Səhər saatları idi. Hamılıqla, daha doğrusu, dəvət alanlarla birgə hava limanına yollanırdıq. Məqsədimiz şələ-şüləmizlə birgə səfərə çıxmaq idi. İstiqamət Avropada qaraşıların mərkəzi şəhəri kimi tanınan Buxarest idi. Hava limanından havalandıq və Rumınıya paytaxtına problemsiz yetişdikE
   Bəli, yalnış duymadız, belə sərsəm söhbəti yalnız havalanmış insanlar edər. "Xəzər-Lənkəran"a hamılıqla təşəkkür etməliyik ki, havada olmasaq belə, hamımızı havalandırdı. Şarı şişirdib göyə buraxanda, çatısını qıranlar yerindən necə götürülürsə, "Xəzər-Lənkəran"ın sayəsində ağlımızı itirib bizlər də götürləndik.
   Artıq "Xəzər-Lənkəran"ın adı belə insanın dəli olmasına yetir. Sağ olsunlar, xalqı ruhlandırdılar. Onlara diri ikən ölü olmağı öyrətdilər. Minnətdar olmalıyıq. Azı ona görə ki, bizə faciə janrında əsər yazmağın sirrini aşıladılar.
   Oyun haqda danışmayacam. Danışılası bir şey yoxdu. Oyun görsəydimE "Xəzər-Lənkəran" möhtəşəm komandadı. Ona görə ki, yalnız bu komandada təxminən ard-arda 10 oyun qələbə üzü görməyən mütəxəssis çalışa bilərdi. Çalışdı da. Kamil insan ya işi tamamlar, ya da zibilini çıxarar. Ağasəlim Mircavadovun sayəsində kamilliyin pik nöqtəsini gördük.
   İnsanlar adını tarixə həkk etdirmək üçün ya qəhrəmanlıq edər, döyüşdə 20-30 nəfəri, yaxud 2000-3000 nəfəri məhv edər, ya da kamikadzelik edib məscid, kilsə və ya sinaqoq partladar. Mircavadov superqəhrəmanlıq edərək, 8 milyonu "xoşbəxt" etdi. Etdi və "işdən çıxıram" deyib getdi. Bravo! Gedəndə də belə gedəsən. "Olimpiya" kimdi, nəçidi? Bilmirəm. Bildiyim bircə odu ki, təmsil etdiyi Beltinin əhalisini Mübariz bəyin ən balaca gəmisinə rahatca sığdırmaq olar. "Olimpiya"nı ən yaxşı halda Azərbaycanda heç nə ilə müqayisə etmək olar. Bəli, yanlış duymadız, Cənub təmsilçisi həmin o heç nəyə uduzdu. Uduzdu və Azərbaycan adlı ölkənin boynunu yerə soxdu. Artıq dəvəquşuna bənzəyirik, deyilmi?
   "Olimpiya"dan sonra Buxarest "Dinamo"sunu bədbəxt etməli idik. Yaxşı ki, rumınlarla qarşılaşmadıq. Rəsmi Buxarestlə möhtəşəm əlaqələrimizi korlamaqdansa, kor qalmağımız daha məqsədəuyğun idi. Təşəkkürlər, "Xəzər-Lənkəran"! Təşəkkürlər, Ağasəlim Mircavadov!
   Deyir, o vaxt çoban padşaha deyib ki, darıxma, səninlə mənim aramda 11 ay 29 gü vaxt qalıb. Ötən yay eyni şeyi mən də düşünürdüm. Düşünürdüm ki, Mircavadovla jurnalistlərin arasında uzağı bir ildən bir gün az vaxt qalıb. "Pirr mənimdi, fərasətinə bəlliyəm". Ağaya halaldı, imkan vermədi diaqnozum səhv çıxsın. Mənim səhv çıxmağımdansa, özünün işdən çıxmağını üstün tutdu. Tam əminliklə deyə bilərəm ki, "Xəzər-Lənkəran" Avroliqada birillik istirahətə çıxdı, Mircavadov isə karyerasında. İstisna etmirəm ki, Ağasəlim müəllimin istirahət müddəti ömürillik də ola bilər. Yoluna quzu kəsdiyim bütün yollarını kəsib. Bacarır da!
