"XƏZƏR-LƏNKƏRAN" (AZƏRBAYCAN) - "OLİMPİYA" (MOLDOVA) 1:1 (0:1)
   Lənkəran. Şəhər stadionu. 10000 tamaşaçı
   Hakimlər: Vitali Sevostyanik, Vitali Malyutin, Sergey Quşa, Vadim Pançenko (hamısı Belarus).
   Hakim-inspektor: Burqnon İves (İsveçrə).
   UEFA nümayəndəsi: Hasan Ceylan (Türkiyə).
   Qollar: J.Jerom 13 // A.Lalin 77.
   Birinci hissəyə 1, ikinci hissəyə 5 dəqiqə əlavə olunub
   İlk oyun: 0:0
   "XƏZƏR-LƏNKƏRAN": 25.Kamran Ağayev (k), 3.Elvin Beqiri, 4.Elnur Allahverdiyev, 21.Radomir Todorov, 22.David İmedaşvili, 72.Devran Ayhan (18.Alim Qurbanov 58), 14.Rahid Əmirquliyev, 30.Mario Souza, 9.Zaur Ramazanov (20.Amid Hüseynov 64), 12.Allan Lalin, 15.Emeka Opara (10.Xaqani Məmmədov 67).
   Ehtiyatda qalanlar: 1.Dmitri Kramarenko, 7.Ruslan Poladov, 17.Asif Məmmədov, 55.Tural Cəlilov.
   Baş məşqçi: Ağasəlim Mircavadov.
   "OLİMPİYA": 12.Sergey Paşenko, 2.Cude Oqada, 5.Nikola Orlovski (k), 9.Georgi Ovsyannikov, 13.Jan-Robens Jerom (20.Yevgeni Xorolski 75), 14.Andrey Tkaçuk (6.Tomas Kouroma 90+2), 15.Aleksandr Keltuyale, 21.İbrahim Kamara (25.Oluvayummi Solide 85), 17.Mixail Paçesinyus, 18.Eduard Valyuta, 30.Culius Adaramola.
   Ehtiyatda qalanlar: 32.Mixail Payuş, 3.Viktor Verbetski, 4.Sergey Qusakov, 7.Maksim Repinetski.
   Baş məşqçi: Nikolay Bunya.
   İlk oyun 0:0 hesabı ilə başa çatdığından "Xəzər-Lənkəran" qələbə qazanmağa borclu idi. Cənub komandasını "Olimpiya" üzərində qalibiyyətə vadar edən əsas məqam bu komandanın tarixində ilk dəfə Avrokubok oyununu məhz Lənkəranda, doğma azarkeşlər önündə keçirməsiydi. Qələbə həm də ona görə vacib idi ki, təmsilçilərimiz indiyə qədər Moldova komandalarını məğlub edə bilmirdilər. Oyundan əvvəl uğursuzluq olacağı halda, klubun sahibi Mübariz Mənsimovun Ağasəlim Mircavadovu yola salacağı xəbəri yayılmışdı. Qarşılaşmaya gəlincə, matç başlayan kimi dərhal irəli atılan meydan sahibləri erkən qol vurmaq istəyində olduqlarını göstərdilər. Epizodlardan birində rəqibin cərimə meydançasının yaxınlığında Lalinə qarşı kobudluq edildiyindən "Xəzər-Lənkəran" cərimə zərbəsi vurmaq hüququ qazandı. İmedaşvilinin zərbəsi müdafiəçiyə dəyib qayıtsa da, Todorovun vurduğu top qapının üstündən keçdi. 10-cu dəqiqədə bu dəfə Rahid hədəfi düzgün nişan ala bilmədi. "Olimpiya" futbolçuları tədricən özlərinə gəldilər. 12-ci dəqiqədə Georginin zərbəsi müdafiəçinin ayağına dəyərək kənara çıxdı və künc ötürməsindən sonra isə Kamran topu yumruğu ilə uzaqlaşdıra bildi. Buna baxmayaraq, artıq 14-cü dəqiqədə Mircavadovun komandası ağır zərbə aldı. Adamarolanın ötürməsindən sonra Jan Robensin qol vurması meydan sahiblərinin işini düyünə saldı. Tezliklə hesab bərabərləşə bilərdi. Ancaq Lalin cərimə meydançasında topu qapıya vurmaq əvəzinə ötürmə verdi və bu, nəticəsiz qaldı. Bundan sonra mübarizə mərkəzdə getdi. 34-cü dəqiqədə meydan sahibləri rəqib qapısına ardıcıl bir neçə zərbə vursa da, qol vurulmasına imkan verilmədi. İlk hissənin sonuna kimi qonaqlar üstünlüyü qorumaqla fasiləyə rahat yollandılar.
