Almaniya millisinin dünya çempionatında iştirakdan son anda məhrum olan sabiq kapitanı Mixael Ballak komandanın düşərgəsindən qovulub. "The Sun" qəzetinin yazdığına əsasən, buna təcrübəli yarımmüdafiəçinin dünya çempionatında yığmanın hazırkı kapitanı Filip Lamla mübahisəsi səbəb olub. 33 yaşlı yarımmüdafiəçi mundialda zədə üzündən çıxış edə bilməyib. İyunun sonlarında İngiltərənin "Çelsi" klubundan Almaniya "Bayer"inə keçən Ballak yığmadakı komanda yoldaşlarını dəstəkləmək üçün ötən həftə Cənubi Afrika Respublikasına gəlib. Lakin iyulun 7-də İspaniya ilə vacib yarımfinal oyunu ərəfəsində o, Lamla mübahisə edib. Mübahisə Ballakın zədəsini sağaltmasından sonra kapitan sarğısının kimə qismət olacağı ilə bağlı olub. Lakin "Bavariya"da çıxış edən 26 yaşlı müdafiəçi ən azı növbəti mövsümün sonunadək millinin kapitanı sarğısı ilə vidalaşmaq niyyətində olmadığını söyləyib. Baş məşqçi Yoahim Löv da hazırkı kapitanın tərəfini saxlayıb. Ballaka isə Bundestimin məşq düşərgəsini tərk etməsi təklif olunub. O da bildirilir ki, veteran futbolçu İspaniya ilə yarımfinal qarşılaşmasında iştirak etməyəcək. Qeyd edək ki, Almaniya yığmasında 98 oyun keçirən Mixael Ballak 2004-cü ildə komandaya Yurgen Klinsmannın baş məşqçi təyinatından sonra kapitan seçilib. O vaxtdan Ballak millini 55 dəfə meydançaya çıxarıb. Filipp Lam isə cəmi 7 matçdır ki, kapitandır. Bunların cəmi 5-i dünya çempionatına təsadüf edib.

İspaniyanın qələbəsi bukmeyker kontoruna 5 milyon funt qazandırdı. "William Hill" bukmeyker kontoru dünya çempionatları tarixində ən iri pul qoyuluşu qeydə alıb. Lent.az-ın "İnterfaks"a istinadən verdiyi məlumata görə, azarkeşlərdən biri İspaniya ilə yarımfinal matçında Almaniyanın qələbəsinə 500 min avro pul qoyub. Amma Almaniya uduzduğu üçün, azarkeş pullarını itirib. Bundestimin qələbəsinə 80 min avro və 100 min avro da "atıblar". Nəticədə, 1:0 hesabı ilə qalib gələn İspaniya bukmeyker kontoruna bir oyundan 5 milyon funtdan artıq qazanc gətirib.

UEFA Çempionlar Liqası 2010/2011-ci illər mövsümü üçün I təsnifat mərhələsinə yekun vuruldu. Srağagun Çernoqoriyanın "Rudar" klubu San-Marino təmsilçisi "Tre Fiori"ni qəbul edib.
   Matç çernoqoriyalıların 4:1 hesablı qələbəsi ilə yekunlaşıb. "Rudar"ın heyətində Predraq Randyeloviç dubl edib, Nedelijko Vlahoviçlə İvika Yovanoviç hərəyə bir qol vurublar. San Marino klubunun yeganə qoluna isə Fabio Vannoni imza atıb. Qeyd edək ki, bu komandaların ilk oyununda "Rudar" səfərdə 3:0 hesablı qələbə qazanmışdı.
   I təsnifat mərhələsi. Cavab oyunu
   Rudar (Çernoqoriya) - Tre Fiori (San-Marino) 4:1
   Qollar: Predraq Randyeloviç, 7, 67, Nedelijko Vlahoviç, 83, İvika Yovanoviç, 85 - Fabio Vannoni, 29.
   İlk oyun - 3:0

Dünya səviyyəli klublarda bunun baş verməsi nadir haldı. Sən demə "Barselona"lı futbolçulara bir aydı maaş verilmirmiş. Son İspaniya çempionu maliyyə problemləriylə üzləşib və futbolçu və məşqçi heyətinə iyun ayının maaşını vermək gücündə deyil. İndi katalonlar kənardan kömək istəmək məcburiyyətindədi. Klubun yeni prezidenti Sandro Rosell müsahibə verərək, bütün borcları ödəmək üçün 125 milyon avro kredit götürmək məcburiyyətində olduqlarını deyib. Roselin sözlərinə görə, müdafiəçi Dmitri Çiqrinskinin "Şaxtyor"a satılmasının əsas səbəbi də məhz maliyyə çətinliyidi. "Mançester Siti"yə göndərilən Yaya Turenin gedişi də eyni səbəbdən baş verib. Buna baxmayaraq, klubun direktorlar şurası transferlər üçün məşqçilər heyətinə 50 milyon avro ayırmağa söz verib.

