"Bakı"nın təklifi və məqsədi məni tam qane edirdi. Artıq biz müqavilə bağlamağa hazırlaşdığımız vaxt məsələyə Berti Foqts qarışdı. Azərbaycan yığmasının baş məşqçisi həmyerlisinin tərəfini saxladı". Bu fikirləri "Turan"ın sabiq baş məşqçisi Naci Şensoy Bolqarıstan mətbuatına açıqlamasında deyib. Ötən mövsümün sonuna yaxın Plovdivin "Lokomotiv" klubundan ayrılandan sonra işsiz qalan türkiyəli mütəxəssis "Bakı" variantının olduğunu bildirib. Şensoyun sözlərinə görə, son ölkə kubokunun qalibi təcrübəli almaniyalı mütəxəssis Vinfred Şaferə qədər onunla danışıqlar aparırmış. Ancaq bu variant sonda baş tutmayıb: "Yenidən "Turan"a rəhbərlik etmək variantım da var idi. Ancaq özüm bu təklifdən imtina etdim. Həmin variant indiyə kimi aktualdır. Biz razılaşmışıq ki, bu günlərdə onlara son cavab verəcəyik. Ancaq yəqin ki, bu təklifdən imtina edəcəyəm. Mən elə məşqçi deyiləm ki, turnir cədvəlinin ortalarında yerlə qane olum".
   Onun bu açıqlamasına "Bakı" da münasibət bildirib. Klubun rəsmi saytı türkiyəli mütəxəssislə heç vaxt danışıqlar aparılmadığını bəyan edib: "Son günlər bəzi kütləvi informasiya vasitələrində "Bakı"nın baş məşqçisi postuna Naci Şensoyun gətirilməsi ilə bağlı yayılan xəbərlər həqiqətə uyğun deyil. Bildirmək istəyirik ki, "Bakı" futbol klubunun baş məşqçisi postuna namizədlər siyahısında Naci Şensoyun adı heç vaxt olmayıb. "Bakı"nın rəsmilərindən onunla heç kim danışıq aparmayıb".
   Məsələnin mahiyyətini biz də öz kanallarımız vasitəsilə araşdırdıq. "Futbol+Qol"a məlumat verən mənbə bildirdi ki, Şensoyun adı nə ilk, nə də son günədək mümkün namizədlər siyahısında yer alıb. Sadəcə, o, tanış azərbaycanlı menecerlərlə klub rəhbərliyinə yol tapmağa çalışıb. Hətta təklif edib ki, birinci ili ona müqavilə haqqı ödənilməsin, yalnız nəticə verərsə, maddi qarşılığı olsun. Şaferin Foqts tərəfindən gətirilməsinə gəlincə, bu da kökündən yanlış informasiyadır. Bizdə dəqiq məlumat var ki, əslində, millinin baş məşqçisi və AFFA-nın bəzi məsul şəxsləri onun "Bakı"ya təyinatının qəti əleyhinə çıxıb. Foqts keçiddən xəbər tutan kimi federasiyadakı adamlarıyla kluba mesaj göndərib ki, Şaferlə işbirliyi qurmasınlar. Onun barəsində mənfi danışıb. AFFA-nın vitse-prezidenti Elşad Nəsirov da olaya qarışıb. Şaferin özü də hər şeyi bilir. Maraqlıdır ki, o da Foqts barədə olduqca pis fikirdədir. Futbol qurumunun "Bakı"ya təzyiq göstərməyə çalışmasından bilgilənib. AFFA rəsmilərinin əl-ayağa düşməsinin yeganə səbəbi də bizə məlumdur. Birincisi, Kamerun yığmasının keçmiş çalışdırıcısı Bertinin əliylə bura gəlməyib. İkincisi, Foqts Almaniya yığmasıyla 1996-cı ildə Avropa çempionu olanda, o, ölkənin ən yaxşı məşqçisi seçilib ki, bu da həmyerlisinin yadından çıxmayıb. Və indi də hər vəchlə çalışır ki, qabağını kəssin. Üçüncüsü, Foqts və havadarları qorxur ki, Şafer "Bakı"da uğur qazanarsa, sabah millinin sükanı arxasına keçməyə namizədliyi gündəmə gələ bilər. Təsadüfi deyil ki, təyinatın üstündən 1 aya yaxın vaxt keçsə də, iki alman Azərbaycanda görüşməyib.
