"Qalatasaray" klubu 5 əcnəbi futbolçu alacaq. Bu barədə klubun prezidenti Adnan Polad keçirdiyi mətbuat konfransında deyib: "Ehtiyacımız olan futbolçuları alacağıq. Onlardan 2-si ilə danışıqlar başa çatıb. İndiyədək 5 türk futbolçu almışıq. Amma onları yox sayırlar. Sanki heç transfer etməmişik. Onlar da yaxşı futbolçulardır. Bundan sonra 5 əcnəbi futbolçu ilə anlaşacağıq".
   Harri Küellin komandada qalmasını istədiklərini bildirən başqan avstraliyalı futbolçuya yeni təklif verdiklərini də açıqlayıb: "Küellin komandada qalmasını istəyirik. Amma xroniki zədəsi problemlər yaradır. Ona cüzi miqdarda qaranti pul və matç başına mükafat təklif etdik. Çünki zədəsi ciddi problemlər yaradır. İndi onun cavabını gözləyirik".
   Adnan Polad "Qalatasaray"ın hədəfində olan Miroslav Stokun "Fənərbağça"ya keçidinə də münasibət bildirib: "Stokun transferi bizim üçün önəmli deyil. Biz rəqiblərimizin transfer işlərini pozmağa çalışmadıq. Əminəm ki, rəqiblərimiz də bizdən ibrət götürəcək. İndiyədək kimsənin transfer çalışmasını əngəlləmədik. Amma bundan sonra ola bilər".
   "Qalatasaray"ın prezidenti Haldun Üstünəlin istefasına da aydınlıq gətirib: "Üstünəllə 4 ildir ki, çiyin-çiəyinə çalışırdıq. İnsanlar bəzən yorğunluqdan və ətrafdakı səhv yönləndirilməsindən yanlış qərarlar verə bilir. Haldun da məncə bir yorğunluq dönəmi keçirdi. Onun istefası doğru qərar deyildi. Mənim işim onu yenidən aktiv fəaliyyətlə məşğul olacağı vəzifəyə gətirməkdir. İnşallah tətilindən sonra onunla bir daha danışacam. Haldunun küskün olması, bizim də ondan incik olmağımız anlamına gəlməz. Bizi bura kimsə zorla gətirmədi. Burda da zorla qalmayacağıq. Bizim vəzifəmiz "Qalatasaray"lılar arasında davanı, küskünlüyü, incikliyi aradan qaldırmaqdır".
   

"Fənərbağça" klubu uruqvaylı futbolçu Diyeqo Luqanonu itirə bilər. Uruqvay yığmasının heyətində mundialda uğurlu oyun nümayiş etdirərək dünyada adından söz etdirən müdafiəçi Türkiyəyə dönmək istəmir. Luqano klubla bağlanmış müqavilədə "3,5 milyon avro ödəyərsə, istədiyi kluba transfer oluna bilər" bəndini əldə rəhbər tutaraq, anlaşmaya xitam vermək fikrindədir. Futbolçunun meneceri də müştərisinin İtaliya və İngiltərə klublarından təklif aldığını təsdiqləyib. 30 yaşlı futbolçu dünya çempionatı başa çatandan sonra "Fənərbağça" ilə bağlı yekun qərarını verəcək. Xatırladaq ki, Luqanonun kapitanı olduğu Uruqvay millisi dünya çempionatında bu gün Almaniya yığması ilə 3-cü yer uğrunda mübarizə aparacaq.

Bernd Şusterin baş məşqçi postuna gəlişi ilə "Beşikdaş" rəhbəri ulduz futbolçular alır. Rikardo Kuarejmanın ardından istanbullular "Real"ın transferə çıxardığı Quti Hernandeslə anlaşmaq üzrədirlər. İstanbul klubu hələ bir müddət bundan əvvəl ispaniyalı yarımmüdafiəçini düşərgəsinə qatmalı idi. Lakin futbolçu haqqında mətbuatda dolaşan xəbərlər klub rəhbərliyini fikrindən daşındırdı. Məlumatların təsdiqini tapmadığını görən "qara-qartallar" futbolçunun keçidində israrlığını ortaya qoydu. "Beşikdaş" rəhbərliyi Qutinin razılığını alaraq, yaxın günlərdə onun keçidini həll edəcək.

Miroslav Stoku heyətinə qatan "Fənərbağça" rəhbərliyi transfer bazarında sükuta son qoymaq istəyir. Xüsusilə də hücum xəttinin "dişsiz" olduğunu görən "sarı-lacıvədlilər" bu mövqeyini gücləndirməklə məşğuldur. KlasYan Hunteleaarı "Milan"dan qoparmaq istəyən türklər bui şin öhdəsindən gələ bilmədilər. Niderlandlı hücumçunun razılığınıala bilməyən "bülbüllər" indi də Ronaldinyoya göz dikiblər. 6-7 milyon qarşılığında üstəgəl reklamdan əldə olunan gəlirlə 15 milyon avro qarşılığında braziliyalı forvard türkiyədə oynamağa razıdır. Futbolçunun tranferə müsbət yanaşdığını görən "Fənərbağça" rəhbərliyi dərhal hərəkətə keçib. Belə ki, klubun nümayəndələri "Milan" rəhbərliyi ilə görüşüb braziliyalı futbolçunun keçidini yaxın günlərdə həll etmək istəyirlər. Ronaldinyo ilə yanaşı İstanbul nəhənginin transfer siyahısında Nilmark, Baptişta, Krasiç, Hazard və Trezege kimi məşhur simalar yer alır.