Dünyanın ən məşhur saytlarından biri olan beautifulpeople.com mundialın yaraşıqlı və eybəcər futbolçularını müəyyənləşdirib. 200 min insanın iştirak etdiyi səsvermə nəticəsində italiyalı Fabio Kannavaro ən yaraşıqlı futbolçu seçilib. Səsvermədə iştirak edənlər ikinci yerə Fernando Torres, üçüncü pilləyə isə David Vilyanı layiq görüblər. Dünya çempionatında iştirak edən ən eybəcər futbolçu isə ingilis Ueyn Runi seçilib. Sizə mundialda iştirak edən ən yaraşıqlı və eybəcər futbolçuların siyahısını təqim edirik:
   Ən yaraşıqlı futbolçular: Fabio Kannavaro (İtaliya), Fernando Torres (İspaniya), David Vilya (İspaniya), Lendon Donovan (ABŞ), Tyerri Anri (Fransa), Edinson Kavani (Uruqvay), Rikardo Kaka (Braziliya), Kriştianu Ronaldu (Portuqaliya), Didye Droqba (Fil Dişi Sahili), Keysuke Honda (Yaponiya).
   Ən eybəcər futbolçular: Ueyn Runi (İngiltərə), Frank Riberi (Fransa), Karlos Teves (Argentina), Vladimir Stoykoviç (Serbiya), Hüggel (İsveçrə), Ştrba (Slovakiya), Səifi (Əlcəzair), Çipperfild (Avstraliya), Con Terri (İngiltərə), Nelson (Yeni Zellandiya).

Dünya Çempionatının "Paul" adlı səkkizayaqlı ilbizi dünyanın ən məşhur canlılarından birinə çevirib. Rusiya mətbuatının yaydığı xəbərlərə görə, Almaniya millisinin oyunlarından əvvəl verdiyi "proqnoz"ların doğruluğu ilə məşhurlaşmış ilbiz İspaniyanın baş naziri Xose Luis Rodriges Sapaterodan dəstək alıb. Son yarımfinal qarşılaşmasında Almaniyanın İspaniya yığmasına uduzacağını "söyləyən" ilbiz almanların məğlubiyyəti ilə bir andaca "vətən xaininə" çevrilib. Bəzi alman azarkeşlər onu öldürməyin vacibliyini bildirir. Bütün bunlar İspaniya hökumətinin başçısında narahatlıq yaradıb. O, ilbizin mühafizəsinin təşkilini lazım bilir. "İlbizin taleyindən narahatam. Onun mühafizəsi üçün xüsusi komanda ayırmağı düşünürəm", - deyə Sapatero bildirib. İspaniyanın ətraf mühit və balıqçılıq naziri Yelena Espinosa isə bildirib ki, Avropanın nazirlər şurasının toplantısında məsələni qaldıracaq. O, nazirlərdən "Paul"un tutulmasının qadağan olunmasını istəyəcək.

İtaliya yığması və "İnter"in veteran qapıçısı Françesko Toldonun karyerasını başa vurmağa hazırlaşması ilə bağlı xəbəri diqqətinizə çatdırmışdıq. Təcrübəli əlcək sahibi bugünlərdə karyerasını başa vurduğunu rəsmən elan edib. Milan klubunun rəsmi saytında yayılan xəbərə görə, Toldo bundan sonra "İnter"in idarəetmə strukturunda işləmək istədiyini bildirib. 38 yaşlı qapıçı 2001-ci ildən "nerazzurrilər"in heyətində çıxış edir. O, ilk 4 mövsümdə komandanın əsas, Julio Sezarın gəlişindən sonra isə ehtiyat qapıçı olub. 2000-ci il dünya çempionatında o, İtaliya millisinin heyətində gümüş medal qazanıb. Həmin il Toldo "İtaliya Respublikası qarşısında xidmətlərinə görə" ordeni alıb.

DÇ-2010-da Almaniya yığmasının keçirdiyi oyunların hamısına düzgün proqnoz verən və artıq dünyanın ən məşhur səkkizayağına çevrilən Pol finalın proqnozunu da verib. Bu su heyvanı finalda İspaniyayla qarşılaşacaq Niderland yığmasının mundialı qazanacağını göstərib. Almaniya yığmasının hər iki məğlubiyyəti (Serbiya və İspaniya) və qələbələri haqda əvvəlcədən düzgün xəbər verən Pol, ispan futbol azarkeşlərini üzüb. Maraqlıdı, görəsən, səkkizayağın bu proqnozu da düz çıxacaqmı?
   Paraqvay çempion olmadı, Rikelme soyundu
   Paraqvaylı maneken Larissa Rikelme ölkəsinin futbol millisinin dünya çempionu olacağı təqdirdə soyunacağını açıqlamışdı. Paraqvay millisi 1/4 finalda məğlub olsa da, Larissa açıq-saçıq fotosessiyaya çəkilib. O, özünün Facebook-dakı səhifəsinə üç foto yerləşdirib. Amma bunlar hazır şəkillər deyil və yalnız fotosessiya çəkilişlərinə hazırlıq prosesindən görüntülərdir. Fotosessiyanın nə vaxt açıqlanacağı məlum deyil.