Bu gün Avropa Liqasının III təsnifat mərhəlsində "Visla" ilə ilk oyununa çıxacaq "Qarabağ" srağagündən Polşadadır. Ağdam təmsilçisi saat 16:00-da çarter reysi ilə Krakov şəhərinə uçub. Tam heyətlə olmasa da. Üç futbolçu - müdafiəçi Ayxan Abbasov, yarımmüdafiəçi Rəşad Kərimov və hücumçu Tural İsgəndərov səfərə aparılmayıb. Onlardan Ayxan cəzalı olduğu üçün meydana çıxa bilməz. Rəşadla Turalın isə zədəsi var. Dünən son məşq Bakı vaxtı ilə saat 23:00-da olub. Qurban Qurbanovun 20 oyunçudan komandası məşhur 5 ulduzlu "Radisson" otelində məskunlaşıb. "Radisson" dünyada "Hilton" otellər şəbəkəsindən sonra ən bahalı otel hesab olunur. "Qarabağ" burada 4 gün qalacaq. Otelin təklif etdiyi paketdə bir gecənin qiyməti 549 zlot - təxminən 130 manat, iki nəfərlik otaqların qiyməti isə 610 zlotdur (144 manat).
   Baş məşqçi Qurban Qurbanov "Futbol+Qol"a verdiyi müsahibədə komandanın son durumuna aydınlıq gətirdi.
   - Polşaya hazırlıqsız getmək olmazdı. "Portadaun"la Bakıdakı oyundan sonra "Visla" barədə xeyli araşdırma aparmışam. İnternetdən topladığım informasiyalar mənə rəşib haqda ümumi fikir yaratdı. İnternetdə bəzi oyunlarını izlədim. Özüm üçün lazımı qeydləri götürmüşəm. Düzdür, rəqibin oyununa canlı baxanda, daha dəqiq hərəkət etmək olardı. Vaxt azlığına görə bunu edə bilmədik. "Visla" stabil komandadır. Dəyişməyən oyun uslubu var. Rəqibindən asılı olmayarq, sisteminə əl vurmur, Meydanda 90 dayanmadan hərəkət edirlər, pressinqdən sonadək əl çəkmirlər. Müdafiələrində boşluq tapmaq asan deyil, hücum zamanı arxa xətti qorumağı yaddan çıxarmırlar. Topla oynamaq "Visla"nın sevdiyi oyun tərzidir.
   - Belə deyək, iki eyni oyun üslubuna malik rəqib üz-üzə gəlir...
   - Bəli, bu baxımdan üslublarını bizə oxşatmaq olar.
   - Bu cür komandaya qarşı oynamaq "Qarabağ" üçün ciddi təhlükə yarada bilərmi?
   - Düşünürəm ki, çətin olacaq. "Visla" Azərbaycan Premyer Liqasından səviyyəcə üstün olan Polşa çempionatının ikincisidir. Onların üstünlüyü ondadır ki, bir çox futbolçuları Avrokuboklarda böyük təcrübə toplayıb. Ayrı-ayrılıqda götürsək, futbolçularının fərdi ustalıq səviyyəsi də yüksəkdir.
   - Ehtiyatlanmaq üçün əsas görürsüz?
   - İstənilən rəqibə qarşı oynamaq olar. Futbolçularım "Visla"dan çəkinmir. Necə mübarizə aparmalı olduğumuzu onlara başa salmışam.
   - "Polşa sindromu" istər klublarımız, istərsə də millimiz üçün keçilməz səddir. Siz futbolçu karyeranız dövründə yığmanın kapitanı kimi Polşaya qarşı oynamış, 2005-ci ildə səfərdə 0:8 hesablı uduzduğumuz rəsmi matçda iştirak etmisiz. Rəqiblə bağlı sindrom futbolçularınızda psixoloji gərginlik yaratmır?