   

"Neftçi" dünən Avstriyada təlim-məşq toplanışın çərçivəsində üçüncü yoldaşlıq oyununda Rumıniyanın "Universitatea Cluj" komandası ilə qarşılaşıb. Görüş rumınların qələbəsi ilə başa çatıb - 1:0. İlk hissədə qapısında qol görən "Neftçi" ikinci hissəni tam üstünlüklə keçirsə də, qol şanslarından istifadə olunmayıb. Yoldaşlıq xarakteri daşıyan oyunda baş məşqçi Arif Əsədov gənc oyunçularla yanaşı, baxışda olan fransız futbolçu Traore Mussanı da sınaqdan keçirib. Təlim-məşq toplanışı iyulun 13-də başa çatacaq. Daha sonra hazırlığını Bakıda davam etdirəcək komanda "Qəbələ"nin təklifi ilə ayın 17-də bu komanda ilə yoldaşlıq görüşü keçirməyi planlaşdırır. İyulun 19-da isə "ağ-qaralar" Bakı-Ankara reysi ilə Türkiyəyə yola düşəcəklər. Bolu şəhərində məskunlaşacaq "Neftçi" qardaş ölkədə bir neçə yoldaşlıq görüşü keçirməyi nəzərdə tutur. Komanda üzvləri avqustun 1-də Bakıya dönərək Premyer Liqaya hazırlığı burada davam etdirəcəklər. "Neftçi"nin baş məşqçisi Arif Əsədov: "Bu toplanışda əsas məqsədimiz heyətdəki futbolçuların nəyə qadir olduqlarını yoxlamaqdır. Bunun üçün məhz güclü komandalarla qüvvəmizi sınamağı qərara almışıq. Gənc futbolçularımızın təcrübə qazanması baxımından, adlı-sanlı futbolçulara qarşı necə mübarizə aparmasını öyrənməsi çox vacib amildir. Artıq Avstriya toplanışından sonra ikinci təlim-məşq üçün yollanacağımız Türkiyədə heyətdə hansı futbolçuların yer alacağı məlum olacaq. Yəni, hazırkı toplanışdan çox şey asılıdır. Burada yoxlama görüşlərində özünü göstərmək üçün bütün futbolçulara şans verilir".
   Paytaxt təmsilçisinin makedoniyalı müdafiəçi Slavko Georgiyevski də bildirib ki, "Neftçi"nin heyətində ulduz ola biləcək xeyli sayda gənc futbolçu var: "Komandanın düşərgəsində az müddətdir olsam da, daxildə olan ab-havaya valeh olduğumu deməliyəm. Prezident başda olmaqla, klub rəhbərliyi, baş məşqçi Arif Əsədov kollektivdə əla atmosfer yaradıblar. Baş məşqçimiz bu gənclərə xüsusi önəm verir. Hazırda demək olar ki, yeni komanda qurulur. "Neftçi"nin xeyli sayda azarkeş ordusu olduğunu eşitmişəm. "Neftçi" böyük klubdur və biz çalışacağıq ki, öz oyunumuzla və qazandığımız nəticələrlə azarkeşlərimizi sevindirək. Artıq "Neftçi"ni seçməklə, doğru addım atdığımı gördüm". "Neftçi" Makedoniya yığmasının daha bir üzvünü transfer etmək istəyir. "Ağ-qaralar" tanınmış futbolçu İqor Mitrevski ilə maraqlanır. Milli komandasının kapitanı olan 31 yaşlı müdafiəçi bu ilin mayın 29-da Avstriyada keçirilən yoldaşlıq görüşündə (3:1) iştirak edib. Həmin oyunu stadiondan izləyən "Neftçi"nin baş məşqçisi Arif Əsədov yarımmüdafiəçi Slavko Georgiyevskini bəyənmiş və sonradan transfer reallaşmışdı. Mitrevski Moskva "Spartak"ında (2001-04, 120 oyun) ilə çıxışı ilə tanınaraq, Rusiya çempionluğu, kubokunu qazanıb. Almaniya bundesliqasında "Enerji" klubunun (2006-09, 75 oyun) şərəfini qoruyan makedoniyalı bu ildən Bolqarıstanda oynayır. İqor Sofiya MOİK-ində 4 oyun keçirib. Müdafiəçi 2001-ci ildən cəlb olunduğu yığmasında 62 oyuna 1 qol vurub.
