İyulun 16-da Çempionlar Liqası və Avroliqanın III təsnifat mərhələsinin püşkü atılacaq. UEFA-nın İsveçrənin Nyon şəhərindəki mənzil-qərargahında keçiriləcək mərasim ənənəvi olaraq cümə günü keçiriləcək. Sadəcə, fərq ondadır ki, bu dəfə komandalar II mərhələ oyunları başa çatmamış, yəni yalnız ilk görüşlərdən sonra rəqiblərini biləcək. Təbii ki, bunun üçün klublarımız - ÇL-də "İnter" Polşa "Lex"ini, Avroliqada "Qarabağ" Şimali İrlandiya "Portadaun"unu, "Bakı" Çernoqoriya "Buduçnost"unu yenməlidir. ÇL-in püşkü Bakı vaxtilə 15:00, Avroliqada 16:30-da başlayacaq. Hər iki püşkü UEFA-nın baş katibi Canni İnfantino, Yarışlar üzrə direktoru Corcio Marketti keçirəcək. Püşkatmada "Bakı"nı vitse-prezident Zeynal Məmmədov, "İnter"in baş menecerin müavini Kamran İsmayılov təmsil edəcək. "Qarabağ" da öz adından Z.Məmmədova etibarnamə verməlidir.