Fəxri prezident Mübariz Mənsimov 3 gün əvvəl Türkiyədən Azərbaycana gəlib. İstanbulda yaşayan patron hələ bir həftə Bakıda qalacaq. Onun qəfil səfərinin məqsədi məlumdur: son 1 ayda klubda və "Palmali"də aparılan araşdırmaların nəticəsi ilə tanış olmaq. Şirkətin İstanbuldakı mərkəzi ofisindən dəvət olunan təhlükəsizlik xidmətinin əməkdaşları maliyyə yeyintilərinə yol verilib-verilmədiyini yoxlayır ki, bütün əməliyyatlar Mübariz müəllimin kontrolundadır. Sentyabrın 6-da Lənkərana gedən klubun rəhbəri stadion və bazaya baş çəkib. Bəllidir ki, ötən həftədən etibarən, mərkəzi arenada yoxlamalar başlayıb. Son 4 ildə ayrılan vəsaitin istiqaməti üzrə xərclənməməsi barədə xəbərlər, nəhayət ki, onun da qulağına çatıb. İdman qurğusunun direktoru Höccət Hacıyev fəxri prezidentinin yaxın qohumu olsa da, bu onu məsuliyyətdən xilas eləmir. "Futbol+qol" stadionda gedən prosesləri dəfələrlə işıqlandırıb, bildiklərini gizlətməyib. Onu da eşitmişik ki, arena təkcə Mübariz Mənsimova məxsus deyil. Buranın təsisçiləri siyahısında daha bir şəxsin adı çəkilir ki, indi bu informasiyanın həqiqətə nə dərəcədə yaxınlığını öyrənirik. Bir ay əvvəl stadionun ot örtüyünün yanmasının Mənsimovu əsəbləşdirməsindən xəbərdarıq. Eyni halın ildə 2-3 dəfə təkrarlanması təəccüb doğurmaya bilməz. Buranın 5-6 il öncəki görkəmi daha münasib idi. Təbii qazonu dəfələrə xaricdən gətirilən ot növüylə əvəzləmək patrona milyon dollarlar hesabına başa gəlib.
   Yaxın dostu Zəfər Mirzəyevin "Palmali"dən çıxarılmasından sonra klubla əlaqələrini kəsən prezident Mais Mənsimov neçə həftədir işə də çıxmır. Klubun rəhbərliyində yer alan yaxın qohumu Eldar bəy və baza direktoru da vəzifəsindən gedib. Mais bəy Karaya görə "X-L"da çalışmaq istəmədiyindən, böyük qardaşı moldovalı yaxın dostunu prezident postuna gətirməyə hazırlaşır. Sabiq "Beşiktaş"lı idarəçi İhsan Kalkavan Azərbaycanda çalışmağa tərəddüd etdiyindən, onun da namizədliyi arxa plana keçib. Digər türkiyəli futbol funksionerləri kimi. "X-L"da gedən araşdırmalar barədə hələ ki rəsmi açıqlama verilmir. Tuyqun Nadirovun yerinə vitse-prezident gələn Araz Nəsirov da gözləməyi məsləhət görür. 28 yaşlı klub rəsmisi əslən Masallıdandır. Ali təhsilini Türkiyədə alıb, elə burda da "Palmali"yə işə düzəlib. Nəsirov Lənkəran səfərində klubun sahibini müşayət etsə də, bizi hadisələrin bundan sonrakı inkişafından xəbərdar eləmir. Araşdırmaların yaxın günlərdə bitəcəyini söyləməklə kifayətlənir. Elə Rasim Kara da. Komandanın baş məşqçisi fəxri prezidentlə görüşdüyünü təsdiqləsə də, söhbətin mövzusunu açmadı: "Bu, öz aramızda olan məsələlərdir. Ailənin sirri çölə çıxmamalıdır. Tək bir məsələ yox, bir çox şey haqqında danışmışıq. Heç biri kənara çıxarılası deyil". Türkiyəlidən Yakuba Bambanı transferə çıxarmasının səbəbini də eşitdik: "Mən gələnədək komandada 4 hücumçu vardı. İvan Çvetkovu da sonra gətirmişik. Dörd hücumçu olan yerdə afrikalıya ehtiyac qalmadı. Yaşı çoxdur, tez-tez zədələnirdi".
