Ali məktəblərə müsabiqədənkənar daxil olan 41 nəfər dünya və Avropa çempionunun siyahısı təsdiqlənib. APA-nın məlumatına görə, bu barədə Tələbə Qəbulu üzrə Dövlət Komissiyasının (TQDK) sədri Məleykə Abbaszadə keçirdiyi mətbuat konfransında bildirib. Onun sözlərinə görə, həmin şəxslər İdman və Bədən Tərbiyəsi Akademiyasına daxil olublar. Bundan əlavə, 6 nəfər Bakı Musiqi Akademiyasına daxil olmaq üçün tələb olunan qabiliyyət imtahanından azad edilib.
   

Azərbaycanı "Çelenc Cup"da təmsil edəcək "Azərreyl" üçün yeni idman kompleksi tikilir. Dərnəgül şosesində inşa edilən kompleksin tikintisini italiyalı memarlar həyata keçirir. Burada istifadə olunan bütün voleybol avadanlıqları isə ən qabaqcıl şirkətlərdən gətirilib. Yeni Voleybol İdman Kompleksinin növbəti mövsümün açılışında istifadəyə verilməsi gözlənilir. Azərbaycan Super Liqasında mübarizə aparan "Lokomotiv" və "İqtisadçı"nın bazası var. "Rabitə"nin isə tezliklə onlara qoşulacağı gözlənilir. Son mövsümü "Əczaçıbaşı" klubunda keçirən Türkiyə yığmasının sabiq üzvü Natalya Hanıkoğlu da karyerasını Azərbaycanda davam etdirəcək. Qardaş ölkənin milliləşdirilmiş voleybolçusu "Azərreyl"lə 1 illik müqavilə imzalayıb. "Bebi" ləqəbli Hanıkoğlu Türkiyə ilə yanaşı, Rusiya yığmasının da şərəfini qoruyub. 1975-ci il təvəllüdlü Natalya 190 sm boya malikdir. Dəfələrlə Azərbaycan millisinə qarşı oynamış Hanıkoğlu voleybola 8 yaşında başlayıb. Rusiyada MOİK və "Odinçova", İtaliyada "Ankona", Türkiyədə "Kocelispor" və "Əczaçıbaşı" klublarının şərəfini qoruyub. Türkiyə gələnədək Rusiya millisində qüvvəsini sınasa da, Hakan Hanıkoğlu ilə ailə qurduqdan sonra "ay-ulduzlu" yığmanın uğurları üçün çalışıb. "Azərreyl" Natalya Hanıkoğludan öncə Polina Rəhimova, Valeriya Korotenko, Aynur Kərimova və Şəfəq Kərimova ilə də müqavilə imzalayıb. Son mövsümdə türkiyəli mütəxəssis Adnan Kistakın çalışdırdığı komanda "Çağırış kuboku"nda Maltanın PAOLA Hibs klubu ilə qarşılaşacaq.

Cüdo üzrə milli komandanın aparıcı üzvləri iyulun 10-da İspaniyanın Barselona şəhəri yaxınlığındakı Kasteldefels əyalətinə təlim-məşq toplantısına yollanacaq. Bu haqda yığmamızın baş məşqçisi Ağayar Axundzadə məlumat verib. Onun sözlərinə görə, Avropa Cüdo İttifaqının təşkil etdiyi hazırlıq prosesində öncədən 6 idmançının iştirakı nəzərdə tutulsa da, sonradan onların 2-sinə viza almaqda gecikiblər. Bu səbəbdən, Barselonaya 2008-ci il Pekin Yay Olimpiya Oyunlarının qalibi Elnur Məmmədli (81 kq), dünya və Avropa çempionatlarının mükafatçıları Elxan Məmmədov (90 kq), Kifayət Qasımova (57 kq) və Ramilə Usubova (63 kq) aparılacaq. Bir həftə davam edəcək toplanış 9 - 13 sentyabrda Yaponiyanın paytaxtı Tokioda təşkil olunacaq dünya çempionatına hazırlıq xarakteri daşıyacaq. Elnur Məmmədli dizindən zədələndiyi üçün 3-4 iyulda Rusiyanın paytaxtı Moskvada keçirilmiş "Böyük dəbilqə" turnirində iştirak edə bilməyib.

