Millinin baş məşqçisi Berti Foqts sensasion açıqlama verib. Almaniyalı mütəxəssis Rusiyanın "Sport" telekanalına müsahibəsində AFFA rəsmilərindən danışıb. Foqts assosiasiyanın əməkdaşlarını xarici futbolu bilməməkdə suçlayıb: "Onlar öz çempionatlarında necə oynamağı bilirlər. Ancaq beynəlxalq futboldan anlayışları yoxdur". 62 yaşlı çalışdırıcı hərdən bədbinliyə qapıldığını da gizlətməyib: "Aradabir öz-özümdən soruşuram: doğrudanmı, Azərbaycanda dünya çempionatının final mərhələsinə vəsiqə qazanacaqlarını düşünürlər? Belə vaxtlarda çemodanımı yığışdırıb, evə qayıtmaq istəyirəm". 62 yaşlı mütəxəssisin AFFA rəhbərliyi ilə 2009-cu il dekabrın 31-dək müqaviləsi var. "Foqtsun Almaniyanın ARD telekanalına verdiyi müsahibədə fikirləri təhrif olunub". Bunu AFFA-nın İnformasiya və İctimaiyyətlə Əlaqələr Departamentinin rəisi Mikayıl Quliyev deyib. Onun sözlərinə görə, Foqts müsahibə zamanı assosiasiya rəhbərliyini tənqid etməyib və tam fərqli fikir bildirib: "Foqts deyib ki, əgər futbol ictimaiyyəti bütün oyunlarda məndən qələbə istəyirsə, bu, qeyri-mümkündür. Belə olacağı halda, mən istefa haqqında düşünərdim. Daha bir məqamı aydınlaşdırmaq üçün qeyd edim ki, həmin müsahibədə Foqts AFFA rəhbərliyindən yox, futbol ictimaiyyətindən danışıb. Ancaq qeyri-müəyyən səbəbdən onun fikirləri əksinə qələmə verilib".
   Berti Foqts Şotlandiya millisinə kömək etmək istəyir. 62 yaşlı almaniyalı mütəxəssis britaniyalılara öz köməyini təklif edib. Vaxtilə çalışdırdığı Şotlandiya yığmasının Makedoniyaya 0:1 hesabı ilə uduzması Azərbaycan millisinin baş məşqçisini də narahat edib. Foqts bildirib ki, sentyabrın 10-da İslandiya ilə görüşəcək şotlandiyalıların baş məşqçisi Corc Barliyə məsləhət verməyə hazırdır: "Cəmi üç həftə əvvəl Reykyavikdə oynadığımızdan bu rəqibə bələdəm. Əlimin altında beynəlxalq səviyyədə oynamaq iqtidarında olan cəmi 12 futbolçu olsa da, İslandiya ilə heç-heçə etməyi bacardıq. Hətta uda da bilərdik. Şotlandiya isə qələbə qazanmalıdır. İslandiya yığması heç də bir müddət əvvəlki komanda deyil. Şotlandiya millisinin düşərgəsində İslandiya üzərində qələbəni arzulayan varsa, mənim kömək etmək istəyimi də nəzərə alsın. Mən məsləhətlərimlə bir müddət əvvəl xoş günlər keçirdiyim ölkəyə xeyir verməyə xoşbəxt olaram".
   

10 sentyabr. Tofiq Bəhramov adına Respublika stadionu. Saat 21:00.
   Hakimlər: Tsvetan Georgiyev, Nikola Dyuqanski, Nikolay Anqelov, Nikolay Yordanov (hamısı Bolqarıstandandır).
   Hakim-inspektor: Milovan Nikoliç (Sloveniya).
   UEFA nümayəndəsi: Karel Vertonqen (Belçika).
   Millimiz sabah doğma divarlar arasında Lixtenşteyn seçməsini qəbul edəcək. Tarixinin 8-ci seçmə mərhələsinə Kardiffdə qoşulmuş yığmamız mundial tarixində 3-cü qələbəsinə yaxındır. Digər yandan, komanda Britaniyada qaçırdığı şansı sabah doğma divarlar arasında yaxalayıb 70-ci rəsmi qarşılaşmasında 25-ci qələbəsini qazanmalıdır. Ümumən indiyədək 143 matçda 24 qələbə qazanmış komandamız 35 heç-heçə edib və 84 dəfə məğlubiyyətlə üzləşib. Topların fərqi də rəqiblərin xeyrinədir - 93:260.