   - Yox. Düşünmürəm ki, belə problem olsun. Bu, avrokubok oyunudur. Avroliqada az da olsa uğurla çıxış etmişik və futbolçularda özünəinam var. Bir də ki, futbol günü-gündən inkişaf edir, dəyişiklər olur. Həmin dövrlə indini müqayisə etmək düzgün olmazdı. İndiki futbol onu göstərir ki, hər bir rəqibə qarşı oynamaq, nəticə qazanmaq olar. Biz də "Visla"dan çəkinməyib, vətənə yaxşı nəticə ilə dönməyə çalışacağıq. "İnter"in səfərdə "Lex"lə oynaması, mənə elə gəlir ki, "Visla"nın da bizə münasibətini dəyişib. Yəqin ki, Azərbaycan klublarına daha zəif gözüylə baxmırlar. Rəqibin qarşıdakı oyuna ciddi hazırlaşdığını, komandamızı dərindən analiz etdiklərini bilirəm.
   - "Visla"nın hücum xətti hündürboy futbolçulardan qurulub və cinah keçidlərinə xüsusi fikir verirlər. Onların qarşısını kəsməkdən ötrü xüsusi plan tərtib etmisiz?
   - Hücum xəttində oynayan futbolçularını bir-bir analiz etmişik. Onlardan yalnız Maçey Juravskinin boyu 190 sm-dən yuxarıdır. Onun arxasında yer alan futbolçu da boyca hündürdür. "Visla" sürətli oynayır, əsas üstünlükləri budur. Müdafiədə top ələ düşəndən sonra irəlidə kimə pas verəcəklərini yaxşı bilirlər.
   - "Metallurq" və "Portadaun"la 4 görüşdə komandanız eyni sayda qapısında qol gördü. Bu, sizdə narahatlıq yaradır?
   - Oyundan-oyuna komandada "artımı" görürəm. Buraxılan səhvləri, çalışırıq ki, gələn dəfə təkrarlamayaq. İndiyədək dörd qola üzülsək də, fikir verin, rəqiblər qapımız ağzında o qədər də çox təhlükəli vəziyyət yarada bilməyiblər. Üç qol öz səhvimizdən olub. Polşada açıq futbola getməyəcəyik. Müdafiədə sıx oynayıb, kollektiv futbol göstərəcəyik. "Visla" arxada boşluq tapsa, qabağını almaq çətinləşəcək. Daha çox hücum edən komandadır.
   - Yeni transferiniz Andrey Rubin də artıq bu oyunlar üçün sifariş olunub...
   - Bəli, "Visla" ilə oyunlarda Rubinin xidmətindən istifadə etməyə çalışacağıq.
   - Ancaq nəzərə alaq ki, Andrey mövsüm bitəndən sonra oyun praktikası sarıdan korluq çəkir. Ümumiyyətlə, onun hazırlıq səviyyəsində problem yoxdur?
   - Rubinin hazırlığı qaydasındadır. Bütün məşqlərimizdə maksimum işləyir, özünü göstərməyə çalışır. Məncə, Rubinin oyun praktikası ilə bağlı bir o qədər problem olmamalıdır. Çünki Andrey təcrübəli futbolçudur və bu iki ayda oynamamağının problem yaradacağını düşünmürəm. Biz ona güvənirik və "Visla" ilə görüşlərdə yararlanmaq fikrindəyik.
   - Maraqlıdır ki, Polşa klubunun məşqçisi də "Qarabağ"ın hücum etməyi sevən komanda kimi xarakterizə edib. Belə çıxır ki, iki hücum futbolu göstərən komandanın oyununu izləyəcəyik...
   - İnşallah, hər şey istədiyimiz kimi olar. Biz güclü rəqibin hər bir hücumuna hazır olmalıyıq. "Visla" ilk dəqiqələrdən hücum futboluna üstünlük verəcək. Ancaq bu, o demək deyil ki, biz yalnız müdafiədə oturacağıq. Polşada nəticəyə oynayacağıq.
   - Səfərdə hansı nəticəyə ümid edirsiz?