Bakı Apelyasiya Məhkəməsində dələduzluqda təqsirləndirilən qaydasız döyüş üzrə Avropa çempionatının mükafatçısı Azad Məmmədovun barəsində olan hökmdən verilən apelyasiya şikayəti üzrə məhkəmənin hazırlıq iclası keçirilib. Məhkəmədən verilən məlumata görə, A.Məmmədovun apelyasiya şikayəti üzrə məhkəmə baxışı iyulun 13-nə təyin olunub. Ağır Cinayətlərə Dair İşlər üzrə Məhkəmənin 18 mart 2010-cu il tarixli hökmü ilə Azad Məmmədov 10 il müddətinə azadlıqdan məhrum edilib. İttihama görə, A. Məmmədov Şəkilə Zeynalovanın 26 500, Gülnarə Yusifovanın 75 min və Sahibə Həsənovanın 22 min ABŞ dollarını alaraq mənimsəyib. O, 2009-cu il aprelin 14-də Şəki rayonunun Qoxmuq kəndində Daxili İşlər Nazirliyi Baş Mütəşəkkil Cinayətkarlıqla Mübarizə İdarəsinin və Şəki Rayon Polis Şöbəsinin əməkdaşları tərəfindən saxlanıb. Məmmədovun Qoxmuq kəndində yerləşən evində axtarış aparılan zaman evdən bir ədəd "Vinçester" tipli silah, bir ədəd "Tir" tüfəngi və qaz tapançası aşkar edilərək götürülüb. Məmmədov Azərbaycan Respublikası Cinayət Məcəlləsinin 178.3.2-ci (dələduzluq külli miqdarda törədildikdə) maddəsi ilə ittiham olunub. O 1999-cu ildə Rusiyada keçirilmiş qaydasız döyüş üzrə Avropa çempionatının gümüş mükafatçısı olub.

Əməkdar məşqçi Əbülfəz Əliyevin xatirəsinə həsr olunmuş yeniyetmələr, gənclər və kişilər arasında sambo üzrə Azərbaycan Kuboku uğrunda yarışa start verilib. Mübarizəyə gənc samboçular qoşulublar. On çəki dərəcəsində keçirilmiş yarışda Kənan Bünyadov (48 kq), Elmar Fərzəliyev (52 kq), Pərviz Şükürov (56 kq), Musa Xəlilli (60 kq), Zaur Babayev (65 kq), Seyran Mahmudov (70 kq), Nəsib Əmrahov (75 kq), Hikmət Alışov (81 kq), Amil Məmmədli (87 kq) və Andrey Fətiyev (+87 kq) qızıl medal qazanıb. Yarışın yeniyetmələr və gənclər arasındakı qalibləri Gürcüstanda keçiriləcək dünya birinciliyinə, kişilər isə Özbəkistanda təşkil olunacaq dünya çempionatına vəsiqə qazanacaqlar.

Rusiyanın paytaxtı Moskva şəhərində keşirilən V beynəlxalq Vladimir Dvorkoviç kuboku turnirində sona 1 tur qalmış Azərbaycan komandası aktivindəki 12 xalla turnir cədvəlində 4-5-ci pillələri bölüşdürür. Komandamız Ukrayna ilə keçirdiyi ilk görüşdə 0.5-3.5 hesabı ilə məğlub olsa da cavab qarşılaşmasını sülhlə başa vura bilib-2-2. Turnir cədvəlinn lideri Çinlə ilk matçda da 0.5-3.5 hesablı məğlubiyyət və cavab oyununda isə heç-heçə qeydə alınıb-2-2. Dünən keçirilən qarşılaşmada isə komandamız turnirin həsr olunduğu və Vladimir Dvorkoviç adını daşıyan komanda ilə üzə-üzə gəlib. İlk oyun təmsilçilərimizin 1-3 hesablı məğlubiyyəti ilə başa çatıb. Lakin cavab görüşünün yenidən 2-2 hesabı ilə bitməsi komandamızın ev sahibləri Rusiya komandası ilə eyni xala sahib olmasına gətirib çıxarıb (12 xal). Növbəti dəfə isə Azərbaycan sonuncu görüşünü 8 xala malik Belarus təmsilçisi ilə keçirib. İlk qarşılaşmada həmyerlilərimiz 1.5-2.5 hesabı ilə məğlub olublar. Tunirin reqlamentinə əsasən hər gün 2 oyun keçirilir. Belə ki, eyni gündə eyni rəqiblər müxtəlif rənglərdə qarşılaşırlar. Turnirin baş hakimi Azərbaycan Şahmat Federasiyasının vitse-prezidenti, beynəlxalq hakim Faiq Həsənovdur.

