"Olimpik-Şüvəlan" adının dəyişdirilməsi ilə bağlı Peşəkar Futbol Liqasına müraciət edib. Quruma ünvanlanan məktubda klubu bundan sonra "AZAL" adlanacağı bildirilir. "Olimpik-Şüvəlan" PFK-nın təsisçiləri və rəhbərliyinin ümumi qərarına əsasən klubun adı dəyişdirilərək "AZAL" PFK olub. Artıq bununla bağlı sənədlər də tərtib olunub və yaxın günlərdə qeydiyyat üçün Azərbaycan Respublikası Ədliyyə Nazirliyinə göndəriləcək. "Təyyarəçilər"in mətbuat xidmətinin rəhbəri Eldəniz Yusifov "Futbol+Qol"a açıqlamasında bildirib ki, məsələ komandanın himayədarlarının görüşündə dəqiqləşib: "Bilirsiz ki, klubumuzun əsas sponsoru "AZAL" Hava Konsernidir. Artıq neçə ildir ki, komandaya onlar baxır. Bu müddətdə "Olimpik"in maliyyə cəhətdən vəziyyəti stabil olub və indi də hər şey normaldır. Sponsorlar klub üçün əlindən gələni edir. "AZAL"ın çəkdiyi zəhmət böyük olduğundan, adı hər yerdə bilinməlidir. Klubun adı dəyişsə də, planlar dəyişməyib. Şüvəlanda tikilmək üzrə olan stadion yaxın vaxtlarda təhvil veriləcək. Həmin kompleksin bütün xərclərini də "AZAL" ödəyir".