   - Bu haqda dəqiq bir şey bilmərəm. Əlbəttə, ilk oyunu səfərdə keçirdiyimizi nəzərə alsaq, qol vurmağa, top buraxmamağa çalışacağıq. Polşada heç-heçə bizim üçün yaxşı nəticə olardı. Cavab görüşünü evdə keçirəcəyimizdən, minimal hesablı məğlubiyyət də bizə sərf edir. Oyun 90 dəqiqədən ibarətdir. Biz də 90 dəqiqə ərzində işimi görməliyik. Bu gün Azərbaycan klublarından yalnız "Qarabağ" mübarizəni davam etdirir. Qrup mərhələsindən danışmaq çox tezdir. "Qarabağ" böyüuk məsuliyyət altına girib. Ancaq bunun futbolçularımıza psixoloji təzyiq kimi başa düşməyin.
   - Meydana buraxacağınız ilk "11-liy"i müəyyənləşdirmisiz?
   - Demək olar ki, hə.
   - Hansısa dəyişiklik gözlənilir?
   - Ola bilər. Hansı xətdə olacağını açıqlamağım düzgün çıxmaz. Ancpq hansı futbolçum indidən necə oynayacağını, və neçə dəqiqə oynayacağını bilir. Bəzən kənardan deyirlər ki, "Qarabağ"da hücumçu problemi var. Mən o cür düşünmürəm. Bu gün büdcəmiz nəyə imkan verir, ona uyğun heyət qurmuşuq. Gənc hücumçuları day yetişdirməliyik.
   

Türkiyənin Bolu şəhərində təlim-məşq toplanışında olan "Neftçi" hazırlıq çərçivəsində sonuncu yoxlama oyununu dünən keçirib. Arif Əsədovun komandası "Qaziantep Böyükşehir Bələdiyyəspor"la qarşılaşıb. Bakılılar bu görüşdə hesabı açsa da, üstünlüyünü qoruya bilməyİB - 1:2. Ardıcıl 4-cü oyununda rəqib qapısına yol tapan Nasimov artıq 32-ci dəqiqədə fərqlənib. Özbək hücumçu Seyidovun sağ cinahda yan xəttin üzərindən penalti nöqtəsinə doğru ötürməsini güclü zərbə ilə tamamlayıb. Fasilədən sonra iki dəfə - 51 və 67-ci dəqiqələrdə iki qol buraxan Əsədovun yetirmələri məğlubiyyətlə barışmalı olublar."Neftçi" meydana Elçin Sadıqov, Ruslan Abışov, İqor Mitreski, Ruslan Əmircanov, Alessandro da Silva, Elmar Baxşiyev, Slavko Georgievski, Mirhüseyn Seyidov, Rəşad Abdullayev, Flavinyo və Bahodir Nasimovdan ibarət "11-lik"lə çıxıb. Oyunun gedişi ərzində Əsədov Rauf Mehdiyev, Denis Silva, Cavid İmamverdiyev, Cavid Hüseynov, Tərlan Quliyev, Aleksandr Burduli, Araz Abdullayev və Ruslan Qurbanova da şans verib. "Ağ-qaralar" bundan əvvəl "Orduspor"a 4:0, "Kardemir Karabükspor"a isə 1:0 hesabı ilə gəlib.