Olimpiya və dünyda rekordçusu yamaykalı idmançı Usein Bolt indi də başqa növlərdə özünü sınamaq istəyir. Beynəlxalq yarışda iştirak etmək üçün İsveçrənin Poznan şəhərdində olan atlet London Olimpiadasında 100 və 200 metr məsafəyə qaçış yarışlarında yenə birinci olsa azarkeşlərinin ondan bezəcəyini bildirib. Buna görə atletikanın digər növlərinə üz tutacağını deyən U.Bolt uzunluğa tullanma və digər yarışlara da qatıla biləcəyini vurğulayıb.

Şahmatçı Şəhriyar Məmmədyarovla Xarici İşlər Nazirliyinin və Azərbaycan NATO Beynəlxalq Məktəbinin (NİSA) birgə təşkilatçılığı ilə Bakıda "Maliyyə təhlükəsizliyi" mövzusunda sessiyanın iştirakçıları arasında şahmat oyunu keçirilib. Qarşılaşma "Crescent Beach" otelinda başa tutub. 6 nəfərə seans oyunu verən şahmatçı hamısında qalib gəlib. Nəzərinizə çatdıraq ki, sessiyada NATO-ya üzv və tərəfdaş ölkələrin diplomatları və maliyyə təhlükəsizliyi sahəsində tədqiqatçıları iştirak ediblər.
   

16 yaşadək futbolçulardan ibarət milli Almaniyada keçirilən turnirdəki çıxışını başa vurub. Duysburq şəhərində 22 komandanın iştirak etdiyi turnir Təbriz Həsənovun yetirmələrinin məğlubiyyəti ilə başa çatıb. Futbolçularımız Mittelreyn yığması ilə qarşılaşmada 0:1 hesabı ilə uduzub. Yarışa ardıcıl 2 qələbə ilə başlayan millimiz son iki görüşdə eyni hesabla uduzduqdan sonra turnir cədvəlində 8-ci pilləyə enib. Turnirin qalibi isə Vestfalen yığması olub. Onlar yalnız top fərqində ikinci olan Mittelreyni qabaqlayıb. Komandamızı III turda məğlub edən Nidersahen isə Vestfalenə uduzmaqla, zirvəni III yerə dəyişib. Bu isə o deməkdir ki, komandamız turnirdə yalnız II və III yerin sahiblərinə uduzub.
   ***
   Çimərlik futbolu üzrə yığmanın Avropa Liqasının final mərhələsində rəqiblərindən ikisi məlumdur. Emil Cabbarovun baş məşqçisi olduğu komanda Macarıstan və İsrail yığmaları ilə görüşəcək. Sonuncu, 3-cü rəqibin adı bu ayın sonunda məlum olacaq. Millimiz birinci mərhələdə Çexiyanı 5:4, Hollandiyanı 7:4 hesabı ilə yenərək, qrup qalibi kimi final mərhələsinə vəsiqə qazanıb.
   ***
   Qadın futbolçulardan ibarət yığma dünya çempionatının seçmə mərhələsi çərçivəsində son oyununu avqustun 25-də Çexiya millisinə qarşı keçirəcək. Artıq oyunun baş tutacağı arenanın adı dəqiqləşib. Millimiz qrup mərhələsinə Çexiyanın Horni Poçerniçe şəhərində yerləşən "Horni Poçerniçe" stadionunda yekun vuracaq. Bu komandalar arasında martda Bakıda keçirilən oyunda Çexiya futbolçuları 5:0 hesabı ilə qələbə qazanıb.
   ***
   AFFA ilə Regional Futbol Federasiyalarının birgə təşkilatçılığı ilə 15 yaşadək futbolçular arasında keçirilən "Region kuboku"nun Şimal regionunda IV turun oyunları başa çatıb. Nəticələri diqqətinizə çatdırırıq: "Şahdağ" (Qusar) - "Çıraqqala" (Şabran) 10:1, "Quba OK" (Quba)- "UGİM-1 (Sumqayıt) 6:0, "Babək" (Sumqayıt) - "Abşeron" (Abşeron) 6:1, "Siyəzən" (Siyəzən) - "Xaçmaz" (Xaçmaz) 3:0.
   ***
   "Şəfa" stadionunda 1995-1996-cı il təvəllüdlü və digər yaş qruplarına daxil olan qızlar üçün seleksiya günü keçirilib. Seleksiya prosesində 38 nəfər iştirak edib. Daha sonra qızlardan ibarət U-15 yığma komandasının baş məşqçisi Sissi Rayt fikirlərini açıqlayıb: "Seleksiya prosesində iştirak edən qızların 6 nəfəri 15 yaşdan yuxarı idi. Qalan 32 nəfər bizə lazım olan təvəllüdlü qızlar idi. Onlardan 5-6 nəfəri yığma komanda üçün yararlıdır. Həmin qızları qarşıdakı təlim-məşq toplanışına dəvət edəcəyik. Bir sözlə, milli komandanın formalaşması üçün bu cür seleksiyaların əhəmiyyətini yüksək qiymətləndirməklə regionlarda da keçirilməsini nəzərdə tutmuşuq".
   

