Qızmar avqustun 17 günü ərzində bütün dünya idmansevərlərinin qəlbinə yol tapan Pekin həyəcanı yenidən bərpa oldu. Bu dəfə planetin fiziki qüsurlu idmançıları XIII Yay Paralimpiya Oyunlarının medalları uğrunda mübarizəyə qalxıblar. Ölkəmiz bu oyunlara özü üçün rekord sayda idmaçı - 18 nəfərlə qatılıb.
İdmançılarımızın Pekin həyəcanı elə sentyabtrın 2-dən - Çin paytaxtına düşdükləri gündən başlandı. Bir günlük istirahətdən sonra paralimpiyaçılarımız yüksək əhval-ruhiyyədə onları Pekin uğurlarına aparan məşqlərin son mərhələsinə başladılar. Özü də məşqlər adaptasiya məqsədilə hər növ üzrə yarışların vaxtına uyğun olaraq aparılıb.
Sentyabrın 5-də Pekində Azərbaycan bayrağının qaldırılma mərasimi olub. Tədbirdə paralimpiyaçılarımızla yanaşı ölkəmizin Çindəki səfiri Yaşar Əliyev, "Neftçi" İSM-nin direktoru Sadıq Sadıqov, Gənclər və İdman Nazirliyinin şöbə müdiri Aydın Məmmədov və Azərbaycan Korlar Cəmiyyətinin sədri Semyar Abdullayev də iştirak ediblər. Mərasimdə Paralimpiya Oyunlarında Azərbaycan missiyasının rəhbəri Şaiq Həmidov çıxış edib. Olimpiya Oyunlarının 1 ay öncəki ecazkar tamaşasından heç də geri qalmayan əzəmətli şou sentyabrın 6-da Pekin vaxtı ilə saat 20:00-da XIII Yay Paralimpiya Oyunlarının yolunu açıb. Ertəsi isə idmançılar yarış meydanlarına çıxıblar. Ötən ay Olimpiya çempionumuz Elnur Məmmədlinin səyləri ilə Azərbaycan himninin səslənməsinin şahidi olan idman arenası bu dəfə əlil cüdoçularımızın uğur meydanına çevrilib. Elə ilk gündən himnimiz səslənməsə də, bayrağımız yüksəlib. Sentyabrın 7-də 60 kq çəki dərəcəsində yarışan dünya çempionu Ramin İbrahimov gərgin döyüş gününün sonunda fəxri kürsünün 3-cü pilləsinə qalxaraq komandamıza ilk medalı qazandırıb. İdmançımız ukraynalı İqor Zayadkoviç və rusiyalı Səid Şahmanovu məğlub etsə də, 3-cü görüşündə əlcəzairli Malud Nouraya yenilərək, qızıl medal iddiasından əlini üzüb. Bürünc medal uğrunda görüşdə britaniyalı Ben Kuilterə 27 saniyəyə qalib gələn Ramin adını mükafatçılar sırasında yazdırıb. Həmin gün 66-kq çəki dərəcəsində daha bir cüdoçumuz - İlkin Alışov yarışıb. İlkin ilk görüşdə braziliyalı Eduarco Amaralu yolundan kənarlaşdırsa da, 2-ci görüşdə əlcəzairli Sidali Lamrinin müqavimətini qıra bilməyib. Ümidini bürüncə saxlayan cüdoçumuz təsəlliverici görüşdə ukraynalı Sergey Karpenyuka yenilməklə bu şansı da əldən verib və yekunda 7-ci olub.
Sentyabrın 8-də növbəti medal atletika yarışlarında gəldi. Üçtəkanla tullanmada 5 cəhdinin ilkində 14,65 metr nəticə göstərən idmançımız - 2006-cı il dünya ikincisi Vladimir Zayets bununla medallar uğrunda mübarizə aparmaq iqtidarında olduğunu göstərdi. Növbəti iki cəhddə nəticəsini xeyli yaxşılaşdıran atletimiz əvvəlcə 14,93, sonra isə 15 metrə tullandı. Son iki cəhddə daha aşağı nəticə göstərən Zayets, yekunda ən yaxşı göstəricisi - 15 metrlə bürünc medala sahib çıxdı. Onu qızıl medalın sahibi, 15,37 metr nəticə ilə dünya rekordu vuran cəudiyyəli Osama Alşanqiti və 15,24 metrə tullanan ukraynalı İvan Kitsenko qabaqladılar.
Həmin gün qaçış cığırına çıxan atletimiz Elçin Muradov 7-ci seçmə qrupda 4 nəfər arasında ən yaxşı nəticə göstərərək (1,35 san.), bu kvartetdən yarımfinala yeganə vəsiqəni qazandı. 19 yaşını ilk paralimpiya sınağından düz bir həftə öncə qeyd etmiş idmançımız yarımfinal mübarizəsinə bu gün çıxacaq.
Güllə atıcımız, Sidney və Afinadan medalla dönmüş Yelena Taranova, Pekində ilk sınağından əliboş çıxdı. 10 metrə məsafəyə yarışda Yelena seçmə mərhələni 364 xalla 8-cü pillədə başa vurdu. Atıcımız finalda 2-ci nəticə göstərsə də (96,1 xal), bu ona medalçılar sırasına düşməyə imkan vermədi. Belə ki, güllə atıcılığında seçmə mərhələdəki nəticə ilə final göstəricisi cəmlənir və yekunda Taranova 460,1 xalla yalnız 6-cı oldu. İndi onu qarşıda daha iki məsafədə yarış gözləyir. 10 metr məsafədə yarışın qalibi adını isə 467,7 xalla çinli Hayyan Lin qazandı.
Nəhayət, dünən iki medal şansı cüdoda gəldi. 73 kq çəki dərəcəsində yarışa Avropa üçüncüsü Ramin Əliyev əvvəlcə yaponiyalı Takayuki Kimuranı ipponla üstələyərək, sonra çinli Æilin Xudan aldığı ippon məğlubiyyəti ilə təsəlliverici döyüşlər seriyasına keçdi aə almana uduzdu.
81 kq çəkidə qitə üçüncüsü Natiq Novruzzadə ilk olaraq
ispaniyalı Salvador Qonsales üzərində ippon qələbəsi qazandı. Lakin növbəti rəqib - argentinalı Xorxe Lensina eyni fəndlə Natiqin qızıl yolunu kəsdi. Bürünc iddiası ilə təsəlliverici döyüşlərə çıxan idmançımız ilk rəqibi - yaponiyalı Kenji Oqa önünə çıxmayıb ki, bu da xəstələnməsinə görədir.