   Rəsmi matçlara gəlincə, hesabda 5 qələbə, 10 heç-heçə və 53 məğlubiyyət var. 27 qol vurulub 103-ü buraxılıb.
   Tarixin daha bir tərs üzü: 87 aydır dünya birinciliklərinin seçmə oyununda qələbə üzünə həsrət qalmış və ya 14 matçda qələbə görməyən komanda 5 dəfə heç-heçə edib və 22 dəfə uduzub. Rəqiblərimizin 61 qoluna futbolçularımız cəmi 8 topla cavab verib. Qələbəyə niyə belə əminik? Doğma divarlar arasında Lixtenşteynə də qalib gəlməsə, daha hansı rəqibi yenə bilər? Əlbəttə, qitənin 5 "cırtdan" ölkəsindən birinin təmsilçiləri elə də zəif deyillər. Xüsusən son onillikdə Fransa və İsveçrənin peşəkar divizionlarında görünməyə başlamış futbolçuları və "banklar ölkəsi"nin yüksək dəstəsinə vəsiqə qazanmış "Vadus" klubu ilə çox böyük irəliləyişə nail olub. Elə son iki seçmə mərhələdəki nəticələri də Azərbaycan seçməsinin çıxışından qat-qat yaxşıdır. Əlbəttə, ehtiyatlanmağa hər bir əsas var. Lakin məgər Avropada elə bir rəqi varmı ki, ona yuxarıdan aşağı baxmaq mümkün olsun?
   Hələ 1998-ci ildə lixtenşteynlilərə Vaqif Sadıqovla verdiymiz qələbə həsrətənin ilk sevincini də unutmamalıyıq. Amma başqa tarixi də xatırlaya bilərik: 1999-cu ilin iyununda komandamızın ən böyük qələbəsi tarixə yazılıb və o qələbə də məhz sabahkı rəqib üzərində qazanılıb.

Dünya çempionatının seçmə mərhələsinə uğursuz başlayan Azərbaycan yığmasını Lixtenşteyn millisi ilə oyun gözləyir. Ölkəmizin bir nömrəli komandasına qələbə hava-su kimi lazımdır və elə həmvətənlərimiz də buna köklənib. Bu səbəbdəndir ki, millimizin qarşılaşmaya iki hücumçu ilə çıxacağı bildirilir. İlk qarşılaşmada məğlubiyyətə baxmayaraq, yığmamızın düşərgəsində əhval-ruhiyyə yüksəkdir. Dünən bunun canlı şahidi olduq. Tofiq Bəhramov adına Respublika stadionunda Berti Foqtsun rəhbərliyi ilə futbolçularımız məşqə çıxdılar. Hazırlıq prosesini izləməyə AFFA-nın baş katibi Elxan Məmmədov da gəlmişdi. Yığmanın üzvləri meydana çıxmazdan əvvəl E.Məmmədov onların hər biri ilə görüşərək durumları ilə maraqlandı. Futbolçuların üzündə özünəinam hiss olunurdu.
   Əvvəlcə millinin əsas çalışdırıcısı Berti Foqtsun yeni köməkçisi Olaf Yansen məşqə start verdi. Toplu çalışmalara üstünlük verən O.Yansen futbolçuların hərəkətlərinə xüsusi diqqət yetirirdi. Məşq prosesində 20 oyunçu iştirak edirdi. Millinin futbolçuları topla sürətli davrandılar, irəli və geriyə tez-tez hərəkət etdilər. Yığmanın heyətində yenilik nəzərə çarpırdı. Uelslə oyun ərəfəsində zədəyə görə millidəndən kənarlaşdırılan Aleksandr Çertoqanov məşqə cəlb olunmuşdusa, Nodar Məmmədov gözə dəymirdi. Bunun səbəbini öyrənmək çətin olmadı. Bildirildi ki, müdafiəçi onun sol ayağı ağrıyır. Lixtenşteynlə oyunda iştirakı sual altında olsa da, son qərar bu gün veriləcək.