Yunanıstanın Korfu adasında yeniyetmə və gənclərin 3-cü Dünya Kuboku yarışına yollanan karateçilərimiz vətənə 4 mükafatla dönüblər. Azərbaycan Milli Karate Federasiyasının mətbuat xidmətindən verilən məlumata əsasən, Avstraliya, İran, İordaniya kimi dövlətlərlə birgə daha 17 ölkədən 200-dən artıq idmançının qatıldığı nüfuzlu yarışda Milli Karate Federasiyasının prezidenti Yaşar Bəşirovun rəhbərliyi altında 11 karateçimiz iştirak edib. Onlardan İlahə Qasımova (-59 kq) qızıl medala, Sura Fərəcli (-53 kq) gümüş mükafata sahib olub. Fərəcli 1-ci yer uğrunda avstarliyalı rəqibinə 0-1 hesabı ilə uduzub. Bu nəticə qızlar arasında beynəlxalq yarışlarda ilk ən yüksək göstəricidir. Bürünc medallara kumitedə Tural Kamallı (-70 kq), kata nümayişində isə Tural Balcanlı layiq görülüb. Medal qazanmaq şansı yüksək olan digər idmançılarımızdan Fəridə Abiyeva (+54 kq) 7 xal fərqi ilə üstün olsa da, rəqibi ciddi zədələdiyindən onun nəticəsi ləğv edilib. Tural Ağalarzadə (-68 kq) isə bürünc mükafat uğrunda yerli idmançı ilə görüşdə hakimlərin qərəzli qərarı ilə məğlub olub. Hər dəfə nəticələrini yüksəldən karateçilərimiz iki ildir, dalbadal keçirilən Dünya Kuboku yarışlarından medallarla dönürlər. Bu dəfəki turnirin əsas diqqətçəkən cəhəti isə artıq qızların da yüksək əyarlı mükafatlara sahib olmasıdır. WKF-in baş katibi Corc Yeralimpusun təşkil etdiyi Dünya Kuboku yarışından əvvəl Ümumdünya Karate Federasiyasının (WKF) təlimatçıları fransız Klaud Petinella, ispan Xose Qarsiya və italiyalı Roberto Soderonun rəhbərliyi ilə 3 gün ərzində 6 dəfə təşkil edilən beynəlxalq təlim-məşqlərdə idmançılarımız da iştirak ediblər. Hakimlərimizdən beynəlxalq dərəcəli Cahangir Babayev, Mircabar Seyidov və Nərgiz Mehdiyeva isə yarışı idarə edənlər arasında olublar.

Ukraynanın Berdiçev şəhərində Olimpiya çempionu Vladimir Kliçkonun mükafatları uğrunda gənclər arasında boks üzrə 12-ci Beynəlxalq turnir keçirilib. Turnirdə 12 ölkədən 74 idmançı iştirak edib. Azərbaycan yığmasının üzvləri Salman Əlizadə (48 kq) və Şaban Şahpələngov (51kq) qızıl medal qazanıblar. Elvin İsayev 60 kq çəki dərəcəsində gümüş medala, Coşqun Əliyev isə 64 kq çəki dərəcəsində bürünc medala sahib olublar. Azərbaycan yığması ümumi komanda hesabında ikinci yeri tutub.