   Yaxşı yadımdadı, Tuyqun Nadirov iddia etmişdi ki, "Xəzər-Lənkəran" Azərbaycanda Mircavadovdan güclü məşqçi tanımır. Əgər Mircavadov Cənub təmsilçisini yarıtmadısa, deməli, komandanın sükanı arxasında əcnəbi əyləşdirməyin məqamıdı. Əks təqdirdə, "Xəzər-Lənkəran" daha acınacaqlı duruma düşəcək.
   
   Avropa Liqasının ilk təsnifat mərhələsində "Xəzər-Lənkəran"ın mübarizəni dayandırması rumınların sevincinə səbəb olub. Moldovanın "Olimpiya"sını kənarlaşdıra bilsəydilər, 18 dəfə Rumıniya çempionu, 12 dəfə ölkə kubokunun qalibi "Dinamo"nu ölkəmizə gətirəcəkdi. 1956-cı ildən Avrokuboklarda çıxış edən Buxarest təmsilçisi Çempionlar Kuboku (1983-1984-cü il mövsümü) və Kuboklar Kubokunun (1989-1990-cı il mövsümü) yarımfinalında oynayıb. Rumıniya mətbuatı "Dinamo"nun varlı klub "Xəzər-Lənkəran"la üzləşməyəcəyi xəbərini sevinclə qarşılayıb. Buxarets komandasının baş məşqçisi İoan Andone ilk təsnifat mərhələsinin oyunları ərəfəsində açıqlamasında Lənkəran təmsilçisindən çəkindiklərini bəyan etmişdi. Mütəxəssis Azərbaycanda hava şəraitinin isti olmasını, futbolumuza bələd olmadıqlarını bildirmişdi. "Dinamo" nümayəndələri "Olimpiya"nın "Xəzər"lə hər iki oyununu izləyib və rəqibinin zəif tərəflərini yaxşı bilir. İ.Andone Moldova səddini keçəcəklərini əmindir. Azərbaycan klubu ilə müqayisədə Rumıniya komandalarının texnikalı, ağıllı, sürətli oyun göstərdiyi, həmçinin topa nəzarət və taktika baxımından fərqləndiyi qeyd olunub. "Dinamo"nun əsas iki silahı var. Klaudiu Nikulesku Avrokuboklarda 46 oyunda 18, Marius Nikulae 22 qarşılaşmada 12 qol vurub. "Qırmızı köpəklər" ilk oyunu Moldovada keçirəcəklər və matça bir gün qalmış səfərə çıxacaqlar. 500 fanatla birgə.
   "Olimpiya" ilə matçdan sonra istefaya gedən Ağasəlim Mircavadovun "Xəzər-Lənkəran"da yeri boş qalıb. Komanda istirahətdən bu həftəsonu geri qayıdacaq və onadək, yəqin ki, yeni baş məşqçinin kimliyi bəlli olmalıdır. Hazırda bir çox mütəxəssislər var ki, onların adı klubla yanaşı hallanır. Bir ay əvvəl "Simurq"la anlaşan Qyoko Hacıyevskini misal çəkə bilərik. "Karvan"ı tərk edən Yunis Hüseynovla "Bakılı"nın sabiq çalışdırıcısı Nadir Qasımovun da keçidindən söhbət açılır. Hələlik komanda qapıçılarla işləyən məşqçi Hafiz Əliyevə tapşırılıb. Vitse-prezident Tuyqun Nadirovun sözlərinə görə isə hələ ki, axtarışlar davam edir: "Baş məşqçinin istefası bizim üçün gözlənilməz oldu. Ona görə hələ heç bir namizəd yoxdu. Klub prezidenti səviyyəsində axtarışı davam etdiririk. Bu işdə tələsmək lazım deyil. Təcrübəli və səviyyəli məşqçi