   Qarşıdakı oyunu buraxacağına baxmayaraq, braziliyalı Fabio Luis Ramim də məşqə qatılmışdı. Aqil Nəbiyev isə komandadan bir az aralıda hazırlaşırdı. Lakin onun problemi olduğundan sağ ayağının üzərinə buz qoyduğunun şahidi olduq. Bunun ardından Aqil yüngülvari məşq etməyə, qaçmağa başladı.
   Qapıçılardan Kamran Ağayev, Fərhad Vəliyev və Rauf Mehdiyevə xüsusi məşq keçilirdi. Hətta "jim" də etdilər. B.Foqts məşqdə lazımı səviyyədə can yandırırdı. Qapılara hücumların təşkil olunması və dəqiq zərbələrin vurulması üçün məsləhətlərini verirdi. Hətta alman mütəxəssis məşqdə özü də yaxından iştirak edirdi. Sol cinahdan sürətlə irəliləyən Elvin Məmmədova dünya çempionu, keçmiş müdafiəçi Berti Foqts mane olmağa çalışsa da, futbolçumuz onu aldadaraq cərimə meydançasına dəqiq ötürmə verdi. Subaşiç isə Elvinin əziyyətini yerə vurmayaraq, topu tora qovuşdurdu. Ötürmələr zamanı qeyri-dəqiqlik olarkən Foqts hərdən əsəblərini cilovlaya bilmirdi. Alman məşqçi buna görə təcrübəli futbolçu Mahmud Qurbanova iradını bildirməyi də vacib bildi. Bundan sonra "professor" elə də səhvlərə yol vermədi. Baş məşqçi "Qarabağ"lı Vaqif Cavadov, "Olimpik"in üzvü Leandro Qomeşin hərəkətlərindən də narahat idi. V.Cavadov əvvəlcə dəfələrlə qapını dəqiq nişan ala bilməsə də, sonradan tənqidlərdən nəticə çıxardı. Millinin üzvləri uzaq məsafədən də qapılara zərbələr vurdular və çox vaxt istəklərinə nail oldular. Zeynal Zeynalov da xoş təsir bağışlayırdı. Futbolçular uzaq küncləri də dəfələrlə hədəfə aldılar. Zərbələrdən dəqiq olanı da oldu, qeyri-dəqiq də.
   1 saat 45 dəqiqə davam edən məşqin ardından AFFA rəsmisi və bəzi futbolçuların fikirlərini öyrəndik. Baş katib E.Məmmədov bildirdi: "Uelslə qarşılaşmada yaxşı oyun göstərsək də, nəticə təəssüfləndirici oldu. Komandamız meydanda 10 oyunçu ilə qaldıqda müdafiə xəttinin üzərinə böyük yük düşsə də, futbolçularımız bundan çəkinmədilər. Hesab edirəm ki, hakim Ramimə ikinci sarı və qırmızı vərəqə göstərməməli idi". Baş katib hesab edir ki, Foqtsun gəlişindən sonra yığmamız daha sürətli, baxımlı oyun göstərir. "O, klubların baş məşqçiləri ilə görüşlər keçirir, futbolçulara lazımı məsləhətlərini, həmçinin AFFA prezidenti Rövnəq Abdullayevə hesabat verir. Hazırda milli komandada orta yaş həddi 24-ə bərabərdir. Bu, gələcəyə nikbin baxmağa əsas verir. Ümid edirik ki, millimiz uğurlar qazanacaq. İnşallah, Lixtenşteyni məğlub edəcəyik. Məşqçilərin əməyini yüksək qiymətləndirirəm. Başda Berti Foqts olmaqla, müxtəlif yaş qruplarından ibarət yığmalarımızdakı almaniyalı mütəxəssislərin işindən razıyam".
   E.Məmmədov Rusiya mətbuatını uydurma məlumatlar yaymaqda günahlandırıb. Onun sözlərinə görə, Foqts həmin ölkənin mediasına AFFA-dan şikayət etməyib: "Foqtsla münasibətlərimiz normaldır. Bu halda, narazılıqdan söhbət gedə bilməz. Rusiya mətbuatının Foqtsun dilindən AFFA rəhbərliyi haqda səslənən fikirlər uydurmadır. Onlar bununla gündəmə gəlmək istəyirlər".