   

Avropa Liqasının üçüncü təsnifat mərhələsində artıq yeganə təmsilçimiz olan "Qarabağ"a azarkeşlik etməli olacağıq. Ötən il olduğu kimi, bu il də bizə daha çox qələbə sevinci yaşadan Ağdam klubunun növbəti mərhələdəki rəqibi isə Polşa "Visla"sıdır. Krakov şəhərini təmsil edən komanda 1906-cı ildə yaradılıb. İlk ildən etibarən "Visla İdman Cəmiyyəti" adı altında çıxış edib. İkinci dünya müharibəsinin başa çatmasından sonra "Visla Krakov" adlanmağa başladı. Təxminən 34.000 tamaşaçı tutumuna malik olan klubun stadionuna 2008-ci ildən Henrik Reymanın adı verilib. Qeyd edək ki, bu arena həm də Polşada Avro-2012-nin oyunlarını qəbul edəcək stadionlardan biridir. İlk uğurları 1927-1928-ci illərə təsadüf edir. Məhz həmin illərdə Polşa çempionluğuna sahib çıxan "Visla", bu titula ümumilikdə 12 dəfə yiyələnib. Maraqlıdır ki, bu çempionluğun yeddisi 1999-cu ildən bəri qazanılıb. Yəni "Visla" 1999-cu ildən başlayaraq 2001, 2003, 2004, 2005, 2008 və son olaraq 2009-cu ildə ölkə çempionluğuna sahib çıxıb. Bununla yanaşı, 13 dəfə çempionatın gümüş medallarına, 10 dəfə isə bürünc medallara yiyələnib. Uğurları bununla bitmir - tarixi ərzində 4 dəfə ölkə kubokunu (1926, 1967, 2002, 2003) və bir dəfə isə Polşa superkubokunu (2001) başı üzərinə qaldıran "Visla" Avropa turnirlərində də uğurlu çıxış edib. Avropa Çempionlar Liqasının yarımfinalına 1979-cu ildə vəsiqə qazanan klub mübarizəni elə bu mərhələdə dayandırmalı olub. Üç dəfə - 1969, 1970 və 1973-cü illərdə İntertoto kubokunu qazanmağa nail olub. Rəsmi forması ağ-qırmızı olan klubun prezidenti Marek Viltsek, baş məşqçisi isə Henrik Kaspertsakdır. Avropa Liqasına ikinci təsnifat mərhələsindən qoşulan polyaklar Litva "Şaulyay"ını mübarizədən kənarlaşdırıb. Səfərdə 2:0 hesabıyla qələbə qazanan polşalılar cavab oyununda da 5:0 hesablı darmadağına imza atıblar. Göründüyü kimi, hücum xəttində məhsuldar oyunuyla seçilən Krakov klubu həm də müdafiəsinin etibarlılığı ilə öyünə bilər. Lakin ümid edək ki, "Qarabağ" polşalıların hücum xəttini zərərsizləşdirməklə yanaşı, onların müdafiə xəttini yarmaq vəzifəsinin də öhdəsindən gəlməklə bizə növbəti qələbə sevinclərini yaşada və Avroliqanın dördüncü təsnifat mərhələsinə yüksəlməyi bacaracaq.
   Qurbanov tələdən
   xəbər tutdu
   Avropa Liqasındakı yeganə təmsilçimiz artıq "Visla"nın qurduğu tələdən xəbər tutub. Ev sahibləri oyundan əvvəl meydançanı suladaraq, futbolçularımıza çətinlik yaratmaq niyyətindədir. Ölkə çempionatında bu metoddan istifadə edən "Visla" eyni çətinliyi təmsilçimizə də yaşatmaq istəyir. Bundan xəbər tutan "Qarabağ"ın məşqçilər heyəti lazımı tədbirlər alıblar. Belə ki, Ağdam klubunun dünən Tofiq Bəhramov adına Respublika stadionunda sonuncu məşqindən əvvəl baş məşqçi Qurban Qurbanov meydançanın sulanması tapşırığını verib. Respublika stadionunun qazonu tam sulandıqdan sonra futbolçular məşqə çıxıblar. Gənc çalışdırıcı fikrini bu cür izah edib: "Hələ mən futbol oynayarkən beynəlxalq oyunlarda bu cür hallarla rastlaşmışam. Biz burada quru meydançada məşq edirdik, ancaq gedib sulu qazonda futbol oynayırdıq. Avropada futbolun sürətini bir qədər də artırmaq üçün oyundan əvvəl meydançanı sulayırlar. Belə olan halda, top yerə düşərkən daha da sürət alır və azarkeşlər sürətli, baxımlı oyunun şahidi olurlar".