tapmaq firkimiz var. Tapacağımız məşqçi yerli də ola bilər, əcnəbi də. Amma hələ namizəd yoxdur. Biz konkret olaraq heç bir məşqçini hələ ki, nəzərdə tutmamışıq. Ona görə bunlar sadəcə şayiədir. Bu məsələ klub prezidenti səviyyəsində həll olunur". Tuyqun bəydən fəxri prezident Mübariz Mənsimovun "Olimpiya" məğlubiyyətinə münasibətini də öyrənmək istədik: "Mən onun münasibəti haqda heç nə deyə bilmərəm. Çünki o, fikrini komandanın prezidentinə bildirir. Amma onu deyə bilərəm ki, o da çox təəssüflənir. Çünki "Xəzər-Lənkəran" onun sevimli komandasıdır. Mən öz adımdan deyə bilərəm ki, biz hələ də şokdayıq. Belə bir nəticəni gözləmirdik. Bu, sadəcə biabırçılıqdır. Ağasəlim Mircavadov bizdən narazı qalmamalıdır. Rəhbərlik onun üçün istədiyi şəraiti yaratmışdı. Bircə futbolçunun adı çəkilə bilməz ki, onu komandaya baş məşqçinin xəbəri olmadan götürmüşük. İşlədiyi son günədək Ağasəlim müəllimin işinə qarışan olmayıb. O, tam sərbəst çalışıb. Almaniya toplanışı zamanı xeyli legioner baxışa gəlmişdi. Ancaq heç biri götürülmədi. Biz necə baş məşqçinin işinə qarışa bilərik ki, heyəti özü müəyyənləşdirirdi. "Olimpiya" Azərbaycanın ortabab klublarından belə zəif idi. Onları da udmayıb, kimi udacağıq? Yeni baş məşqçi kim olsa, onun qarşısına həmişəki tələblər qoyulacaq. Komanda ölkədaxili bütün titulları qazanmalıdır. Bundan sonra transferlərin olub-olmayacağını mən sizə deyə bilmərəm. Gələn məşqçi futbolçulara baxacaq, öz fikrini deyəcək. Bəlkə hamısını saxladı, bəlkə də kimlərisə çıxardı. "Xəzər-Lənkəran"ın imici var. Biz bütün hallarda elubun imicini qoruyacağıq".
   

"Xəzər-Lənkəran" Avroliqa yürüşünü startda dayandırınca, bütün futbol ictimaiyyəti şok keçirdi. Bu, bəlkə də şok deyildi. Cənub klubu ümumilikdə 4, Ağasəlim Mircavadovla 3-cü sınağından başıaşağı ayrıldı. Hər şeyin alt-üst çevrilməsinin bir mənada səbəbi var: Ağasəlim Mircavadov və düzgün olmayan seleksiya. "Olimpiya" ilə qarşılaşma bizə hardasa "Lex"lə matçdan əvvəlki olayları xatıratdı. Təxminən eyni situasiyadır. Baş məşqçi indi "İnter"ə rəqib olan polşalılarla görüşə "silah"sız çıxdığını söyləmişdi. Deməsindən anlaşılmşdı ki, istədiyi futbolçuların heç biri alınmayıb. Yenə eyni söz. Kişinyovdakı heç-heçədən sonra bu haqda suallarımızı rəhbərliyə ünvanlamalı olduğumuza işarə edən çalışdırıcı, Lənkaranda cavab oyunundan qabaq tam tərs açıqlama vermişdi. Beş-altı jurnalistin qabağında dedi ki, narahat olmağa dəyməz, birinci mərhələni keçsək, heyət gücləndiriləcək. O, bu haqda klub rəsmilərinin adından söz də verdi.
