Mahir Şükürovun heyətində yer aldığı "Anji" Rusiya Premyer Liqasında növbəti məğlubiyyətini alıb. Mahaçqala təmsilçisi "Zenit"lə olduğu kimi Moskva "Lokomotiv" ilə səfər oyununda da 1:2 hesabı ilə uduzub. Oyunda qələbə topunu Premyer Liqanın bombardiri olan həmyerlimiz Aleksandr Əliyev vurub. Onun ilk qolda da məhsuldar ötürmə verdiyini nəzərə alsaq, görüşün qəhrəmanı saymaq olar. Oyunda 90 dəqiqə meydanda olan Mahir rusiyalı həmkarlarımızdan 5 bal alıb. Şükürov "Zenit"lə görüşdə olduğu kimi, "Anji"nin heyətində ən aşağı bal alan futbolçulardan olub. Azərbaycanlı futbolçu insidentin də iştirakçısıdır. 28 yaşlı yığma üzvü komanda yoldaşı Bai Kebe ilə söyüşüb.Rusiyalı həmkarlarımızın yazdığına görə, Mahirlə vaxtilə Moskva "Spartak"ında oynayan seneqallı müdafiəçi buraxılan ilk topda səhvə yol verib. Onlar qoldan sonra bir-birini günahlandırdıqları zamanı təhqirlərdən də çəkinməyib. Rus həmkarlarımız Kebeyə oyununa görə 5,5, Şükürova 5 bal verib.