   

"Qarabağ"ın vitse-prezidenti Tahir Gözəl: "Makedoniyada qələbə qazanmağı həm də ona görə istəyirdik ki, UEFA-nın reytinq cədvəlində Azərbaycanın aktivinə yeni xallar yazılsın. Vurduğumuz qol əla alındı. Bir ötürmə və zərbə - top qapıdadır! Komandamı dəstəkləmək üçün Şimali İrlandiyaya gedəcəm. Yaxşıdır ki, hazırda futbolçuların heç biri zədəli deyil. İndi sakit olmaq olar".
   "Metallurq"un baş məşqçisi Jikitsa Tasevski: "İlk oyundakı hesaba görə mərhələ keçmək şansımız möcüzəyə bağlı idi. Bununla belə hücumda oynamağı düşünürdük. Amma "Qarabağ" ağıllı oynadır, bizi demək olar, topsuz qoydu. Real qol şanslarımız da Bakıdakından çox olmadı. Azərbaycan təmsilçisi çox səviyyəli komandadır. Onlara növbəti mərhələdə uğurlar arzulayıram. Bu o deməkdir ki, Avroliqada "Qarabağ"a azarkeşlik edəcəm".
   "Qarabağ"ın baş məşqçisi Qurban Qurbanov: "Cütün qalibi olsaq da, həqiqətən "Metallurq" layiqli rəqib idi. Amma Bakıda bəxtləri gətirmədi. Biz isə cütün taleyini demək olar ki, ilk oyunda həll etmişdik. Rəqibin üstümüzə gələcəyini bilirdik. Bunun üçün əks-hücum taktikasını seçmişdik və bu, öz bəhrəsini verdi. Rəqibin isə sadəcə təcrübəsi yetmədi. Onlara daxili yarışlarda uğurlar arzulayıram".
   "Portadaun"un baş məşqçisi Ronni Makfoll: "Qarabağ" haqda hələ fikirləşmirik. Bu günlərdə ancaq "Skonto" üzərində qələbənin keyfini yaşayacağıq. Rəqibin Azərbaycan klubu olmasından başqa məlumatımız yoxdur. Avropada bir mərhələ keçməyin özü bizim üçün uğurdur. "Qarabağ"la oyun necə olacaq? Vaxtı gəlsin, bir şey fikirləşərik".
