Dünya çempionatının seçmə mərhələsinin start oyununda İngiltərə səfərdə Andoranı 2:0 hesabı ilə məğlub etməyi bacardı. İngilislərin çətin qələbəsi Andora yığmasının baş məşqçisi David Rodriqonu sərt çıxışlar etməyə vadar edib. O, həmkarı Fabio Kapellonun işinə mənfi qiymət verməklə, italiyalını tənqid edib:ə"Kapellonun işi elə də görünmürdü. İngiltərə yığması zəif və heyəti o qədər tanınmayan Andoraya güclə qalib gəlib. Əgər İngiltərə yığmasının baş məşqçisi mən olsaydım, Andoranı 2:0 yox, daha böyük hesabla məğlub edərdim. Belə görünür ki, İngiltərə Kapellonun beyni ilə deyil, futbolçuların hesabına nəticə qazanıb. Belə getsə, İngiltərə qarşıdakı oyunda Xorvatiyaya məğlub olacaq". Ötən il ingilisləri Avropa çempionatından məhz xorvatlar məhrum etmişdilər.

İspaniya nəhəngi "Real" heyətinə yeni futbolçu qatmağı planlaşdırır. Madrid klubu "Bavariya"nın hücumçusu Lukas Podolski ilə yaxından maraqlanır. Transfer pəncərəsi bağlansa da, keçidin gələcəkdə baş tutması üçün tərəflər arasında artıq danışıqlar gedir. Robinyo "Mançester Siti"yə keçəndən sonra ispanların hücum xəttində boşluq yaranıb. Baş məşqçi Bernd Şuster bu boşluğu Podolski ilə tez bir zamanda aradan qaldırmaq istəyir. Bütün bunlara baxmayaraq, Münhen klubu onu "Real"a buraxmaq fikrində deyil. Hazırda tərəflər arasında danışıqlar davam edir ki, Podolski hələ "Real"ın təklifinə münasibət bildirməyib.

İngiltərənin güclülərindən olan "Liverpul" heyətinə daha bir futbolçu əlavə edib. MTK ilə yollarını ayıran Kort Podolski karyerasını İngiltərədə davam etdirəcək. Tərəflər arasında razılığa əsasən futbolçu "mersisaydlılar"a icarəyə verilib. Klub rəsmilərinin yaydığı xəbərlərə görə, futbolçunun icarə əsasında müqavilə müddəti bu ilin sonuna qədərdir. Bu isə o deməkdir ki, icarə müddəti başa çatan kimi o, yenidən MTK-ya qayıda bilər. Onun oyunu ingilisləri qane etsə, belədə "Liverpul" rəhbərliyi futbolçunun transfer hüququnu tam almaq məcburiyyətində qalacaq.

"Çelsi"nin heyətində çıxış edən yarımmüdafiəçi Maykl Esyen meydanlardan kənar qalacaq. Qana yığmasının aparıcı üzvü 2010-cı il dünya çempionatının seçmə mərhələ oyununda Liviya ilə matçda zədələnib. Həkimlərin müayinəsindən keçən futbolçunun zədəsinin ciddi olduğu aşkarlanıb. Odur ki, onun ən azı 4 həftə "Çelsi"yə kömək edə bilməyəcəyi məlum olub. Bu isə o deməkdir ki, 25 yaşlı müdafiəçi həm Çempionlar Liqasının startında, həm də Premyerliqanın qarşıdakı bir neçə turunda forma geyinə bilməyəcək: "Zədəm ciddidir. İrəlidə bizi vacib oyunlar gözləyir. Mən bu oyunlarda komandama kömək edə bilməyəcəyəm. Həkimlər mənə istirahət etməyi məsləhət görüblər. Tez bir zamanda sağalıb, yenidən formamı yığmalıyam".

İngiltərənin ortabablarından olan "Uest Hem" heyətinə yeni futbolçu əlavə edib. Belə ki, onlar "River Pleyt" klubunda çıxış edən uruqvaylı Valter Lopes ilə razılığa gəliblər və bu günlərdə tərəflər arasında müqavilə imzalanacağı gözlənilir. Klubun rəsmi internet ünvanının yaydığı xəbərlərə əsasən, Alan Kerbislinin komandası təcrübəli müdafiəçinin qarşılığında heç nə ödəməyəcək. Məsələ burasındadır ki, Valter Lopes azad agent statusuna yiyələndiyinə görə "Uest Hem"ə öz istəyi ilə keçib. Baş məşqçi Alan Kerbisli isə müsahibəsində sözügedən müdafiəçinin oyunundan razı qaldığını və onun komandaya uğur qazandıracağını deyib. "Uest Hem" rəsmiləri ilə yeni müqaviləyə imza atacam. Artıq indidən özümü komandanın bir üzvü kimi hiss edirəm. İngiltərədə çıxış edəcəyim üçün çox xoşbəxtəm. Komandanın mənə olan etimadını doğrultmaq üçün əlimdən gələni edəcəyəm.

"Mançester Yunayted"in şərəfini qoruyan Ueyn Runi bu yaxınlarda verdiyi açıqlamasında ən böyük hədəflərinin yenidən çempion olmaq olduğunu bildirib. Sonuncu İngiltərə və Çempionlar Liqasının qalibi olan Runi "qırmızı şeytanlar"ın hazırkı heyətinin olduqca güclü olduğunu deyib: "Ötən mövsüm uğurlu çıxış etdik. Nəticədə komandamız uğurlu nəticəyə nail oldu. Yenidən qızıl medalları qazanmaq istəyirəm. Bu il də həm İngiltərə çempionatını, həm də Çempionlar Liqasını qazanmağı arzulayıram".