Ukrayna Futbol Federasiyasının (UFF) rəhbərliyi həmyerlimiz Vadim Şevçenkonu işdən çıxarıb. Əslən Bakıdan olan Şevçenko qurumun Hakimlər Komitəsinin sədri vəzifəsindən azad olunub. Onu ötənlərin məşhur rusiyalı hakimi Aleksey Spirin əvəzləyib. Rusiya Futbol İttifaqının İnspektorlar Komitəsinin sabiq sədri gələn bazar ertəsi Kiyevdə yeni postunda təqdim olunacaq. UFF-nin prezidenti Qriqori Surkis bu vəzifəyə xarici mütəxəssis dəvət edilməsinin vacibliyini bildirməklə, namizədlərlə danışıqlar aparıldığına işarə vurmuşdu. Vadim "Neftçi"nin sabiq futbolçusu, tanınmış mütəxəssis Vitali Şevçenkonun qardaşıdır.
   ***
   16 yaşadək futbolçulardan ibarət milli yığması Almaniyada təşkil olunmuş turnirə start verib. Komandamız Turingen əyalətinin yığması ilə qarşılaşıb və 4:0 hesabıyla qalib gəlib. Qolları Qurbanəli Əliyev, Ruslan Nəsirli, Namiq Ələsgərov və Kənan Manafov vurub. B, Almaniya Futbol İttifaqı tərəfindən keçirilən ənənəvi turnirdir və iştirakçıları Almaniyanın müxtəlif bölgələrini təmsil edən yığma komandalardır. 16 yaşadək futbolçulardan ibarət Azərbaycan yığması bu turnirə AFFA ilə Almaniya Futbol İttifaqı arasında mövcud olan əməkdaşlıq müqaviləsi çərçivəsində dəvət olunub. 22 komandanın mübarizə apardığı turnirdə yığmamız Almaniya təmsilçisi olmayan yeganə iştirakçısıdır. Duysburq şəhərində keçirilən "DFB-Şulerlager" yarışmasının ilk turunun ən böyük hesablı qələbəsini qazanan komandamız ikinci oyununda Almaniyanın Cənub-Qərb zonasının yığması ilə üz-üzə gələcək. Bu komanda ilk matçında Cənubi Baden yığmasını 3:1 hesabı ilə məğlub edib.
   ***
   İtaliyanın Liqnano şəhərində keçirilən çimərlik futbolu üzrə Avropa Liqasının seçmə mərhələ oyunları keçirilib. Çexiya yığması ilə qarşılaşan millimiz 5:4 hesabı ilə qələbə qazanıb. Komandamızın qollarını Elşad Quliyev, Elvin Quliyev, Zeynal Zeynalov, İlham Əzizzadə və Müslüm Hüseynov vurub. B qrupunda mübarizə aparan Azərbaycan yığması Hollandiyanı 7:4 hesabı ilə məğlub edərək, növbəti mərhələyə yüksəlib. Çexiya isə II turda hollandları eyni hesabla məğlubiyyətə uğratmışdı.
   ***
   Eşitməqüsurlu əlillərdən təşkil olunmuş 16 yaşadək futbolçulardan ibarət millimiz Slovakiyanın Preşov şəhərində keçirilən beynəlxalq turnirdə çıxışını başa vurub.
   Ruminiya (7:1), Bolqarıstan (6:0), Makedoniya (5:1), Polşa (4:0) komandalarını məğlub edən millimiz Rusiya yığması ilə heç-heçə (2:2) oynamaqla, Ukrayna təmsilçisinə (0:5) məğlub olub. Mllimizin futbolçusu Səid Talıbzadə isə 5 qolla turnirin bombardiri olub. Bu münasibətlə ona turnirin təşkilatçıları tərəfindən xüsusi diplom təqdim edilib.
   ***
   "Beşiktaş"ın prezidenti Yıldırım Dəmirörən azərbaycanlı iş adamı Mübariz Mənsimovun onun komandası üçün ulduz futbolçular alacağı ilə bağlı vəd verməsi barədə mətbuatın iddialarına münasibət bildirib. "Neftçi" ilə oyundan əvvəl keçirilən mətbuat konfransında İstanbul klubunun rəhbəri söyləyib ki, İdarə Heyətində təmsil olunan heç bir şəxsi futbolçu alacaq deyə komandaya gətirməyib: "Mübariz Mənsimov da mənə heç bir vəd verməyib. Onlara təşəkkür edirəm. "Beşiktaş TV" üçün böyük yardımları oldu".
   ***
   Premyer Liqa, ölkə kuboku və birinci divizion oyunlarını idarə edən hakimlərin təlim-məşq toplanışı keçiriləcək. Türkiyənin Ankara şəhərində iyulun 15-dən 29-dək təşkil olunan toplanış çərçivəsində ədalət təmsilçilərimiz bir neçə yoxlama oyunlarını da idarə edəcək.