   "Qarabağ"ın lideri Rəşad Sadıqov: "Skopyedə bizə çətin olacağını bildiyimiz üçün oyunu müdafiədən təşkil etdik. "Metallurq"un irəli çıxmasını gözləyirdik ki, onları əks-hücumda tutaq. Hesabı açandan sonra qələbəni qorumağa çalışdıq. Makedonlar hesabı brəabərləşdirsə də, etapı keçdiyimizə görə çox da narahat olmadıq. Əsas birinci oyunu udmaq idi. 4:1 bizi psixoloji cəhətdən gərginlikdən qurtarmışdı. Səfər oyununadək bilirdik ki, nə edəcəyik. Qarşıdan çətin oyunlar gəlir. Hər rəqibə qarşığ güclü hazırlaşmalıyıq. Fərhad Vəliyev son iki matçda əla çıxış elədi, komandamızı dəfələrlə real qol vəziyyətindən qurtardı. "Portadaun" ciddi rəqibdir. Onlarla lap çətin olacaq. "Skonto"nu keçməklə öz səviyyələrini göstərdilər. Şimali irlandların stili fərqlidir. Britaniya komandaları adətən ingilis üslubunda oynayır. Hamımız belə bilirik. Hava mübarizəsində yaxşıdırlar, fiziki cəhətdən hündür və hazırlıqlı olurlar. Mən istənilən rəqiblə oyunda qabaqcadan favoritin Kim olduğunu demirəm. Bütün komandayla gücümüzü qoyacağıq ki, bu səddi də keçək. Hər şey meydanda bilinəcək".
   "Qarabağ"ın müdafiəçisi Maksim Medvedev: "Yaxşı oyun oldu. Meydanda gücümüzü qoyduq. Təbii ki, Bakıda qələbə qazandığımızı nəzərə alıb, müdafiədən oynadıq. Ümumi hesabda 5:1 öndə olmağımız bizi bir qədər arxayınlaşdırdı. Sona yaxın qol buraxdıq. Əsas odur ki, mərhələdə adladıq. "Portadaun" ilə qarşılaşacağıq. Səfərdə yaxşı oynayıb, Bakıya sərfəli nəticə ilə dönməliyik. Elə etməliyik ki, cavab qarşılaşmasında işimiz asan olsun".
   

"METALLURQ" (MAKEDONİYA) - "QARABAĞ" (AZƏRBAYCAN) 1:1 (0:0)
   8 iyul. Skopye. "Filip II Arena" adına Milli stadion. 2000 tamaşaçı
   Hakimlər: Andri Şandor, Vitali Ponomaryov, Viktor Kravçenko, Yuri Mozarovski (hamısı Ukrayna).
   Hakim-inspektor: Vladimir Hirinak (Slovakiya).
   UEFA nümayəndəsi: Karmelo Bartolo (Malta).
   Qollar: M.Krstev 79 // E.İmaməliyev 69.
   Birinci hissəyə 1, ikinci hissəyə 4 dəqiqə əlavə olunub.
   İlk oyun: 1:4
   "METALLURQ": 12.Nokov Trajhce, 5. İgor Kralevski, 28.Miroslav Vays (k), 22.Blaqoyse Damevski, 21.Mile Petovski, 4.Ertan Demiri, 11.Vasko Mitrov, 20.Mile Kristev, 10.Milan Djuriç (18.Bojan Mihayloviç 82), 8.Marko Kostençovski, 9.Jovan Kostovski (15.Marko Simonovski 75).
   Ehtiyatda olanlar: 25.Andrey Yefremov, 3.Qoran Boqdanovski, 6.Milan İliyevski, 19.Ninoslav Dodevski.
   Baş məşqçi: Jikitsa Tasevski.
   "QARABAĞ": 1.Fərhad Vəliyev (k), 2.Qara Qarayev, 4.Zaur Həşimov, 5.Maksim Medvedev, 6.Rəşad Sadiqov, 7.Namiq Yusifov (8.Aslan Kərimov 89), 10.Emin İmaməliyev, 13.Samir Abasov, 14.Rəşad Sadıqov, 22.Əfran İsmayılov (9.Elvin Məmmədov 86), 77.Georgİ Adamiya (17.Vüqar Nadirov 83).
   Ehtiyatda olanlar: 12.Sahil Kərimov, 3.Aftandil Hacıyev, 11.Rauf Əliyev, 23.Tural İsgəndərov.
   Baş məşqçi: Qurban Qurbanov.