   Məncə, Mircavadovun enişi "Olimpiya"dan başlamadı. Bu, aylardır davam edən gərginliyin son anıydı. "Xəzər"in çatışmazlıqları Premyer Liqanın "altılıq" mərhələsinin lap əvvəlindən "mən varam" deyirdi. Bir ayda "Bakı"ya 3 dəfə uduzan komandanın çempionluğu və ölkə kubokunu əldən verməsi təsadüf deyildi, zəncirvari halqanın bir-birinə bitişik hissəcikləri idi. Kim onu məcbur edirdi ki, İvan Svetkov, Tomas İneman, İvan Pexa və Denis Kalinkov kimi legionerlərdən imtina etsin? Səviyyələrindən narazı idisə, niyə düşərgədə saxlayırdı və ya alırdı? Tomas, İvan və Denis ötən yayda kluba gələnlər idisə, Sevtkovu ondan əvvəl tanıyırdı. Yox, legonerlərin oyun satmasından, bilərəkdən oynamamasından şübhələnmişdisə, niyə əksər matçlarda hər birinə şans tanıyırdı. Avrokuboklarda qrupp mərhələsindən danışan mütəxəssis də "Karvan"ı Premyer Liqada saxlaya bilməyən hücumçularla yola çıxar? Xaqani Məmmədovla Zaur Ramazanov yaxşı futbolçu olublar, vaxtilə də "Xəzər"ə az fayda verməyiblər. Ən yaxşı vaxtlarında kluba qitədə 1 mərhələ keçmək sevinci yaşatmayıblarsa, üstündən neçə il keçəndən sonra yenidən köhnə dəyirmana baş vurmaq hansı məntiqə sığırdı? "Olimpiya"nı o qədər küçümsədi ki, arxı hoppanmamış Rumıniya səfərindən danışdı. Zaurla Xaqani formada olsaydılar, "Karvan"a gün ağlayardılar da. Ağasəlim bəyin məcburiyyətdən bu futbolçularla işləməsinə necə inanmaq olar ki, ilk təklif özündən gəlib? Bir komanda ki baş məşqçini istəmir, rəhbərlik nə edə bilər? Bir gün dözəcək, bir ay dözəcək, bir rübü yola verəcək, axırda bezəcək də.
   Azarkeşin gözü açıqdır. Söhbət lənkaranlı azarkeşdən gedirsə, onların necə böyük güc olmasını klubda işləmiş bütün baş məşqçilər görüb. Rasim Karanı iki dəfə istefaya göndərmiş fanatlar Ağasəlim bəyi bu müddətdə az müdafiə etməyib. "Xəzər"ə tarixinin 4 titulunu qazandırmış mütəxəssis imkan verməməliydi ki, ona da "get, bizə lazım deyilsən!" tələbi ünvanlansın. "Olimpiya"ya uduzmaq istənilən Azərbaycan klubunun baş məşqçisi üçün təhqir ölçüsüdür. Bakının çay evlərində gün keçirən klubsuz futbolçulardan 11 nəfər yığılsaydı, moldovanlara qarşı bundan yaxşı oynamaq olardı. Mircavadovun işlədiyi klubların öz spesifik cəhəti var. Yarımmüdafiə xəttinin güclü olmasına bel bağlayaraq, rəqiblərin belini yerə vurub. Sürət və hücum ona xas tərzdir. Həmin Mircavadov olardı, Rahid Əmirquliyevi orta sahənin mərkəzinə çəkib, əvəzedici heyətdən gəlmiş Amid Hüseynova da 30 dəqiqə şans verərdi? Emeka Opara sağ və sol cinahlar arasında qalıb, özü də nə etməli olduğunu bilmirsə, günah onun Azərbaycan dilində danışa bilməməsindədir? Əsla!
   "Xəzər-Lənkəran"ın Avropa Liqasında mərhələ adlayacağına inanan nikbin insanlardan biri də bəndəniz idi. Hələ püşkatmanın nəticəsi məlum olanda, bu, bizlər üçün çox sevindirici idi. Çünki bundan əvvəl 3 dəfə avroliqada iştirak edən cənublular 2 dəfə çox güclü rəqiblə üzləşmişdilər ki, nəticə gözlənildiyi kimi olmuşdu. Moldova "Nistru"suna məğlubiyyət isə hələ də yaddaşlardan silinmir. Maraqlı bir fakt, "Nistru" avrokuboklarda ən böyük hesablı qələbəsini məhz "Xəzər-Lənkəran" üzərində qazanıb. Bu dəfə "Nistru" məğlubiyyətinin əvəzini artıqlaması ilə çıxmaq olardı. Çünki rəqib "Xəzər-Lənkəran" olduqca zəif görünən başqa bir Moldova təmsilçisi "Olimpiya" idi. Hərçənd futbolda bir daha sübut olundu ki, pullu olmaq, yaxşı futbolçular almaq komanda qurmaq demək deyil. Baxmayaraq ki, "Xəzər-Lənkəran" bunu daha əvvəl də sübut etmişdi.
