Dünya çempionatını seçmə mərhələsinin uğursuz başlamasına baxmayaraq, AFFA rəhbərliyi yığmanın futbolçularını mükafatlandırıb. Uelsə 0:1 məğlub olan millinin hər bir üzvünə beş min dollar pul verilib. Bu hal ilk dəfə deyil ki, baş verir. Qyoko Hacıyevskinin başçılıq etdiyi yığma ötən Avropa çempionatının seçmə mərhələsi çərçivəsində Helsinkidə Finlandiyaya 1:2 hesabı ilə uduzanda da AFFA rəsmiləri eyni miqdarda xərcə düşmüşdü. Böyük britaniyalıları udsaydıq, futbolçular hərəyə 10 min dollar qazanacaqdı. Eyb etməz, Lixtenşteyni yenisələr, yenə bu pulu qazana bilərlər.
   Ölümdən dönən Nodar
   Nodar Məmmədov Uelsdə bədbəxt hadisə ilə üzləşib. Millidə ilk oyununu keçirən 20 yaşlı sol cinah müdafiəçisi "Millenium" stadionundakı görüşün ilk hissəsində rəqiblə toqquşmadan sonra huşunu itirərək, yerə yıxılıb. Dili qatlanan Məmmədovun köməyinə yığmamızın həkimləri gəlsə də, əsas işi komanda yoldaşı Cavid Hüseynovla Kamran Ağayev görüb. Belə ki, onlar Nodarın dilini boğazından çıxara bilib. Həkimlərin də köməyindən sonra oyunu davam etdirən N.Məmmədov yalnız son 15 dəqiqədə Usim Nduka ilə əvəzlənib və yığmamız Uelsdən yeganə qolu məhz bundan sonra buraxıb. O, hadisəni belə xatırlayır: "Rəqiblə toqquşmada huşumu itirdim. Artıq nəfəs ala bilmirdim. Kamranla Cavid olmasaydı, bəlkə də həyatımı itirəcəkdim. Dilim boğazıma qatlanmışdı. Sonra nə baş verdiyini xatırlamıram. Həkimlərin köməyi ilə özümə gəldim". Almaniyanın "Köln" klubunun kapitanı Ümit Özat da az öncə analoji vəziyyətlə üzləşib. Bundesliqada "Karlsrue" ilə oyunun ilk hissəsində huşunu itirərək, yerə yıxılan türkiyəli futbolçunun dili qatlanmışdı. Həkimlərin müdaxiləsindən sonra həyata qaytarılan Ü.Özatın ürəyində problemlər var.
   27 min bilet satışda
   Lixtenşteynlə matçın biletləri satışa çıxarılıb. Bu haqda AFFA-nın baş katibi Elxan Məmmədov məlumat verib. Biletlərin qiymətləri sektorlardan asılı olaraq, 1-4 manat arasında dəyişir. Baş katib bildirib ki, milli komandamızın ötən oyunları ilə müqayisədə indi biletlərin dəfələrlə ucuz satılmasının obyektiv səbəbi var: "Biz azarkeşlərin maddi vəziyyətini də nəzərə almışıq. Məqsədimiz yığmamızı dəstəkləmək üçün stadiona daha çox futbol həvəskarı toplamaqdır". AFFV 30 min bilet sifariş verib ki, bunun 120-si Lixtenşteynnin nümayəndə heyətinə ayrılıb. Qonaq azarkeşlərlə bərabər, UEFA və FİFA təmsilçilərinə, VİP-ə dəvət olunan qonaqlara da biletlər dəvətnamələr paylanılıb. 27 min bilet isə azarkeşlər üçün nəzərdə tutulub ki, onlar stadionun yaxınlığındakı kassalara müraciət edə bilərlər. Hələlik neçə biletin satıldığı məlum deyil. AFFA "Tofiq Bəhramov"a 25 min fanatın gəlməsini təxmin edir.