   Avropa yarışında "Qarabağ" ölkəmizin üzünü ağ, "Xəzər-Lənkəran" isə qara etdi. İstər maddi imkan, istər şərait, istər heyət, istərsə də azarkeş baxımından rəqibindən üstün olan Lənkəran klubu daha bir rüsvayçı oyunu ilə yadda qaldı. Bu onu göstərdi ki, klubun sahibi Mübariz Mənsimovun pulları havaya sovrulub, Ağasəlim Mircavadov isə qocalıb. "Qarabağ" "Metallurq"u tam əritməklə istəyinə nail oldu. Özü də baş məşqçi Qurban Qurbanov səfər oyununda risk atmaqla məqsədinə çatdı. İlk qarşılaşma ilə müqayisədə kapitan Aslan Kərimov, eyni zamanda Elvin Məmmədov və Rauf Əliyev ehtiyatda saxlanıldı. Avroliqada 18 yaşlı Qara Qarayevə isə debüt etmək şansı verildi. "Qarabağ" hesabı açsa da, "Metallurq" bərabərlik qolunu vurmaqla növbəti məğlubiyyətdən qaça bildi. Amma bu komandamızın mərhələ adlamasına heç bir əngəl törətmədi. Ona görə ki, Azərbaycan klubu ilk oyunda məsələni həll etmişdi. İndi "Qarabağ" Avropa yarışlarında ciddi uğuru olmayan "Portadaun"u sıradan çıxarmalıdır. Azərbaycan klubu 86 yaşa malik Şimali İrlandiya komandasını da mübarizədən kənarlaşdırmağa borcludur. Bunun üçün "Qarabağ"ın kifayət qədər inamı, gücü və təcrübəsi var. Avroliqada növbəti rəqibi olan Şimali İrlandiyanın "Portadaun" klubu Azərbaycan futbol tarixinə düşdü. Komandalarımız 1994-cü ildən çıxış etdikləri avrokuboklarda heç vaxt bu ölkənin təmsilçisi ilə görüşməyib. Bu mənada ilk olan "Portadaun"u ağdamlıların ilk mərhələdə mübarizədən kənarlaşdırdığı Makedoniyanın "Metallurq" klubundan daha təcrübəli saymaq olar. Ən azı ona görə ki, Portadaun şəhərinin eyniadlı təmsilçisi avrokuboklarda debüt mövsümünü keçirmir. 1924-cü ildən yaradılan komandanın tarixi 1888-ci illərə gedib çıxır. "Portadaun" ötən əsrin sonlarından ölkəsinin ən güclülərindən olub. Belə ki, komanda həmin vaxt 4 dəfə (1989/90, 1990/91, 1995/96, 2001/02) çempionluq, üç dəfə (1990/91, 1998/99 2004/05) ölkə kubokunu qazanıb. İki dəfə - 1995/96 və 2008/09 mövsümündə ölkənin liqa kubokunun da qalibi olub. 2008-ci ildə Şimali İrlandiya futbolunda baş verən islahatlar nəticəsində köhnə liqaların əvəzinə "Premyerşhip" və "Çhampionship" yaradıldı. Ancaq "Portadaun" 2008/09 mövsümündə "Premyership"ə iştirak ərizəsini gecikdirdiyi üçün gücünə görə II divizionda - "Championship"də mübarizə apardı. Ötən mövsüm çempionatında 5-ci olan "Qarabağ"ın rəqibini Roy Makfol çalışdırır. Komanda ev oyunlarını 15 min azarkeş tutumuna malik "Şamrok Park" stadionunda keçirir. Əslində, 1996-cı ildən avrokuboklarda oynayan "Qarabağ" da ilk dəfə Böyük Britaniya təmsilçisi ilə görüşəcək. Şimali İrlandiya ilə yollarımız yalnız bir dəfə kəsişib ki, onda da yığmamız bu ölkənin millisi ilə DÇ-2006-nin seçmə mərhələsində bir qrupa düşmüşdü. Braziliyalı baş məşqçi Karlos Alberto Torres millimizlə ilk xalını məhz Şimali İrlandiya yığması ilə Bakıda rəsmi oyunda qazanıb - 0:0. Bir il sonra səfər oyununda isə artıq yığmamızın sükanı arxasında onu əvəzləyən Vaqif Sadıqov idi. Şimali İrlandiyada keçirilən görüş 0:2 hesablı məğlubiyyətimizlə nəticələnib. "Portadaun" I mərhələdə Latviyanın "Skonto" ilə evdə heç-heçə etmiş (1:1), səfərdə qazandığı qələbə hesabına (1:0) mərhələ keçib.