   İkinci hissə fərqli məcrada keçdi. Bu yarıya "Olimpiya" hücumla başladı. Ancaq Georginin zərbəsi effektli olmadı. "Xəzər"in təzyiqləri nəticə vermirdi. "Olimpiya"nın oyunçuları əks-hücumlarda daha təhlükəli olsa da, bu imkanları boşa verirdilər. 57-ci dəqiqədə Beqiri yaxşı oynadığından hesab arasındakı fərq artmadı. Bundan sonra Alim Qurbanov mübarizəyə qoşuldu. 61-ci dəqiqədə yenə əks-hücum zamanı Georgi Kamranla üzbəüz qalsa da, istəyinə çatmadı. 64-cü dəqiqədə Amid Hüseynovla əvəzlənən Zaur Ramazanov azarkeşlər tərəfindən fitə basıldı və futbolçu birbaşa paltardəyişmə otağına yollandı. Bu dəqiqələrdə azarkeşlər Ağasəlim Mircavadovun istefasını tələb etdilər. Getdikcə təzyiqi artıran lənkəranlılar 78-ci dəqiqədə qol vura bildilər. Todorovun sağ cinahdan cərimə zərbəsindən otürdüyü topu Lalin başla tora göndərdi. Ancaq mərhələ keçmək üçün bir qol da lazım idi. Təmsilçimiz qələbə qolunu vurmaq üçün artıq bütün qüvvə ilə irəli atılmışdı. Bir epizodda İmedaşvili əlverişli mövqedən topu başla qapıya vura bilmədi. 89-cu dəqiqədə Amidin zərbəsini qapıçı çətinliklə dəf etdi. Hakimin əlavə etdiyi 5 dəqiqədə də heç nə edə bilməyən "Xəzər- Lənkəran" Avrokuboklarda mübarizəni dayandırmaq məcburiyyətində qaldı. Oyunun gedişində hiss olunurdu ki, əksər futbolçular qəsdən bütün gücləri ilə oynamırlar. Baş məşqçi Ağasəlim Mircavadov isə çıxış yolunu üzr istəmək və istefa verməkdə gördü: "Lənkəranlı azarkeşlərdən üzr istəyib istefa verirəm. Buranı heç vaxt yaddan çıxarmayacam. "Xəzər"də xoş günlərimiz çox olub...". "Olimpiya"nın baş məşqçisi Nikolay Bunya isə "Xəzər"in zəif oynadığını bəyan etdisə də, Lənkəran azarkeşləri isə Moldova klubunu alqışlarla yola saldılar...