Fabio Luis Ramim Azərbaycan yığmasının tarixinə düşüb. Braziliyalı futbolçu seçmə mərhələ oyununda meydandan qovulan ilk milliləşən legioner olub. Komandamız dünya və qitə çempionatlarının əvvəlki seçmə matçlarında yalnız 8 dəfə qırmızı vərəqə ilə cəzalanmışdı. Bu siyahıda 9-cu olan Fabio əcnəbilər arasında birinci olub. Kamran Ağayev isə seçmə mərhələ oyununda Azərbaycan milli komandasının penalti dəf edən ikinci qapıçı olub. İndiyədək yalnız Aleksandr Æidkov buna nail olmuşdu. Yığmanın sabiq qapıçısı 1996-cı ildə İsveçrə ilə Bakıda, 1998-ci ildə isə Lixtenşteynlə səfərdə keçirilən matçlarda penaltidən qol buraxmamışdı. Ümumilikdə, seçmə mərhələ qarşılaşmalarında yığmamızın qapısına təyin olunan 12 penaltidən 9-da qol olub. Ağayev həm də millinin tarixinə 14-cü qapıçı kimi düşüb. Əsas komandada ilk matçını keçirən gənc qapıçı yığmanın tarixinə 153-cü, oyunun gedişində meydana çıxan Aqil Nəbiyev isə 154-cü futbolçu kimi düşüb. Kardiffdə baş tutan görüşədək cəmi 152 oyunçu milli formada meydana çıxmışdı.

Tofiq Bəhramov adına Respublika stadionu oyunu qəbul etməyə hazırdır. Bu barədə arenanın direktoru Akif İsmayılov məlumat verib. Onun dediyinə görə, meydanın bəzi hissələri korlansa da, oyun saatınadək hər şey qaydasına salınacaq: "Klubların Avrokuboklardakı çıxışı zamanı qazona güc düşmüşdü. Çalışacağıq ki, oyunu yüksək səviyyədə yola verək. Amma inanmıram ki, stadiona 20 mindən çox adam gəlsin. O qədər də bilet satılmayıb. Yəqin iki, oyun günü satış artacaq. Qaçış zolağını dəyişməyi sonraya saxlamışıq. Firmayla danışıqlarımız davam edir. Hardasa 15 günə iş başlayacaq. Noyabradək işi tamamlayacağıq".

Azərbaycan - Farer adaları 2:2 (2:1)
   6 sentyabr. Bakı .Tofiq Bəhramov adına Respublika stadionu. 500 tamaşaçı.
   Hakimlər: Sinişa Zrniç, Draqo Kule, Mato Staniç, Elmir Aleçkoviç (hamısı Bosniya və Herseqovina)
   Hakim-inspektor: Mühittin Boşat (Türkiyə).
   UEFA nümayəndəsi: Corc Fantaros (Kipr).
   Qollar: R.Abışov 16, V.Nadirov 29 // Q.Nilsen 20, L.Hanssen 77-pen.
   Qolla nəticələnməyən penalti: V.Nadirov 50.
   Sarı vərəqələr: A.Məmmədov 42, M.Medvedev 76, V.Nadirov 90+3 // O.Olastovu 10, E.Yakobsen 39, S.Vathamar 44, P.Poulsen 50.
   Azərbaycan: 1.Səlahət Ağayev, 2.Maksim Medvedev (20.Samir Zərgərov 80), 5.Tural Nərimanov, 7.Elnur Abdullayev (6.Taqim Novruzov 85), 8.Arif Daşdəmirov (19.Əfran İsmayılov 61), 9.Rövşən Əmiraslanov, 10.Asif Məmmədov, 13.Şəhriyar Rəhimov, 14.Rahid Əmirquliyev, 15.Ruslan Abışov (k), 17.Vüqar Nadirov.
   Ehtiyat oyunçuları: 12.Osman Umarov, 4.Səbuhi Həsənov, 11.Rauf Əliyev, 18.Vurğun Hüseynov.
   Baş məşqçi: Bernard Lippert.
   Farer adaları: 1.Qunnar Nilsen, 4.Maqnus Olsen (14.Roqvi Poulsen 80), 5.Poul Tomas Dam, 6.Levi Hansen, 7.Solvi Vathamer, 8.Olavur Olavstovu (2.Poul Yohannes Yustinusen 85), 9.Poul Poulsen, 10.Kristofur Yakobsen, 11.Qudmund Nilsen (13.Ossur Dalbud 74), 12.Fritley Lambanum, 18.Erlinq Yakobsen.
   Ehtiyat oyunçuları: 16.Tordur Tomsen, 3.Odmar Faro, 15.Frank Poulsen, 17.Roaldur Yakobsen.
   Baş məşqçi: Uilyam Makloub Yakobsen.
   