Ötən mövsüm uğurlu qrafik cızsa da, "Əskişəhərspor" son anda Avrokuboklara vəsiqə qazana bilmədi. Rza Çalınbayın başçılıq etdiyi komanda son turlarda xal itirməklə aşağı pillələrə yuvarlandı. Növbəti mövsüm qitəmiqyaslı turnirlərə vəsiqə qazanmağı qarşıya məqsəd qoyan əskişəhərlilər transfer siyaəsətində lazımınca yararlanmağa çalışırlar. Bunun müqabilində Anadolu təmsilçisi heyətini gücləndirir. Ötən gün "Əskişəhərspor" Portuqaliyanın "Porto" klubuna məxsus Vitor Pasoşla üçillik müqavilə bağlayıb. Son iki ili icarə əsasında İngiltərənin "Portsmut" və İspaniyanın "Valyadolid" komandalarında çıxış edən Pasoşun keçidi türklərə 1,8 milyon avroya başa gəlib. Pele ləqəbli futbolçunun təqdimat mərasimində "Əskişəhərspor" prezidenti Xəlil Ünal da iştirak edib. Bundan sonra klub rəhbəri transfer çalışmalarında işlərini davam etdiklərini açıqlayıb: "Pele ilə işimizi başa vurmaq istəmirik. Daha iki futbolçu var ki, onlarla da maraqlanırıq. "Beşikdaş"ın aparıcı üzvləri Zapatoçnı və Tellonu da heyətimizə qatmaqda maraqlıyıq. Yaxın günlərdə bu məsələyə də aydınlıq gələcək".

Superliqanı tərk etmiş "Dənizlispor" klubunun futbolçusu Süleyman Yula həbs olunub. Futbolçu ötən gecə Brüsseldən Əskişəhərə gələrkən saxlanılıb və polis şöbəsinə aparılıb. Bir müddət şöbədə saxlanılan qvineyalı hücumçudan izahat alandan sonra sərbəst buraxılıb. Yula "Əskişəhərspor"un baş məşqçisi Rıza Çalımbayı mətbuat vasitəsilə təhqir etməkdə ittiham olunur. O, 2009-2010 mövsümündə "Əskişəhərspor"da forma geyinib və qış fasiləsində "Dənizlispor"a transfer olunub.

Ötən mövsüm zədə ucbatından "Trabzonspor"a kömək edə bilməyən İbrahim Yaddara artıq məşqlərə tam gücü ilə başlayır. Qvineya yığmasının üzvü zədəli olduğu üçün uzun müddət yaşıl meydanlardan kənar qaldığını dilə gətirir. Hazırda kapitan sarğısını daşıyan İbrahim Yaddara növbəti mövsümdə iddialı olacaqlarını bəyan edib: "Ötən mövsümü kubokla başa vurduq. Cari mövsümdə isə çemponluq yaşamaq istəyirəm. Şenol Günəşin başçılığı altında komandanın bu vəzifənin öhdəsindən gəldiyinə inanıram. Ötən il demək olar ki, mövsümü zədəli keçirtdim. Belə də komandaya kömək edə bilmədim. Bu bəxtsiliyi unudub, artıq irəliyə baxıram. Növbəti mövsüm "Trabzon"un uğur qazanması üçün əlimdən gələni edəcəyəm.

"Yuventus" klubundan ayrılan hücumçu David Trezege Türkiyə klublarından təklif alıb. Fransalı futbolçunun meneceri bu haqda belə deyib: ""Valensiya" ilə danışıqlar davam edir. Bundan başqa Türkiyədən də bir rəsmi təklif almışıq. İndi bu təklifləri dəyərləndirməklə məşğuluq". Antonio Kaliondo Trezege ilə maraqlanan Türkiyə klubunun adını açıqlamayıb. Xatırladaq ki, David Trezege 2000-ci ildə Fransanın "Monako" klubundan "Yuventus"a transfer olunmuşdu.

"Qalatasaray" rəhbərliyi daha iki transfer reallaşdırıb. İstanbul təmsilçisi "Monako"dan kolumbiyalı Xuan Pablo Pino və "Sanderlend"dən Lorik Kana ilə müqavilə bağlayıb. Yığma üzvləri olan futbolçular "Cim Bom"un orta sahəsini və hücum xəttini gücləndirməlidir. 27 yaşlı Kana yarımmüdafiədə, 23 yaşlı Pino isə cinahlarda və hücum xəttində boşluqları aradan qaldırmalıdır. Uzun illər Fransada PSJ, "Marsel" kimi klublarda oynayan Kana Albaniya yığma komandasının aparıcı üzvlərindən biridir.