   "Xəzər-Lənkəran"ın keçmiş baş məşqçisi Ağasəlim Mircavadov isə iyulun 27-dən bəri istirahətini davam etdirir: "Evdə oturub, dincəlirəm. Problemlərdən uzağam. Sakitcə əyləşib televizorda futbola baxıram. Çempionatı izləyirəm. İddialı komandalar bu il çox əziyyət çəkəcək. Baxdığım komandalar içərisində ən çox "Bakı"nın oyunu məndə rəğbət oyatdı. Hacıyevski yaxşı transferlər edib, əla heyət qurub. Fikrimcə, onlar hələ pik formada deyillər. Bu da qabaqdadır. "Xəzər-Lənkəran", "Neftçi", "İnter" və "Olimpik"in də problemlərin öhdəsindən gələcəyini gözləyirəm. "Neftçi" yenə baş məşqçisini dəyişdi. Görünür, rəhbərlik nə isə bilir. Onlar öz oyunuyla göstərməlidirlər ki, həqiqətən flaqmandırlar. Öz adları üçün oynamalıdırlar. Gede komandanı düzəldib lider səviyyəsində oynatsın, sonra çempionluq haqqında düşünmək olar. "Xəzər-Lənkəran" həmişə öz oyunu və gücüylə seçilib. Rəhbərlik klubun qarşısına böyük məqsədlər qoyub. Təəssüf ki, mən yığdığım heyət artıq yoxdur. Rasim Kara hər şeyi dağıtdı. "Xəzər"in baş məşqçisi postunda qalsaydım, aparıcı oyunçulardan imtina etməzdim. Komandanın özəyi vardı və yenə çempionluq uğrunda mübarizə aparmaq olardı. Kara "Xəzər-Lənkəran"dakı futbolçuların fiziki hazırlığından narazılıq edir. Qoy, o gedib iki ilə yaxın işlədiyi "Qarabağ" haqqında danışsın. Nə nəticə qazanıb? Kara komandanı dağıdıb, oyun da yoxdur. "Qarabağ"ın halını görürük. Qurban Qurbanov gənc məşqçidir, güclü komanda yaratmaq ona çətin olacaq. Bir gün böyük futbola qayıdacam. Güclü psixoloji hazırlıq keçməliyəm. Xaricdən dəvət gəlmişdi, imtina etdim. Məni siyahıdan silmək tezdir. Karyeramı bitirmək fikrində deyiləm. Qayıdacam və daha yaxşı işləyəcəm. Əsas odur ki, işlədiyim klubda rəhbərlik futbolu sevsin. Onda istənilən uğuru qazanmaq olar".
   

Rasim Karanın gəlişindən sonra "Xəzər-Lənkəran"ın etdiyi transferlərdən biri İvan Çvetkov oldu. Bolqarıstanlı Hollandiya vətəndaşlığını daşıyır. Karyerasının son dönəmini Türkiyədə keçirib. İlqar Qurbanovun keçmiş komanda yoldaşıdır. İlqar kimi, Çvetkov da "Sivasspor"dan bir şeyə görə ayrılıb: oyun praktikası qazanmaq üçün.
   Bülənt Uyğun digərlərinə baxanda balkanlı hücumçuya az şans verirdi ki, bu da artan narazılıqlara gətirib çıxarırdı. Budur, o, artıq "Xəzər-Lənkəran"la 2 illik müqavilə bağlayıb. Siftəsi yaxşı gəldi. MOİK-in əvəzedici heyəti ilə yoxlama görüşündə meydana çıxdı, bir qol vurdu. Bolqarıstanlı legioner seçimindən razıdır.
   - Bura gəlməyimin səbəbkarı Rasim Kara deyil. Azərbaycanda oynamağı özüm istəmişəm. Gəlmişəm ki, özümü sübut edim. "Xəzər-Lənkəran" çempion olmaq iddiasındadır. Mən də istəyirəm ki, bunda payım olsun.
   - Azərbaycana gələnədək "Xəzər-Lənkəran" barədə hansısa məlumatın var idi?
   - Yox.
   - Elədirsə, bu təklif necə ortalığa çıxdı?