   Arzuolunmaz ölkəyə səfər
   "Qarabağ" Azərbaycan üçün arzuolunmaz ölkənin təmsilçisi ilə görüşəcək. 1994-cü ildən avrokuboklara qatılan komandalarımız daim Polşa klublarına uduzublar. Bizə qarşı həmişə amansız olan "pan"lar avrokubok tariximizə qara hərflərlə düşüb. Təsadüfi deyil ki, komandalarımız heç vaxt onları mübarizədən kənarlaşdıra bilməyib. Ən əsası, avrokuboklarda ən böyük hesablı məğlubiyyəti məhz polşalılardan almışıq. Özü də bu, "Qarabağ"ın oynayacağı Krakov şəhərində baş verib. Həmin vaxt, 1996-cı ildə çempionatımızın gümüş medalçısı olan Buzovnanın "Xəzri" klubu "Qutnik" tərəfindən 9 cavabsız qol "yeyib". Tale elə gətirdi ki, Çempionlar Liqasında debütümüz də Polşa təmsilçisi ilə olub və yenə səfərdən ağır məğlubiyyətlə qayıtmışıq - 0:8. "Vidzev" "Neftçi"nin qapısına iki oyuna 10, "Qutnik" "Xəzri"yə 11 qol vurmuşdu. Polşalılarla keçirdiyimiz 16 oyunda 13 dəfə uduzmuş, 2-də heç-heçə etmiş, yalnız 1-də qalib gəlmişik. Həmin qələbəni cari mövsümdə qazanan "İnter" Polşa sindromunu qırmağa çox yaxın idi. Ancaq oyun sonrası penalti zərbələrində daha dəqiq olan "Lex" sensassiyaya imkan vermədi. Yeri gəlmişkən, qitə miqyasında ən çox görüşdüyümüz klub olan "Lex" üç müxtəlif təmsilçimizə qalib gəlib. Polşalıların 13 qələbəsindən 5-i böyük hesablı, 3-cü 1:0 hesablı olub (topların fərqi - 46-8).
   Azərbaycan və Polşa klublarının avrokuboklarda görüşü
   1996/97 mövsümü. UEFA kuboku, I təsnifat mərhələsi
   Krakov. "Qutnik" - "Xəzri" 9:0
   Bakı. "Xəzri" - "Qutnik" 2:2
   1997/98 mövsümü. Çempionlar Liqası, I təsnifat mərhələsi
   Bakı. "Neftçi"- "Vidzev" 0:2
   Lodz. "Vidzev" - "Neftçi" 8:0
   1998/99 mövsümü. Çempionlar Liqası, I təsnifat mərhələsi
   Lodz. LKS - "Kəpəz" 4:1
   Gəncə. "Kəpəz" - LKS 1:3
   2000/01 mövsümü. İntertoto kuboku, I mərhələ
   Vidzev. "Zaqlembe" - "Viləş" 4:0
   Bakı. "Viləş" - "Zaqlembe" 1:3
   2005/06 mövsümü. İntertoto kuboku, I mərhələ
   Bakı. "Karvan"- "Lex" 1:2
   Poznan. "Lex" - "Karvan" 2:0
   2007/08 mövsümü. UEFA kuboku, I təsnifat mərhələsi
   Bakı. "MKT-Araz"- "Qrotslin" 0:0
   Qrodzisk. "Qrotslin" - "MKT-Araz" 1:0
   2008/09 mövsümü
   Bakı. "Xəzər-Lənkəran" - "Lex" 0:1
   Poznan. "Lex" - "Xəzər-Lənkəran" 4:1
   2010/11 mövsümü
   Bakı. "İnter" - "Lex" 0:1
   Poznan. "Lex" - "İnter" - 0:1 (oyun sonrası penaltilərlə - 9:8)
   "Visla" nə qədər
   güclənsə də...