   Zaur Ramazanovun da avrokuboklarda seriyası qırıldı. 34 yaşlı futbolçu qitə miqyaslı turnirdə ilk mövsümdə qol vura bilmədi. İndiyədək avrokuboklarda "Xəzər-Lənkəran"ın heyətində oynayan Ramazanov 4-cü mövsümünü keçirdi. O, 2005 və 2008-ci ildə UEFA kubokunda Moldovanın "Nistru" və Polşanın "Lex" klubuna səfərdə qol vurmuşdu. Zaur 2007-ci ildə Çempionlar Liqasında Zaqreb "Dinamo"su ilə Bakıdakı görüşdə də rəqib qapısına yol tapmışdı. Bu görüşlərin hər birində komandasının yeganə qoluna Ramazanov imza atıb. Açığı, 2 illik fasilədən sonra "Xəzər-Lənkəran"a qaytarılan Ramazanova böyük ümidlər bəslənilirdi. Ancaq bir ildən artıqdır qol vurmayan Zaurun formada olmamağı bir daha təsdiqləndi. "Olimpiya" sürətli hücumçunun avrokuboklarda seriyasını bitirdi. Avropanın əksər bukmeker kontorları isə "Xəzər-Lənkəran"ın qələbəsinə daha çox inanırmış. Türkiyənin ən böyük bukmeker analiz portalı hesab olunan bahisanaliz.com saytının xəbərinə görə, iyulun 8-də ən çox pul cənub təmsilçisinin qələbəsinə yatırılıb. Belə ki, avropalı bukmekerlər lənkəranlıların qələbəsinə 200 min avro pul qoyuluşu ediblər. Oyun günü "Xəzər-Lənkəran"ın qələbə əmsalı 1.60-dan 1.52-dək enmişdi.
   

"Xəzər-Lənkəran"nın və istefa verən baş məşqçisi Ağasəlim Mircavadovun avrokuboklarda qələbə həsrəti davam edir. 63 yaşlı mütəxəssis artıq 5 ildir qitə miqyasında qələbə qazana bilmir. Təcrübəli çalışdırıcı sonuncu dəfə 2005-ci ilin yayında - "Neftçi"ni çalışdırarkən Çempionlar Liqasının (ÇL) II təsnifat mərhələsində Bakıda Belçikanın "Anderlext" klubuna qalib gəlib - 1:0. Ancaq flaqman səfərdə ilk görüşdə 0:5 hesabı ilə uduzduğundan, mərhələ keçə bilməmişdi. ÇL-də Latviya "Skonto"sunu mübarizədən kənarlaşdırmaqla ilk mərhələ keçən (2000-ci ildə) məşqçimiz kimi tarixə düşən Mircavadov sonuncu dəfə elə həmin turnirdə "Neftçi" ilə növbəti mərhələyə adlayıb. "Xəzər-Lənkəran"ın avrokuboklarda son üç mövsümdə sükanı arxasında olan məşqçi ÇL-də Zaqreb "Dinamo"su (evdə 1:1, səfərdə 1:3), UEFA kubokunda Polşa "Lex"i (evdə 0:1, səfərdə 1:4), Avroliqada Moldova "Olimpiya"sı (səfərdə 0:0, evdə 1:1) ilə bacarmadı. "Xəzər-Lənkəran" avrokuboklarda keçirdiyi 8 oyunda nəinki mərhələ keçib, heç qələbə qazana bilməyib. Bu uğursuz seriya güclü olmayan rəqiblə görüşdə də davam etdi. Digər məqam növbəti dəfə avrokuboklarda uğursuz nəticədən dərhal sonra Mircavadovun istefa verməsidir. O, hələ "Şəmkir"i çalışdırdığı zaman 2001-ci ilin yayında ÇL-in I təsnifat mərhələsində Uelsin "Barri Taun" klubuna Bakıda 0:1 hesablı məğlubiyyətdən sonra postundan getdi və üç ildən artıq işsiz qaldı. Mircavadovun "Xəzər-Lənkəran"dan ilk gedişi yayda qitə miqyaslı turnirdə olmuşdu. Baş məşqçi iki il öncə "Lex"ə səfərdə böyük hesabla uduzandan sonra da istefa vermişdi. "Xəzər-Lənkəran" avrokuboklarda yoluna bir ildən sonra geri qaytardığı Mircavadovla davam etdi və yenə eyni ssenari təkrar olundu.