   Birinci oyuna baxmaq üçün Moldovaya yollananda yaxşı oyuna və sərfəli nəticəyə böyük ümidlər vardı, məndə də, digər yoldaşlarda da. Oyun olmadı, "Xəzər-Lənkəran" Kişniyovdakı oyunu ilə heç kimdə nikbinlik yeri qoymadı qalsın. Baş məşqçi Ağasəlim Mircavadov öaşçılıq etdiyi komanda bərbad oyun göstərdi, amma uduzmadı. Səfər oyununda qeydə alınan 0:0 hesabı daha sürüşkən görünürdü. Çünki buraxılacaq bir qol daha sonra vadar edəcəkdi ki, Lənkəran klubu rəqib qapısından iki top keçirsin. Moldovadakı oyunla da bu, çox mürəkkəb və mücərrəd görünürdü. Hər halda, inam böyük idi. Lənət olsun zamanın gedişinə ki, ağlımıza gələn başımıza gəldi.
   Qısası, elə Lənkərana yollandığım oyundan bir gün əvvəl stadiona - komandaların məşqçini izləmə getdik. "Xəzər-Lənkəran"ın məşq prosesinə baxan amerikalı dostumuz Eli, loru dildə desək, başını bulayaraq, bu komandanın çox zəif olduğunu söylədi. Hələ deyəndə ki, biz mərhələ adlayacağıq, çox gülümsədi. Nə qədər acı olsa da, Elinin təxmini düz çıxdı. Heç oyuna baxmağa da gəlmədi, çünki qələbə və yaxşı oyunun olmayacağını söyləyirdi. Axı amerikalılar vaxtını heç vaxt boş nəyəsə sərf etmirlər, bizdən fərqli olaraq. Şəhəri gəzib rastımıza çıxanlarla söhbətləşəndə məlum oldu ki, azarkeşlərin böyük əksəriyyəti klubun çıxışından çox narazıdır. Bu səbəbdən də oyun günü stadionun tamamilə dolacığı gözlənilmir. Bəziləri isə bunun əksini söyləyir, stadionun tam dolacağını, hələ bayırda qalanların da olacağını söyləyirilər. Yenə də çox təəssüf ki, birinci söylənilənlər düz çıxdı.
   "Buxarest "Dinamo"suna söz vermişdim ki, onlar Azərbaycana getməyəcək. Bəli mən vədimə əməl etdim. Məncə, Moldovadansa, Azərbaycan səfəri "Dinamo" üçün daha asan olacaqdı". Bu sözləri "Olimpiya"nın baş məşqçisi Nikolay Bunya deyib. O, Ağasəlim Mircavdovun istefasına da münasibət bildirib: "Əlbəttə, mən buna görə təəssüflənirəm. Amma unutmamalıyıq ki, bu bizim işimizdir. Mən həmkarımı başa düşürüəm. Əgər məşqçi nəticə göstərirsə, qalıb işləyir, göstərmirsə, istefa verir". Güman edirəm ki, Ağasəlim bəy gənc həmkarının bu öyüd-nəsihətindən sonra bir də karyerasını davam etdirmək fikrinə düşməyəcək. Kişinyovda qarşılaşdığım bir mənzərə məğlubiyyətin "zəqqumluğu"nu üzə vurur: "Olimpiya"nın futbolçularını "Zimbru" stadionundan çıxaran avtobusun qarşısını arxa qapıda bir qrup yaşlı kişi və qadın kəsdi. Öz dillərində bərkdən nəsə qışqırıb, maşının hərəkətini davam etdirməsinə imkan vermək istəmirdilər. Yaxınlaşıb, niyə belə etmələri ilə maraqlandım. Sürücünün dediklərindən məlum oldu ki, onlar komandanın afrikalı legionerlərinin kirnayədə qaldıqları evlərin sahibləridir, pullarını xeyli vaxtdır ala bilmədikləri üçün bura gəlib çıxıblar. Ev kirəsinin məbləği ilə maraqlandım, ayı bizim pulla 80 manat eləmir. Klubun rəsmilərindən biri hadisəyə yerinə gəlib, xahiş-minnət edəndən sonra ev yiyələri avtobusun önündən çəkildi.
   
   P.S. Yəqin onlara söz verilib ki, "Xəzər"i keçək, borcumuzu artıqlamasıyla ödəyəcəyik. "Olimpiya" növbəti mərhələyə adlamaqla borcundan çıxdı, bəs görəsən, Mircavadov bu ləkəni öz üzərindən necə siləcək? Ümumiyyətlə, silə biləcəkmi, ona bu imkanı kimsə tanıyacaqmı?