   "Qarabağ" britaniyalılarla ilk oyununu Şimali İrlandiyada keçirəcək. Ağdam təmsilçisi iyunun 21-də UEFA-nın Nyon şəhərindəki mənzil-qərargahında atılan püşkün nəticəsinə əsasən II mərhələdə də birinci görüşünü Bakıda keçirməli olsa da, bu, mümkün deyil. Həmin gün iyulun 15-də "Bakı" Avroliqanın II mərhələsində Tofiq Bəhramov adına Respublika stadionunda Çernoqoriyanın "Buduçnost" klubunu qəbul edəcək. Artıq xeyli müddətdir dəqiqləşən, hazırlıq görülən həmin oyunun zaman və məkanının dəyişdirilməsi qeyri-mümkündür. Çünki Avroliqada bütün oyunlar eyni gündə keçirilir. Bundan əlavə, ölkəmizi Çempionlar Liqasında təmsil edən "İnter" iyulun 13-də Polşanın "Lex" klubu ilə məhz Respublika stadionunda görüşəcək. Deməli, avrokuboklarda ev oyunlarını eyni stadionda keçirən "Qarabağ"la "Bakı"nın II mərhələdə ilk oyunlarını evdə keçirməsi alınmır. Belə olan halda, ən optimal variant "Qarabağ"ın "Portadaun"la ilk görüşünü rəqib meydanında keçirməsidir və UEFA-nın da belə qərar çıxaracağı gözlənilir. Hər halda belə vəziyyətlərdə məsələyə qarışan qitə futbol qurumu iki klubun razılığa əsasında yeri dəyişdirir. Necə ki, oxşar problem moldovalılarda olmuşdu və nəticədə "Olimpiya" "Xəzər-Lənkəran"la ilk oyununu püşklə nəzərdə tutulduğu kimi, səfərdə yox, evdə keçirdi. "Xəzər-Lənkəran" mübarizəni dayandırandan sonra Lənkərandakı mərkəzi stadion boşalıb. Ancaq "Bakı" ilə "Qarabağ"la UEFA-ya göndərdiklərini sifariş vərəqələrində Respublika stadionunu göstərib. Hazırda isə ölkəmizə iki arena - Respublika və Lənkəran stadionu UEFA-nın avrokubok oyunu keçirmək üçün lisenziyasına malikdir. "Portadaum" ilə qarşılaşacaq "Qarabağ"ın oyununun başlama saatı və keçiriləcəyi məkan dəqiqləşib. İyulun 15-də baş tutacaq oyun Bakı vaxtı ilə saat 23:45-də, Portadaun şəhərindəki 15 min tamaşaçı tutumuna malik "Şamrok Park" stadionunda keçiriləcək. Qarşılaşmanı izləmək istəyən böyüklər 10 avrosundan keçməli olacaq. Uşaqlar və qocalar üçün isə biletlər güzəştli qiymətlərlə satılacaq. Belələri bileti 6 avroya da əldə edə biləcək. Görüşü idarə edəcək hakimin də adı açıqlanıb. Avstriyadan olan Oliver Draxta ədaləti qoruyacaq. "Baş məşqçi Ronni MakFollsın qəhrəmanlarının latışlar üzərində qələbəni qeyd etməyə çox vaxtları yoxdur. İndi bütün diqqət qarşıdakı oyunlara yönəlib. Komandamız Azərbaycan klubu ilə matçda Latviya təmsilçisi üzərində uğurun təsadüfi olmadığını sübut etməlidir" - bu sözlər də rəqib klubun saytında yer