəti formalaşdırmaqda sizin fikrinizə öz təsirini göstərə bilərmi?
   - Mən artıq kimləri dəvət edəcəyimi müəyyənləşdirmişəm. Ümid edirəm ki, zədələnən olmayacaq.
   - Rəqiblərimizdən Rusiya yığması Hollandiya millisi ilə yoldaşlıq görüşü keçirdi. Oyunu izləmisinizsə, təəssüratlarınızı bilmək maraqlı olardıE
   - Xeyr, izləməmişəm. Çünki həmin gün biz İran yığması ilə qarşılaşırdıq.
   

Yığmanın baş məşqçisi Berti Foqts dünya çempionatının seçmə qrup mərhələsi çərçivəsində sentyabrın 6-da Uels, bundan 4 gün sonra isə Lixtenşteynə qarşı keçiriləcək oyunlara 24 futbolçunu çağırıb. Avqustun 27-də Tehranda İranla keçirilmiş yoldaşlıq görüşü ilə müqayisədə komandanın heyətində dəyişikliklər var. Müxtəlif səbəblərdən son matçda çıxış etməyən Branimir Subaşiç, Saşa Yunisoğlu və Aleksandr Çertoqanov yenidən yığmaya qayıdıblar. Əvvəllər də milliyə çağırılan, lakin heyətdə möhkəmlənə bilməyən Anar Nəzirov da toplanışa dəvət alıb. "Olimpik"li Aqil Nəbiyev isə yığmanın yeganə debütantıdır. Bu dəfə B.Foqts Emin Quliyevə ehtiyac duymayıb. Qapıçılar: Fərhad Vəliyev ("Qarabağ"), Rauf Mehdiyev ("Olimpik"), Kamran Ağayev ("Xəzər-Lənkəran"), Anar Nəzirov (Neftçi); müdafiəçilər: Mahir Şükürov (klubsuz), Rail Məlikov, Rəşad Sadıqov (hər ikisi "Neftçi"), Samir Abbasov, Vladimir Levin (hər ikisi "İnter"), Saşa Yunisoğlu ("Poloniya", Polşa), Nodar Məmmədov (MOİK), Aqil Nəbiyev, Usim Nduka (hər ikisi "Olimpik"); yarımmüdafiəçilər: Elmar Baxşıyev ("Neftçi"), Cavid Hüseynov, Elvin Məmmədov, Mahmud Qurbanov (hamısı "İnter"), Aleksandr Çertoqanov ("Neftçi"), Zeynal Zeynalov (NBC); hücumçular: Leandro Qomeş ("Olimpik"), Branimir Subaşiç ("Srvena Zvezda", Serbiya), Xaqani Məmmədov ("İnter"), Fabio Luis Ramim ("Bakı"), Vaqif Cavadov ("Qarabağ"). Oyunlara hazırlıq məqsədilə sentyabrın 1-dən etibarən təlim-məşq toplanışı keçirəcək millinin məşq cədvəli məlumdur. Saat 17:00-da "Holiday İnn" otelində bir araya gələcək komanda axşam (saat 17:45) ilk məşqinə çıxacaq. Ertəsi gün saat 10:15-da növbəti hazırlıq prosesi keçiriləcək, 16:30-da isə U-17 ilə yoxlama oyununda qüvvəsini sınayacaq. Sentyabrın 3-də iki məşq olacaq (saat 10:15 və 18:15-də). Ayın 4-də son çalışmasını reallaşdıracaq (saat 10:15) yığma həmin gün 14:00-da Uelsə yola düşəcək. Bütün məşqlər və yoxlama oyunu Tofiq İsmayılov adına Suraxanı qəsəbə stadionunda keçiriləcək.

