Premyer Liqa klubları növbəti mövsümün hazırlıqlarını davam etdirirlər. Bu məqsədlə 3 gün öncə Zabrat qəsəbə stadionunda "Olimpik-Şüvəlan"la "Simurq" yoxlama görüşündə üz-üzə gəlib. "Təyyarəçilər" Viktor İbokoyenin vurduğu qolla zaqatalalıları minimal hesabla məğlub ediblər. "Olimpik-Şüvəlan"ın baş məşqçisi Nazim Süleymanov bu oyunda baxışda olan bir neçə futbolçunu da yoxlayıb. Bolqar hücumu və alban müdafiəçi matçdan sonra vətənlərinə yola salınıblar. "Təyyarəçilər" dünən yeni zaqatalalılarla qarşılaşıb. Eyni məkanda keçirilən oyunda hesab bu dəfə 1:1 olub. Əli Bağırov penalti zərbəsiylə "Simurq"u hesabda irəli çıxarsa da, Viktor İbekoyi paytaxt təmsilçiçsini məğlubiyyətdən qurtarıb. "O-Ş" növbəti yoxlama görüşünü iyulun 14-də keçirəcək. "İnter"lə baş tutacaq oyun saat 10.00-da Zabrat qəsəbə stadionunda olacaq. "Təyyarəçilər"in çalışdırıcısı Nazim Süleymanov bildirib ki, təlim-məşq toplanışı çərçivəsində "Bakı"ya 3:4 hesabı ilə uduzan komandada hələ də problemlər hökm sürür. O, klubda çətinliklərin olduğunu, ancaq bunu tədricən yoluna qoyacaqlarını deyib: "Maraqlı oyun izlədik. Təbii ki, qapımızdan 4 top buraxmaq heç də yaxşı hal deyil. Ancaq rəqib qapısından 3 qol keçirməyimiz sevindiricidir. Deməli, müdafiə xəttinə ciddi fikir verməliyik. Təlim-məşq toplanışında çatışmazlıqları aradan qaldırmağa çalışırıq. Hazırda 3-4 əcnəbi oyunçunu baxışa dəvət etmişik. Litva və Slovakiyadan daha 2 futbolçu düşərgəmizə gələcək. Onlardan biri müdafiəçi, digəri isə hücumçudur. Türkiyəyə yollanacaq heyətdə "Bakı" ilə oyunda qol vuran Lavet Abidin də yer ala bilər. Ankarada isə bir neçə oyunçunu sınaqdan keçirməyi planlaşdırırıq".
   Heyətini gücləndirməyə çalışan "Olimpik-Şüvəlan" yeni futbolçuları baxışdan keçirməkdə davam edir. Yeni mövsümdən AZAL adı altında çıxış edəcək komandanın düşərgəsinə son gələn nigeriyalı futbolçu Pius İkedia olub. Peşəkar karyerasına 1997-ci ildə başlayan 30 yaşlı cinah yarımmüdafiəçisi əsasən ölkə xaricində çıxış edib. O, 1999-2005-ci illərdə məşhur "Ayaks" klubunun (25 oyun, 2 qol) uğurları üçün tər töküb. İkedia növbəti iki ili Hollandiyanın digər təmsilçisi olan "Alkmaar"ın heyətində keçirib. Cəmi 12 oyunda meydana çıxan Pius 1 dəfə qol sevinci yaşayıb. Ukraynada da çıxış etməyə imkan tapan nigeriyalı Donetsk "Metallurq"unun şərəfini qoruyub. Ancaq Piusin orada karyerası uğurlu alınmayıb. Cəmi 3 oyunda komandasına kömək edən İkedianın sonuncu klubu Hollandiyanın birinci divizionunda çıxış edən "Rozendal" olub. Futbolçu 1997-ci ildən etibarən formasını geydiyi Nigeriya yığmasının heyətində 1 dəfə fərqlənib. Onun həmyerlisi Lavet Abidun da ötən gündən düşərgədədir. Klub rəhbərliyinin Avstriya səfəri zamanı bəyəndiyi Makedoniya, Honduras və Moldova yığmalarının üzvlərinin gəlişi isə baş tutmayıb. Hər üç tərəfin nümayəndələri "təyyarəçilər"dən külli miqdarda pul istəyib ki, qarşı tərəf bununla razılaşmayıb. "Qəbələ"nin bəyənmədiyi bolqar hücumçu Georgi Mendev də iranlı Mehdi Qasımi kimi şüvəlanlıların formasını geyinməyəcək. Hazırlıq başlayandan bəri 20-yə yaxın legioneri iş başında görən Nazim bəyin Türkiyə toplanışından gözləntisi çoxdur. Keçiriləcək 4 yoxlama görüşündə yenə xeyli sayda oyunçu "mmtahan" verəcək.