alıb. "Qarabağ"ın direktoru Əmrah Çəlikəl vəziyyətin belə alınmasının onların əleyhinə işləyəcəyinə inanmır: "Adətən Avrokuboklarda ilk oyunu səfərdə keçirmək müsbət hesab olunur. Rəqib meydanında necə oynayacağını bilirsən. Birinci növbədə müdafiə və qol buraxmamaq barədə düşünürsən. Evdə keçiriləcək cavab görüşünədək oynadığın komandanı tam tanımaq olur. Bakıda yaranan stadion problemi bizə göprə olmadı. UEFA belə məsləhət bilibsə, lap yaxşı. Düzünü deyim ki, biz Şimali İrlandiyaya gedəcəyimizi gözləmirdik. Bütün işlərimizi Latviya üzərində qurmuşduq. "Skonto"nun Riqada uduzmasına təəccübləndik. Planımız beləydi ki, tezliklə ora öz nümayəndəmizi göndərək. "Portadaum" haqda hələ yetərincə bilgi toplamamışıq. Növbəti mərhələyə çıxıblarsa, "Skonto"dan güclü olarlar yəqin".
   Son iki mövsümdə şərəfini qoruduğu "İnter"i tərk edən Andrey Rubin Avroliqada oynayan "Qarabağ"a keçməyə üstünlük verdi. Düzdür, təcrübəli sol cinah yarımmüdafiəçisinin sözlərinə görə, hələ də keçidi baş tutmayıb və son danışıqlar üçün "İnter"in prezidenti Georgi Nikolovla "Qarabağ"ın Bakıya dönməsini gözləyir. Andrey uzun illər çıxış etdiyi "Skonto"ya qarşı oynaya bilməyəcəyinə görə üzülür: "Skonto"nun məğlubiyyəti mənim üçün gözlənilməz oldu. Mən "Qarabağ"a keçidimin tezliklə baş tutub, həmyerlilərimə qarşı oynamaq istəyirdim. Riqa təmsilçisinin zəif rəqibə yeniləcəyi inandırıcı görünmürdü. Deməzdim ki, həmin görüş prinsipial xarakter daşıyardı. Sadəcə, ilk klubum, futbola başladığım "Skonto" ilə görüş mənim üçün xüsusi bir oyun olardı. Ancaq iş elə gətirdi ki, keçmiş komandam "Portadaun"la bacarmadı. Riqadakı cavab görüşünü görməsəm də, oradakı dostlarım yazırlar ki, "Skonto" bütün oyun boyu hücum etsə də, qol vura bilməyib. Rəqib isə öz şansından istifadə edərək, qələbə topunu vurub. Futbolda belə də olur. Riqalılar hər iki oyunda tam üstünlüyünə malik olsa da, mərhələni keçən onlar olmadı". Rubin müqavilə bağlamağa hazırlaşdığı "Qarabağ"ı "Portadaun"la görüşdə favorit sayır. Onun fikrincə, şimali irlandiyalıların bəxt limiti tükənib: "Əslində, "Qarabağ"a "Skonto" da düşsəydi, keçmək şansı yüksək idi. Çünki "Qarabağ"ın heyəti güclüdür, yaxşı futbolçulara malikdir. Beynəlxalq təcrübəsi də böyükdür ki, bu da vacib amildir. Futbolda hər dəfə bəxti gətirməyəcək ki... Mən "Potradaun"un "Skonto"nu bəxt hesabına keçdiyini düşünürəm. Əlbəttə, "Qarabağ"ın yenə mərhələ keçmək şansı yüksəkdir. Komanda "Portadaun"u mütləq keçməlidir".