   - Sivasda Rasim Karanı tanıyırlar. Ona dedilər, sonra gəldim.
   - "Sivasspor"u Azərbaycana dəyişmək karyeran üçün eniş deyil?
   - Sözsüz ki, Türkiyə futbolu səviyyəcə Azərbaycandan qat-qat üstündür. Axırıncı mövsümdə "Sivasspor"da çox şans qazanmadım. Əksər matçları ehtiyat oyunçular skamiyasından izlədim. "Sivasspor"u buna görə tərk elədim. Azərbaycana oynamaq üçün gəlmişəm.
   - "Sivasspor"un baş məşqçisi Bülənt Uyğun bu arada Türkiyə mətbuatına bildirib ki, səni komandasında saxlamaq istəyib.
   - O istəyirdi ki, klubda qalım. Amma mənə əvəzedici gözüylə baxırdı. Yaşım o qədər də az deyil. Ehtiyatda qala-qala inkişaf edə bilmərəm.
   - İlqar Qurbanovu tanıyırsan?
   - Bir il Sivasda qaldı. Dostum idi. Yaxşı oyunçudur.
   - Bilirsən ki, İlqar Sivasa elə Lənkərandan gedib?
   - Özü bir dəfə demişdi. Arabir Azərbaycandan söz salırdı, tərifləyirdi. Onda inanmazdım ki, bir gün bura gələcəm.
   - "Xəzər-Lənkəran" Azərbaycanın ən imkanlı və ən böyük azarkeş dəstəyinə malik klubudur. Əminsən ki, özünü burda doğruldacaqsan?
   - Ona görə Azərbaycandayam ki, necə futbolçu olduğumu sübut edim. Əsas heyətə düşmək heç də asan olmayacaq. Komandada yaxşı oyunçular çoxdur. Çalışacam ki, meydana çıxan ilk 11 nəfərin arasında mən də olum. Azarkeşlərə gəlincə, NBS ilə çempionat oyununu mən də tribunadan izlədim. Fanatlar 90 dəqiqə susmadılar, "Xəzər"i qələbəyə səslədilər. Onların qarşısında çıxış etmək mənə məsuliyyət verir. Bacardığımı edəcəm ki, komanda irəli getsin.
   - Azərbaycana gələndən sonra ölkəmiz və "X-L" barədə fikirlərin dəyişib, yoxsa qətiləşib?
   - Normal haldır ki, hər dəfə ölkəni dəyişəndə düşündüyündən də fərqli şeylər görürsən. Mən buna öyrəşmişəm. Azərbaycanın da özünə görə mentaliteti, adət-ənənələri var. Getdiyin yerin qayda-qanunlarına öyrəşməlisən.
   - Lənkəran da Sivas kimi bir əylalətdir. Əyalətdə yaşamağa öyrəşmisən?
   - Hər şey qaydasındadır. "Sivasspor"la "Xəzər-Lənkəran" arasında bəzi fərqlər mövcuddur. Onlardan biri də budur ki, oyunlara Bakıda hazırlaşırıq, çox vaxt da burda qalırıq. Ailələrimiz də paytaxtda qalır. Yalnız oyundan-oyuna Lənkərana gedirik.
   - Dedin kim, ailən də artıq Azərbaycandadır. Onlar yanında olanda özünü sıxılmış hiss etmirsən? Bəlkə motivasiya alırsan?
   - Ətrafım yaxşıdır. Klubda məndən başqa iki bolqarıstanlı da oynayır. Radomir Todorov və Kostadin Canbazovla bir yerdəyik. Onlar bizə kömək edirlər.
   - Səncə, hazırkı komandan Superliqada neçənci yer tutar?
   - "Xəzər"in cəmi 1-2 oyununa baxmışam. Buna görə fikir yürütmək çətindir. "Xəzər" yaxınlarda İstanbula gəlmişdi, "Beşiktaş"la oynadılar. Komandanı ilk dəfə orda gördüm. Türkiyədə futbol çox sərtdir. Hər futbolçu buna tab gətirmir.
   - Azərbaycan klublarından "İnter" və "Neftçi"nin səninlə maraqlanmasını eşitmişik. Hansı komandadan konkret təklif almışdın?