   "Visla" heyətini gücləndirməkdə davam edir. Transfer dövründə 24 yaşlı yarımmüdafiəçi Cezari Vilk ilə 4 illik müqavilə imzalayan Krakov təmsilçisi uzun müddətdir danışıqlar apardığı argentinalı hücumçu Andres Riosin keçidini də rəsmiləşdirib. Polşalılar 21 yaşlı futbolçunu "River Pleyt"dən icarəyə götürüb. Klub yeni transfer Cezari Vilk də daxil olmaqla, Andres Riosu ictimaiyyətə təqdim edib. Rios 21, Vilk isə 28 nömrəli futbolkanı geyinəcəklər. Kristofer Maczinskilə yolları isə ayırıb- 23 yaşlı futbolçunu "LKS Lodz" a icarəyə veriblər. Maczinski seçmə mərhələdə Litva təmsilçisi "Şaulyay" komandası ilə oyunlarda "18-likdə" yer alsa da, baş məşqçi Henrik Kasperczak ona şans verməyib. İlk oyunlarda komandasına kömək edən Krakov təmsilçisinin braziliyalı müdafiəçisi Kleber məşqdə zədələnib. O, yenidən komanda ilə hazırlıqda iştirak etmək istəsə də, meydanı vaxtından əvvəl tərk etməli olub. Futbolçunun bizimkilərə qarşı forma geyinib-geyinməyəcəyi axşam keçiriləcək müayinədən sonra bilinəcək.
   Kaspeçak ehtiyatlı danışdı
   "Şaulyay" üzərində qələbədən sonra güclü Avropa klublarına başağrısı olmuş "Qarabağ"la qarşılaşırıq. Biz azərilərlə oyunda qələbə qazanmaq istəyirik". Bu sözləri dünən Krakovda mətbuat konfransı keçirən "Visla"nın baş məşqçisi Henrik Kaspeçak deyib. Polşalı mütəxəssis komandasında itkilərin olduğunu bildirib: "Komandam sabahkı oyunda meydana qələbə üçün çıxacaq. Heyətdə problemlərimiz var. Mərkəzi müdafiəçisi Kleber vacib oyunda meydana çıxa bilməyəcək. Eyni zamaqda Draqan Paljiç və Vilkin də oynaması sual altındadır. Heyətimizdə yeni oyunçular var. Onların komandaya uyğunlaşması üçün zaman lazımdır". "Qarabağ" güclü komanda olduğunu deyən Kaspeçak təmsilçimizin ötən ilki uğurlarından danışıb: "Biz "Qarabağ"ın ötən ilki nəticələrini analiz etmişik. Bu komanda "Rusenbor"u turnirdən kənarlaşdırıb və "Tvente" ilə qrup məprhələsinə vəsiqə uğrunda mübarizə aparıb. Dediyim kimi, hər şeyə rəğmən, qələbə qazanmağa çalışacağıq. Heyətimizdə daim qələbə qazanmağa çalış istəkli oyunçular yer alıb. Oyuna məsuliyyətlə yanaşırıq".
   Cavab oyunu türk hakimlərdən asılıdır
   Artıq "Qarabağ"ın cavab oyununu idarə edəcək hakimlər briqadası da müəyyənləşib. Avqustun 5-də saat 21:00-da Tofiq Bəhramov adına Respublika stadionunda startı veriləcək görüşdə türkiyəli baş hakim Bülənt Yıldırıma həmyerliləri Mustafa Əmrə Əyisoy, Cem Satman və Hakan Ceylan yardımçı olacaq. Onların işinə qiymət verəcək hakim-inspektor Volfqanq Sova Avstriyanı təmsil edir. Oyunun UEFA nümayəndəsi isə norveçli Zvi Rosen təyin olunub.
   Kontorlar rəqibə inanır
   Bukmeker kontorları matça proqnozlarını açıqlayıblar: Ağdam klubunun qələbə qazanmasına möcüzə kimi baxırlar. Polyakların qalib gələcəyinə 1.21 əmsal verən kontorlar həmyerlilərimizin uğurunu 14.00 əmsalla qiymətləndiriblər. Onların proqnozuna görə, oyunun heç-heçə başa çatacağına inananlar isə qoyduqları pulu 5.70 dəfə artırmaq şansı qazanacaqlar.
   Onun ayağı
   düşərli olacaqmı?