   Azərbaycan klubları üçün avrokuboklarda "Moldova kabusu" davam edir. Təmsilçilərimiz qitə miqyaslı turnirdə bu ölkənin komandalarına iki oyunun nəticəsinə əsasən həmişə uduzur. Bu uğursuz seriyanın əsası 5 il öncə "Xəzər-Lənkəran"ın "Nistru" ilə görüşündə qoyulub. Cənublular maddi imkanlarına görə xeyli üstün olduğu Ataki təmsilçisinə hər iki görüşdə uduzdu. "Xəzər-Lənkəran" həm bunun əvəzini çıxmaq, həm də Moldova sindromunu qıran ilk klub kimi tarixə düşmək üçün yaxşı fürsət əldə etmişdi. Ancaq... Klublarımız arasında moldovalılarla görüşdə ən yaxşı göstəriciyə "Bakı" imza atıb. Hər halda onlar "Daçiya"ya meydandakı mübarizə nəticəsində yox, oyun sonrası penalti zərbələri ilə uduzub. "Qarabağ" da "Bakı" kimi moldovalılarda oyunlarda əsas vaxtda 1:1 hesablı bərabərliyə qalıb. Ancaq ağdamlılar "Şəfa" stadionundakı cavab görüşündə əlavə vaxtda buraxdığı qolla yenilərək, mübarizəni dayandırdı. Fakt odur ki, klublarımız maddi imkanlarına görə Moldova təmsilçilərini qat-qat üstələsə də, uğursuzluğa düçar olur. Püşk hər dəfə onları bizə rəqib edəndə, istər-istəməz sindrom yada düşür. Əfsuslar olsun ki, bu, qırılmaq bilmir ki, bilmir və moldovalılar daim qələbəni bayram edir. "X-L"ın vitse-prezidenti Tuyqun Nadirov yaranmış durumla bağlı "Futbol+Qol"a bunları dedi: "Mən hələ Kişinyovda komandamızdan qələbə gözləyirdim. Orda heç-heçə olsa da, qətiyyən düşünmürdüm ki, öz meydanımızda bu şansı əldən verərik. Çox pis anlar keçirdik. "Olimpiya"nı asanlıqla udmaq olardı. "Nə çatışmadı" sualına mən cavab verə bilmərəm. Əlimizdəki heyət ki var, moldovanlardan azı 3 dəfə güclüdür. O cür futbolçularla birinci mərhələdən kənarda qalmaq... Ağasəlim Mircavadovun istefasını qəbul etməliydik. Çünki "Olimpiya"nı uda bilməyəndən sonra özü getmək qərarına gəldi. Klubumuzun rəhbərliyi komanda üçün ən ideal şəraiti yaratmışdı, mümkün olan hər şeyi etmişdi. "Olimpiya" bizə həsəd aparırdı ki, "Xəzər"in belə imkanı və şəraiti var. Futbolçuları cəzalandırmayacağıq. Onsuz da mərhələ keçə bilməmək və mükafatı itirmək onların ən böyük cəzasıdır".
   Ağasəlim Mircavadovun istefasından sonra baş məşqçisiz qalan "Xəzər-Lənkəran"a kimin rəhbərlik edəcəyi məlum olub. Klub rəhbərliyi vəzifənin icrasını Hafiz Əliyevə tapşırıb. Lakin qapıçılarla çalışan mütəxəssis komandaya müvəqqəti rəhbərlik edəcək. Yəni yeni baş məşqçi gələnədək. Əliyev 2008/09 mövsümünün birinci dövrəsinin son turunda Rasim Karanın istefasından sonra komandanı "Simurq"la oyuna çıxarıb və "ağ-yaşıllar" həmin dueldə məğlub olmayıb - 2:2. Nadirov boş qalmış posta təyinatla bağlı hələlik heç nə deyə bilməyəcəyini xatırlatdı: "Baş məşqçini müəyyənləşdirmək mənim səlahiyyətlərim çərçivəsində olan iş deyil. Bununla birbaşa fəxri prezidentimiz Mübariz Mənsimov və prezidentimiz Mais Mənsimov məşğul olur. Komanda bir həftəlik istirahətə buraxılıb. Yəqin ki, bu vaxt ərzində seçim edilər. İndidən kimin namizəd olacağını demək tezdir".