   - "İnter"dən maraqlanan olmamışdı. Birinci dəfədir bu adı eşidirəm. "Neftçi"dən isə təklif varıydı. Ukraynalı baş məşqçilər tərəfindən.
   - Sonra nə oldu?
   - İndiyədək mənim özümə də qaranlıq qalır ki, niyə söhbətin axırına getmədilər. Təklif gəlsə də, sonradan səs-soraq çıxmadığını görüb, ciddiyə almadım. Ən real təklifi "Xəzər-Lənkəran" etdi, mən də gəldim. Gələndən sonra gördüm ki, doğru addım atmışam.
   - Türkiyə mətbuatının yazdığına görə, Azərbaycanda ilinə 500 min dollardan çox pul qazanacaqsan. Doğrudur?
   - Pul barədə danışmaqla aram yoxdur. Klubla peşəkar müqavilə bağlamışam və bu, bizim sirrimizdir. Hər halda müqavilə şərtləri ürəyimcədir.

BBS News (Böyük Britaniya): "Berti Foqts Azərbaycan futbolunun tarixinə düşmək üçün gözəl şans əldə etmişdi. Birinci oyununda Uelslə səfərdən xalla dönə bilərdi. Fabionun qırmızı vərəqə alması hər şeyi korladı".
   Foxsports (ABŞ): "18 yaşlı Vouks Azərbaycanın qapısına qələbə qolunu vurmaqla Uelsi şokdan qurtardı".
   Kikker (Almaniya): "Vouks Foqtsun debütünü qara gətirdi. Azərbaycan pis oynamadı, əsasən də müdafiədə. Uelsə qarşı oyunla Rusiya önündə heç nə etmək olmaz".
   The İndependent (Uels): "Gənc Sem Vouks Uelsə ikinci nəfəs verdi. Con Toşakın komandası meydana üç xal üçün çıxsa da, on nəfərlə qalan rəqibini yalnız son dəqiqələrdə üstələdi. Azərbaycan yığması tarixi ərzindən heç bir rəsmi səfər oyunundan qələbə ilə dönməyib. Heç kim onlardan 1 xaldan artıq nəticə gözləmirdi".
   RTR-Sport (Rusiya): "Azərbaycan komandası inkişafdadır. Uelsdən qorxmadılar. Baxaq, Lixtenşteynə qarşı nə edəcəklər?"
   NTV Sport (Rusiya): "Günün ən böyük sürprizini Azərbaycan edə bilərdi. Uelsdən xalla dönmək üçün yeddi dəqiqələri çatmadı. Kamran Ağayev penaltini dəf etdi, üç-dörd "ölü top"u qapıdan çıxardı. Oyunçuları qırmızı vərəqə almasaydı, meydan sahibləri taleyi ilə barışacaqdı".
   UEFA-nın rəsmi saytı: "Uels - Azərbaycan matçı üstübağlı "Millenium" stadionunda keçirildi. Britaniyalılar qonaqları azlıqda qalandan sonra cəzalandırdı. İkinci hissəni Kamran Ağayevin benetisi adlandırmaq olar. "Xəzər"in qapıçısı uelslilərin hücumlarını təkbaşına saxlayırdı. Toşakın komandası ərazi üstünlüyünü tamamilə öz əlinə keçirsə də, Ağayev qapıda inamlı dayanmışdı. 64-cü dəqiqədə Rəşad Sadıqov cərimə meydançasında Co Ledliyə qarşı kobud oynadı. Penalti nöqtəsinə yaxınlaşan Kumas Ağayevlə dueldən növbəti dəfə məğlub ayrıldı. Gənc qapıçı yarımmüdafiəçinin birinci zərbəsinin istiqamətini düzgün müəyyənləşdirməklə bərabər, ikinci zərbəni də qaytardı. Azərbaycan futbolçuları Kardiffə bir xal üçün gəlmişdilər, Fabio Ramimin qırmızı vərəqə alması işlərini çətinləşdirdi. 83-cü dəqiqədə künc nöqtəsindən qaldırılan zərbə zamanı qapı qarşısında çaşqınlıq yarandı və "Vulverhempton"un hücumçusu iki metrdən "mərmi"ni tora qovuşdurdu".