   Millinin baş məşqçisi Berti Foqts da matçı izləyəcək. Almaniyalı mütəxəssis yığmanın üzvlərini canlı olaraq iş başında görmək niyyətindədir. Artıq bununla bağlı "Qarabağ" a məlumat verilib. Foqts Ağdam klubunun rəhbərliyindən Polşada məskunlaşmaq və nəqliyyat məsələsini həll etməyi xahiş edib. O, daha əvvəl avrokuboklardakı təmsilçimiz "İnter"in Polşada "Lex"lə və "Bakı"nın Çernoqoriyada "Buduçnost"la oyunlarını stadiondan izləyib. Hər iki görüş bizimkilər üçün uğursuz nəticələnib. Ayağı düşərli olmayan qoca kaş bu dəfə bədlik gətirməsin. Polşa mətbuatı Foqtsun oyunu izləməyə gələcəyindən xəbər tutub. Həmkarlarımız 64 yaşlı alman mütəxəssisi "Hutnik" stadionunda görəcəklərini qeyd ediblər. Berti haqda məlumat verən polşalılar onun 1974-cü ildə futbolçu kimi dünya çempionu olmasını, 8 il (1990-98-ci illər) baş məşqçisi olduğu yığması ilə Avropa çempionluğu qazanmasını qeyd edib. Foqtsun son iki ildə çalışdırdığı Azərbaycan yığmasına gələnə kimi Küveyt, Şotlandiya, Nigeriya millilərinə rəhbərlik etdiyini yazan həmkarlarımız bir yanlışlığa yol verib. Belə ki, onlar klub məşqçisi kimi Foqtsun Münhen "Bavariya"sını çalışdırdığını göstərib. Əslində, millimizin baş məşqçisi Leverkuzen "Bayer"ində işləyib. Foqtsun getdiyi qarşılaşma Azərbaycanda canlı yayımlanacaq.
   "İdman Azərbaycan"dan canlı yayım
   Polşa mətbuatının yaydığı xəbərə görə, "İdman Azərbaycan" kanalı Krakovda və Bakıda baş tutacaq matçların qarşılıqlı olaraq pulsuz yayımlanması üçün etdiyi müraciətə "Visla" müsbət cavab verib. stadim.az saytı da izləyicilərini narahatlıqdan qurtaracaq. Müstəqil idman saytı onlayn-reportaj təqdim edəcək. "Qarabağ"ın rəqibi isə jurnalistlərə öz tələblərini çatdırıb. Vitse-çempion komandamızla avqustun 5-də Bakıda keçiriləcək cavab görüşünə getmək istəyən polşalı həmkarlarımızı aparmağa hazırdır. Ancaq bunu təmənnasız etməyən "Visla" sifariş etdiyi çarter reysində yer almaq istəyən mətbuat nümayəndələrinə şərtlərini açıqlayıb. Belə ki, səfərin qiyməti 2000 zlota yaxındır ki, bu da 500 manat deməkdir. Həmin qiymətə gediş-gəlişlə yanaşı, dörd ulduzlu oteldə qalmaq da daxildir. Jurnalistlər konsulluqla bağlı 60 avro xərci özləri çəkməlidir.

Polşanın idman mətbuatı oyunu diqqət mərkəzində saxlayırlar. Bu yazılarda yerli mətbuat "Qarabağ"ın ilk iki mərhələdə uğurlu nəticələr qazanmasına diqqət çəkib. Bundan başqa, yerli jurnalistlər hesab edirlər ki, ağdamlılar ikinci mərhələdə mübarizədən kənarda qoyduğu Litvanın "Şaulyay"dan qat-qat güclü komandadır. Sports.pl saytı isə diqqəti hələ 2005-ci ilin ilin mart ayında Polşa və Azərbaycan milliləri arasında keçirilmiş oyuna yönəldib. Həmin qarşılaşmada Polşanın 8:0 hesabı ilə qalib gəldiyini yazan sayt bu matçda hazırda "Qarabağ"a rəhbərlik edən Qurban Qurbanovun futbolçu kimi çıxış etdiyini xatırladıb. "Yəqin ki, "Visla" ilə oyunda Qurban Qurbanov artıq bir məşqçi kimi həm də bu acınacaqlı məğlubiyyətin əvəzini çıxmağa və qisas almağa çalışacaq" - deyə sayt bildirib. "Visla"nın məşqçisi Anjey Baxr isə müsahibəsində komandaları müqayisə edib.