Avqustun 27-də keçirilmiş yoldaşlıq görüşündə xoşagəlməz hadisə baş verib. AFFA-nın baş katibi Elxan Məmmədovun verdiyi məlumata görə, İran polisi "Azadi" stadionunda matçı izləməyə gələn əslən azərbaycanlı İran vətəndaşlarına təzyiq göstərib: "Yığmamıza dəstək verməyə 100-dək yerli azarkeş gəlmişdi. Onlar tribunalarda oturmaq istəyərkən polislərin təzyiqi ilə üzləşdilər. Asayiş keşikçiləri milli komandamıza dəstək verənlərin əyləşdikləri yerin İran komandasının azarkeşləri üçün ayrıldığını bildirdilər. Nəticədə azərbaycanlı azarkeşlər başqa tribunaya keçməli oldular. Ancaq polis onların burada da oturmasına imkan vermədi, azarkeşlərdən ikinci dəfə yerlərini dəyişməsini tələb etdi". E.Məmmədov vurğulayıb ki, yalnız AFFA rəsmilərinin müdaxiləsindən sonra polis tələbindən əl çəkib: "Açığı, ikinci dəfə azarkeşlərə təzyiq göstəriləndə onların ümumiyyətlə, stadiondan çıxarıldığını zənn etdik. Buna görə də stadionun müdiriyyəti və İran Futbol Federasiyasının rəhbərliyinə kəskin etirazımı bildirdim. Təzyiqin aradan qaldırılmayacağı təqdirdə, oyunu tribunada azarkeşlərlə birgə izləyəcəyimi söylədim. Bundan sonra İran Futbol Federasiyasının rəsmiləri tapşırıq verdilər və polis Azərbaycan yığmasının azarkeşlərinə təzyiqi dayandırdı". İrandakı mənbələrdən isə APA-ya bildirilib ki, İran və Azərbaycan milli futbol komandaları arasında avqustun 27-də Tehranda keçirilən yoldaşlıq görüşündə dava düşməsinə Azərbaycan bayrağının qaldırılması və milli şüarların səsləndirilməsi səbəb olub. İran vətəndaşı olan minədək soydaşımız matç boyu "Azərbaycan", "Təbriz", "Bakı" şüarları səsləndiriblər. Matçı izləməyə gəlmiş farslar isə matç boyu dəfələrlə açıq şəkildə polislərdən azərbaycanlılara qarşı tədbir görülməsini tələb ediblər. Matç bitdikdən sonra isə stadionun çıxacağında İran komandasını dəstəkləyən farslar yerli azərbaycanlılara hücum edib, nəticədə kütləvi dava düşüb. Polis isə onların bu hərəkətinin qarşısını almamaqla yanaşı, İran komandasının azarkeşlərinə dəstək verib. Nəticədə bir neçə Azərbaycan bayrağı və şüarlar azarkeşlərin əlindən alınıb. Hadisə ilə bağlı həbs edilən olmayıb.

Vladimir Levin Azərbaycan millisinin heyətində ilk oyununu keçirib. Tehranda İran yığmasına mübarizə aparmış 24 yaşlı müdafiəçi debüt matçında 90 dəqiqə meydanda olub. Levin Azərbaycan yığmasının tarixinə 151-ci futbolçu kimi düşüb. O, cari ildə milli komandada debüt edən 5-ci futbolçuya çevrilib. Belə ki, Fabio Luis Ramim, Ruslan Əmircanov, Elnur Allahverdiyev və Cavid Hüseynov da ölkəmizin əsas komandasının formasını bu il geyiniblər. V. Levin yığmamızın şərəfini qoruyan 19-cu milliləşən legioner olub. Bundan başqa, o, Vladimir Poşexontsev, Aleksey Stukas və Aleksandr Çertoqanovdan sonra milli komandamıza cəlb edilən 4-cü ukraynalıdır.

"Azərbaycan yığması ilə oyunda aparıcı futbolçularımız da iştirak etsəydi, daha yaxşı nəticəyə nail olardıq. Görüş ərzində beş real qol şansından yararlana bilmədik. Hər halda, matçın sonlarında bir qol vuraraq, qələbəni təmin etdik". Bu sözləri İran yığmasının baş məşqçisi Əli Daei Azərbaycanla Tehranda keçirilmiş yoldaşlıq görüşündən sonra deyib. Əslən azərbaycanlı olan 39 yaşlı çalışdırıcı yetirmələrinin xüsusilə ikinci hissədə yaxşı təsir bağışladığını bildirib: "İlk hissədə bəzi nöqsanlarımız var idi. Fasilədən sonra isə çatışmazlıqları aradan qaldıraraq, fəallaşdıq və üstünlüyə yiyələndik". Ə.Daei vurğulayıb ki, Azərbaycan yığması ilə görüş mühüm əhəmiyyət kəsb edib: "Azərbaycanlılarla qarşılaşma sentyabrın 6-da dünya çempionatının seçmə qrup mərhələsi çərçivəsində Səudiyyə Ərəbistanı ilə keçirəcəyimiz oyuna hazırlıq xarakteri daşıyırdı". Həmçinin baş məşqçi İran - Azərbaycan matçının qabaqcadan planlaşdırılmadığını söyləyib: "Mən hazırlıq planını İran Futbol Federasiyasına təqdim etmişəm. Ancaq mənim razılığım olmadan avqustun 20-nə Özbəkistanla görüş təyin olunmuşdu. Bu səbəbdən həmin oyunu ləğv etdik və Azərbaycanla qarşılaşmaya razılaşdım".