   Gənclərdən ibarət (U-21) yığma yenə də azarkeşləri məyus etdi. 7 illik qələbə həsrətinə son qoyulmadı. Özü də futbolu zəif ölkələrdən sayılan Farer adalarının komandasını məğlub edə bilmədik. Avropa çempionatının seçmə mərhələsinin qrup turnirində sonuncu yerdə qalası olduq. Bunadək komandamız 8 oyuna 1 xal toplamaqla axırda idi. Rəqib isə 3 xalla yığmamızdan bir pillə irəlidəydi. Maraqlıdır ki, "cırtdanlar" həmin 3 xalı da bir neçə ay əvvəl keçirilən ilk matçda bizimkilərdən qoparmışdılar. Tofiq Bəhramov adına Respublika stadionunda baş tutan cavab görüşünə maraq çox az idi. Qarşılaşmaya tamaşa edənləri barmaqla saymaq olardı. Bununla belə, azsaylı azarkeşlər komandamızı köməksiz qoymurdular. Oyuna gəlincə, görüşə fəal başlayan komandamız tezliklə hesabı açmağa müvəffəq oldu. İki dəfə irəli çıxan futbolçularımız üstünlüyü qoruya bilməyərək, ümidləri puça çıxardılar. Qonaq komanda fiziki cəhətdən üstün görünürdü. 18-ci dəqiqədə yığmamızın üzvü Ruslan Abışov hesabı açdı. "Neftçi"nin müdafiəçisi künc zərbəsindən ötürülən top zamanı "ikinci mərtəbə"də inamlı oyunu sayəsində fərqlənə bildi. Ancaq komandamızın sevinci uzun sürmədi. Futbolçuların arxayınlaşması onlara baha başa gəldi. Üstəlik qapıçı Səlahət Ağayevin də kobud səhvi qonaqların bərabərlik qolunu vurmasına yardımçı oldu. Beş dəqiqə sonra Qudmond Nilsen bərabərlik qolunu vurdu. Alman mütəxəssis Bernhard Lippertin başçılığı ilə mübarizə aparan komandamız tezliklə yenə hesabda irəli çıxdı. 22-ci dəqiqədə cərimə meydançasına daxil olan "Karvan"ın hücumçusu Vüqar Nadirov qolkiperlə təkbətək zamanı qapıçıya heç bir şans vermədi - 2:1. Birinci hissənin sonlarına kimi komandalar çox çalışsalar da, hesab dəyişmədi. Fasilənin ardından oyun fərqli məcrada keçdi. Bosniya və Herseqovinadan olan Sinişa Zrniç qapılara iki penalti zərbəsi təyin etdi. Vüqar Nadirov üçüncü qolu vurmağa, dubl etməyə çox yaxın oldu. Əvvəlcə qol vurmaqla qəhrəman olan Vüqar 76-cı dəqiqədə antiqəhrəmana çevrildi. Nadirov penaltini dəqiq yerinə yetirə bilmədi. Futbolda isə təsdiqini tapan "vurmayana vurarlar" prinsipi bu dəfə özünü göstərdi. Qonaqlar bərabərlik qolunu vuraraq komandamızın qələbə ümidini puça çıxardı. Farer adaları yığmasının üzvü Levi Hansen qapımıza təyin olunan penalti zərbəsini dəqiq yerinə yetirdi. Qarşılaşmadan sonra keçirilən mətbuat konfransında Bernhard Lippert futbolçularını günahlandırıb. Alman mütəxəssis deyib: "Əgər Vüqar Nadirov penalti zərbəsindən istifadə etsəydi, qələbə qazanacaqdıq. Qapıçı Səlahət Ağayevə də iradım var. O, da səhvlərə yol verdi və bu, bizə baha başa gəldi. Yeddi ildir ki, milli rəsmi matçlarda qələbə üzünə həsrətdir. Bunu mən də bilirəm. Farerlə oyunda seriyanın qırılmasını gözləyirdim. Səlahətin qapıda inamsız dayanması adi qollar "yeməyimizə" səbəb oldu. Səhvlər üzərində işləməliyik. Mənə Kamran Ağayev kimi qapıçı lazımdır. İndi o, özünü əsas yığmada sübut edib. Fəxr edirəm ki, bizim elə qapıçımız var. Uelsə qarşı necə dayanığını gördük. Tezliklə ona əvəzləyici tapmalıyıq. Əksər futbolçuların oyun praktikası azdır. Demək olar ki, hamısı əvəzedici heyətdə çıxış edir. Cəmi 4-ü əsas komandanın formasını geyinir. Albaniya ilə matça görə heyətdə dəyişiklik edəcəm. Bu, çox vacibdir. Farerlə matçda gördüm ki, istəyəndə yaxşı oynaya bilirik. U-19 və U-17-dən də futbolçular götürə bilərəm. Az bir vaxtda bir çox suallara cavab tapmalıyıq. Zəif futbolçuları çıxarıb, yerlərinə onları gətirmək olar". Sentyabrın 10-da futbolçularımız səfərdə albanların qonağı olacaq. Bakıdakı qarşılaşmada 1:1 hesabı qeydə alınmışdı və komandamız bir penalti zərbəsini qaçırmışdı.
   Göründüyü kimi, B.Lippertin rəhbərliyi ilə də yığmamız uğursuzluqlara düçar oldu. Komandamız keçirdiyi oyunlarda istər fiziki, istərsə də taktiki baxımdan rəqiblərindən geri qaldı. Uzunmüddətli qələbəsizlik sindromu yenə qırılmadı. Təbii ki, uğursuzluqlarda futbolçularla yanaşı, baş məşqçi Lippertin də günahı böyükdür. Onsuz da fiaskoya uğrayırdıq, almanın gəlişindən sonra da vəziyyət dəyişmədi. Bir sözlə, köhnə hamam, köhnə tasdır.
   