   - Siz Azərbaycanda "Qarabağ"la "Portadaun"un oyununu izləmisiz. Bakıya gedib çıxmaq çətin oldu?
   - Elə də yox. Mən əvvəlcə Vyanaya getdim, oradan isə Azərbaycan paytaxtına yola düşdüm. Qayıdanda isə çətinliklə üzləşdim. Frankfurtda və Münhendə enmək məcburiyyətində qaldım. Bakı ilə Krakov arasındakı məsafə üç min kilometrdir.
   - Bəziləri hesab edir ki, Azərbaycan Asiyaya yaxın olduğundan, UEFA yarışlarında iştirak etməməlidir.
   - Bakıya oyundan üç saat əvvəl gəldim və matç bitəndən dərhal sonra oranı tərk etdim. Polşalılar Bakına Stevan Jeromskinin "İlk bahar" romanından tanıyırlar. Biz unutmamalıyıq ki, vaxt vardı, Azərbaycan komandalarını rahatlıqla keçirdik. Amma indi onların futbolu inkişaf edib. Onların oyununda təcrübəli məşqçilərin işini görmək mümkündür.
   - Bakı sizi nə ilə təəccübləndirdi?
   - Orada xeyli təzə bina var, eyni zamanda sovet dönəmindən qalma tikililərə də rast gəlirik. Bakıda siz Şərq memarlığına da rast gələ bilərsiz.
   - Bakının havası sizdə necə təsir bağışladı? Bütün komandalar oradakı istidən şikayətlənirlər.
   - "Portadaun"la oyun axşam başlasa da, hava çox bürkü idi. Amma əgər buna hazırsansa, problemlə üzləşməyəcəksən.
   - Stadionda atmosfer necə idi?
   - Mərkəzi arenanın 30 min tutumu var. Amma oyuna 14 minədək azarkeş baxırdı. Mən Azərbaycan publikasını Argentinayla müqayisə edərdim. Hətta "Qarabağ" öz qapısından qol buraxandan sonra bütün stadion bu komandanı ruhdan düşməyə qoymadı.
   - Orada sizi necə qarşıladılar?
   - Azərbaycan klubunun nümayəndələrinə çox minnətdəram. Məni aeroportda qarşıladılar və stadiona gətirdilər.
   - "Qarabağ"ın təmsilçiləri "Visla"nın Krakovda "Şaulyay"la oyununu izləyiblər?
   - Bildiyimə görə, bizim prezident Basalay püşkatmadan sonra oyunların videoyazısının bir-birinə təqdim edilməsilə bağlı razılığa gəlmişdi. Biz litvalılarla oyunun DVD-sini, onlarla isə mənim də stadiondan izlədiyim "Portadaun"la matçın videoyazısını bizə təqdim etdilər.
   - Rəqibin oyunundan nə kimi qeydlər apardız?
   - Rəqib fiziki cəhətdən çoz hazırlıqlıdır və topu özündə saxlamağa bacarır. Bu, həmin bölgənin xarakterinə uyğundur. "Qarabağ"ın müdafiə xəttində zəif yerlər tapmaq olar.
   - "Visla"nı bu cütlüyün favoriti hesab etmək olar?
   - Əlbəttə, "Qarabağ" "Real" deyil. Biz daha təmkinli olmalı və oyuna köklənməliyik. Bizim "Levadiya"ya məğlubiyyət yadınıza gəlir? Bu oyuna hazır olmalıyıq. Elə düşünməliyik ki, rəqibimiz "Barselona", hakim isə Hovard Uebbdir.
   - Onların "İnter"dən hansı fərqli cəhətləri var?
   - Onların oxşar imkanları var. Amma "Qarabağ"ın heyətini demək olar ki, bütünlükdə azarbaycanlı futbolçular təşkil edir. Onlar öz ölkələrində çox populyardılar. Onların üzərində məsuliyyət də çoxdur. Çünki "Qarabağ" hazırda ölkənin avrokuboklardakı yeganə təmsilçisidir. Bu isə onlara əlavə motivasiya verir.