İyulun 15-də Türkiyəyə yollanacaq "Muğan" daha bir legionerlə yollarını ayırıb. Mövsüm başa çatandan sonra bosniyalı qapıçı Edik Kurtanoviç və burkina-fasolu Narsisse Yameoqonu düşərgədən uzaqlaşdıran salyanlılar bu dəfə Kabba Samuraya da qapını göstərib. Altı ay əvvəl Azərbaycana gələn hücumçu çempionatda cəmi 2 qol vurduğundan, rəhbərlik onunla əməkdaşlığa maraq göstərməyib. Bu günlərdə bosniyalı 32 yaşlı yarımmüdafiəçi İlya Prodanski ilə anlaşan aranlıların sıralarındakı futbolçuların sayı 22-yə çatıb. Artıq qapıçı problemi də həllini tapıb. "Standard"dan Anar Nəzirovu heyətinə qatan klub Ruslan Məcidova "get" deməyə hazırlaşır. "Olimpik-Şüvəlan"ın əvəzedici heyətindən gələn Toğrul Əhmədov da, çox güman ki, burda qərar tutmayacaq. "Muğan" rəhbərliyi Elşad Quliyevi əsas komandada Almir Hurtiçin köməkçisi təyin edəndən sonra əvəzedici heyətə yeni çalışdırıcı tələb edib. Ötən mövsümün ikinci dövrəsində "Rəvan"ın sükanı arxasında dayanan Vaqif Hidayətova bu post tapşırılıb. Son 6 ayda Quliyevin vəzifəsini icra edən Fuad Fərzəliyev isə komandanın rəisi təyin edilib. Bu vaxtadək həmin yerdə işləyən Vladislav Qədirov da "Rəvan"a yollanıb.

İlk iki yoxlama görüşündə MOİK-lə qolsuz bərabərə qalıb, Naxçıvan Dövlət Universitetinin komandasını 2:0 udan "Simurq" növbəti yoxlama görüşün keçirib. "Şəfa" stadionunda "İnter"in əvəzedici heyətini sınağa çəkən zaqatalalılar üstün gələn tərəf olub. Hər iki hissədə fərqli heyətlərin oynadığı və baş məşqçi Qyoko Hacıyevskinin ixtiyarında olan bütün futbolçuların xidmətlərindən istifadə etdiyi matç "sarı-qaralar"ın 2:0 hesablı qələbəsi ilə başa çatıb. Birinci hissədə komandanın kapitanı Rasim Ramaldanov, fasilədən sonra isə baxışda olan hücumçu Yasin Əliyev fərqlənib. Bu gün makedoniyalı başh məşqçi düşərgədə görmək istədiyi futbolçuların yekun siyahısını rəhbərliyə təqdim etməlidir. Hər halda prezident Zaur Məmmədovun ona verdiyi 3 günlük möhlət başa çatır. Ölkə xaricinə çıxmağa həvəs göstərməyən "quşçular"ın transfer strategiyası da dəyişib. "Kiçik qardaşı" olduğu "İnter"dən əvəzəedici heyətin futbolçularını sıralarına qatan "Simurq" legionerlərdən imtina edib. Ümumiyyətlə, maliyyə vəziyyəti pisləşdiyindən, klub 30-40 min dollardan bahalı oyunçu almır.

Ukraynalı mütəxəssis Yuri Panfilov "Xəzər-Lənkəran"dan getməyə hazırdır. O, ötən ilin yayından Lənkəranda çalışır. İndi isə cənub komandasının futbol akademiyasına rəhbərlik edən 49 yaşlı çalışdırıcı Moldova təmsilçisi "Olimpiya"nı Lənkəranda görəndə duyğulanıb. Çünki Panfilov vaxtilə "Olimpiya"nın sələfi olan Beltsının "Zarya" klubunun şərəfini qoruyub: "Xəzər-Lənkəran"la "Olimpiya" arasında qalmışam. Beltsıdakı futbol karyeramı yaxşı xatırlayıram. Moldovaya sevinclə qayıdardım. Bu ölkənin milli diviziya klublarından birinə rəhbərlik etmək istərdim".