Yeni mövsümə hazırlaşan "Muğan" məşqlərini "Ədliyyə" stadionunda həyata keçirir. Salyan təmsilçisi dünən heyətini daha bir oyunçu ilə gücləndirib. Belə ki, "Muğan" azarkeşlərin "Simurq"dan yaxşı tanıdığı Nikolay Valev Petrovla müqavilə imzalayıb. 29 yaşlı hücumçu qarşıdakı 1 il ərzində "ağ-qırmızılar"ın formasını geyinəcək. Futbolçu 2010-cu ilin fevralından etibarən Bolqarıstanın "Slavia" komandasında çıxış edirdi. Karyerasının böyük hissəsini Bolqarıstanda keçirən forvard həmin ölkənin "Spertkavitsa", "Spartak Varna", "Çerno More" və "Slavia" kimi klublarında keçirib. 2010-cu ilin qış mövsümünə qədər "Simurq"un heyətində çıxış edən futbolçu 17 matç ərzində 2 qola imza atıb. Nikolay Petrov bu gündən etibarən "Muğan"ın düşərgəsində heyətlə birgə məşqlərini davam etdirəcək. Premyer Liqada üçüncü mövsümünə başlayan aranlılar bosniyalı yarımmüdafiəçi İlya Podranskini də yoxlanışdan keçirir. Afrikadan olan legionerlər də yaxın günlərdə birbaşa müqaviləyə gələcək.