   I qrup
   1.İtaliya 9 7 2 0 20-4 23
   2.Xorvatiya 9 7 0 2 19-11 21
   3.Yunanıstan 9 4 3 2 19-13 15
   4.Albaniya 9 3 2 4 10-13 11
   5.Farer-adaları 9 1 1 7 5-17
   6.Azərbaycan 9 0 2 7 6-21 2
   Xorvatiya - Albaniya 4:0, İtaliya - Yunanıstan 1:1.
   9 sentyabr. Xorvatiya - İtaliya, Yunanıstan - Farer adaları.
   10 sentyabr. Albaniya - Azərbaycan.

Olimpiya yığmamız artıq Albaniyaya yola düşüb. Paytaxt Tiranadan 150 km aralıda yerləşən Vlora şəhərində məskunlaşan komandamız "Flamurtari" stadionunda məşq keçmək üçün 2 saat yol qət edib. Ötən görüşə dəvət alan 2 futbolçu səfərə aparılmayıb. MOİK-li hücumçu Rövşən Əmiraslanov zədə ucbatından düşərgədən kənarda qalıbsa, "Qarabağ"lı müdafiəçi Maksim Medvedev sarı vərəqə limitinə görə Bakını tərk etməyib. AFFA-nın Beynəlxalq Əlaqələr Departamentinin rəisi Orxan Hüseynzadənin dediyinə görə, yerli futbol federasiyasının rəsmiləri millimizi yaxşı qarşılayıb və polims karvanın müşayəti ilə otelə yola salıb. Şəhərdə qarşıdakı matça böyük ajiotaj var. Baş məşqçi Bernard Lippert futbolçularına qələbə qazanmaq tapşırığı verib.

"Çalışdırdığı komandanı gücləndirə bilməyən məşqçi almaniyalı mütəxəssis sayıla bilməz. Azərbaycan yığmasına isə məhz almaniyalı Berti Foqts rəhbərlik edir". Bu sözləri Uels komandasının üzvü Karl Fletçer deyib. 28 yaşlı oyunçu dünya çempionatının seçmə oyununda Azərbaycan üzərində qələbə qazanacaqlarına son dəqiqəyədək inanıb: "Foqts Azərbaycanı mütəşəkkil, yaxşı formalaşmış komandaya çevirə bilib. Belə rəqibə erkən qol vura bilsəydik, işimiz xeyli asan olardı. Son nəticədə ədalətli hesabı əldə edə bildik. Bütün gərgin işimiz və əziyyətlərimizin bəhrəsi üç xal idi. Hətta penaltini vura bilməyəndə də inamımı itirmirdim".
   Uelsin kapitanı Saymon Devis çətinliklə qələbə qazanmalarının səbəbini Kamran Ağayevdə axtarıb: "Kumas penaltini vura bilməyəndən sonra, bir anlıq ürəyimdə fikirləşdim ki, qələbə əldən getdi. Bu cavan uşaq sanki qapını sehirləmişdi. Bəxtimiz gətirməsəydi, o bir qolu da vurmayacaqdıq. Azərbaycandan üç xal almaq istəyən komanda 90 dəqiqə sürətli oynamalı, hücumlarına ara verməməlidir. Seçmə mərhələdə əsas nəticədir. Birinci hissəni hücumda keçirsək də, təhlükəli vəziyyətlər yaratmaqda çətinlik çəkdik. Hava mübarizələrində üstün olsaq da, hər dəfə son zərbəni vuran çatmırdı. Penaltidən sonra həyacandaydıq. Tələsmək bizə baha-başa gələcəkdi. Azərbaycanlı futbolçular oyunun başladığı kimi bitməsinə çalışırdı ki, Evans və Vouksun meydana girməsi gücümüzü bir qədər də artırdı. Semin həlledici zərbəsi bizi yerdən qaldırdı".