   Yarımmüdafiəçi Mahmud Qurbanov bildirdi ki, qələbə üçün nə lazımdırsa etməyə çalışacaqlar: "Təəssüf ki, ilk qarşılaşmada məğlub olduq. Hesab heç-heçə qurtarsaydı, qanunauyğunluq olardı. İndi bütün diqqəti qarşıdakı oyuna yönəltmişik və qalibiyyət üçün bütün gücümüzü sərf edəcəyik". Elvin Məmmədov qeyd etdi ki, komandada əhval-ruhiyyə yüksəkdir və Lixtenşteyn üzərində qələbəni düşünürlər.
   Millinin hücumçusu Branimir Subaşiç isə belə danışdı: "Uelslə görüşdə rəqibin oyunçuları hazırlıqlı olduqlarını göstərdilər. Yaddan çıxarmaq olmaz ki, onlar İngiltərə Premyer Liqasında çıxış edirlər. Bununla belə biz də əlimizdən gələni etdik. İlk oyunda uğursuz nəticə olsa da, ikinci qarşılaşmada mütləq qalib gəlməliyik. Lixtenşteynin Almaniya ilə oyununun videoyazısını izləmişik. Rəqibin zəif cəhətlərini müəyyənləşdirmişik. Lixtenşteyn futbolçuları sərt oynasalar da, almanlarla görüşdə yorulduqları hiss olundu. Bu görüşdə də qələbə qazanmasaq, bilmirəm harada 3 xal qazanacağıq. Məncə, hücum futbolu oynayacağıq. Ən əsası qalib gəlmək lazımdır. Fərqi yoxdur ki, qol mən vurdum və ya komanda yoldaşım. İnanıram ki, hər şey yaxşı olacaq".
   Anar
   P.S. Milli bu gün saat 10:00 və 18:00-da Tofiq İsmayılov adına Suraxını qəsəbə stadionunda məşq keçəcək. Foqts saat 12:00-da media əhlini AFFA-ya yığacaq.

Dünən saat 21:30-da Lixtenşteyn yığması Bakıya gəlib. Qonaqlar Hava Limanından birbaşa "Hyatt Park" otelinə yollanıblar. "Cırtdanlar" ilk məşqi bu gün saat 10:45-də Zabrat qəsəbə stadionunda keçirəcəksə, saat 18:00-da "Tofiq Bəhramov"da hazırlıq prosesini yekunlaşdıracaq.
   Lixtenşteyn yığmasının baş məşqçisi Hans-Peter Çauqq 0:6 hesabı ilə uduzduqları Almaniyadan zəif olduqlarını bildirib. "Cırtdanlar"ın çalışdırıcısı ilk qələbəni Bakıda, Azərbaycandan alacaqlarını bildirib: "Almanlara yalnız ilk hissədə ciddi müqavimət göstərdik. Rəqib bizdən qat-qat güclü təsir bağışladı. Məğlubiyyətdən nəticə çıxarmışıq. Azərbaycan bizdən elə də güclü deyil. Qol vura bilmirlər. Gənc oyunçulardan qurulmuş komandanı səfərdə uda bilərik. Futbolçularıma başa salmışam ki, bu şansı qaçırmayın".
   "Mənim üçün vacib olanı Azərbaycanla çərşənbə günü keçirəcəyimiz matçdır. Çünki bu oyunla bağlı şanslarımız real görünür". Bu sözləri Lixtenşteynin futbolçusu Mario Frik deyib. Yığmasının tarixində həm oyun, həm də qol sayında birinci olan hücumçu sentyabrın 10-da keçiriləcək Azərbaycan - Lixtenşteyn qarşılaşmasında şanslı olduqlarını düşünür: "Lixtenşteyndə futbol müəyyən tərəqqiyə nail olub. Avropa çempionatının son seçmə mərhələsində yığmamız 7 xal toplamağı bacardı. Bununla da biz Latviya və İslandiya ilə eyni miqdarda xal topladıq. Bu dəfə Azərbaycanda, mümkün olacağı halda isə Uelsdə keçirəcəyimiz qarşılaşmada müsbət nəticə əldə etməyə çalışacağıq". İtaliyanın "Syena" klubunda forma geyinən M.Frik Almaniyaya 0:6 hesablı məğlubiyyətin ertəsi - sentyabrın 7-də 34 yaşını qeyd edib.