Avroliqanın II təsnifat mərhələsinin cavab qarşılaşması çərçivəsində "Buduçnost"a qarşı keçirilən oyundan sonra istirahətə buraxılan "Bakı"nın futbolçuları yenidən bir araya gəlib. XIX Premyer Liqanın ilk turu çərçivəsində öz meydanında AZAL ilə qarşılaşacaq Azərbaycan kubokunun sahibi dünəndən qarşıdakı matçın hazırlıqlarına start verib. Klubun bazasında baş tutan məşq prosesində Fabio Luis Ramim istisna olmaqla, bütün futbolçular iştirak ediblər. Qısa müddətə vətəninə dönən Ramim bu gün düşərgəyə qayıtmalıdır. Zədədən əziyyət çəkən Elvin Əilyev və Juninyo Osvaldo da artıq komanda ilə birgə çalışırlar. Yalnız Əziz Quliyevin yüngül zədəsi var. Bülənt Korkmazın gedişindən sonra əsas heyətdən uzaqlaşdırılan Adriano və son vaxtlar ölkəsində istirahət edən Venio Morales də kollektivə qoşulub. Adriano və Venio ilə anlaşmanın ötən ay bitdiyi deyilsə də, məlumat səhv çıxıb. Sən demə, hər ikisi klubla ilyarım müddətə müqavilə bağlayıb. Baş məşqçi Vinfred Şefer heç biri sərəncamında görmək istəməsə də, rəhbərliyin başqa əlacı yoxdur - onlarla ümumi dil tapmalıdır. Vitse-prezident Zeynal Məmmədovdan aldığımız məlumata görə, Adriano ilə artıq ortaq məxrəcə gəlib. Braziliyalı hücumçuya iyunun maaşı ödənildikdən sonra kontrakt qarşılıqlı formada ləğv olunacaq. Venio isə iki ayağını bir başmağa dirəyib ki, klubunu dəyişmək istəmir. Hətta Şeferin onu istəməməsi də vecinə deyil. Portuqaliyalı yarımmüdafiəçiyə yaxın günlərdə başqa komanda müştəri çıxmasa, işi qəlizləşəcək. "Neftçi" də Emin Cəfərquliyevə görə "Bakı"dan 50 min dollar kompensasiya istəyir. Zeynal bəyin dediyinə görə, "Neftçi"nin prezidenti Sadıq Sadıqovla bu barədə söhbəti olub: "Sadıq müəllim bildirdi ki, Eminin məsələsində problem yaranmayacaq. Problem bu gün-sabah həllini tapacaq. Hər halda Sadıq müəllim söz veribsə, elə də olar. Futbolçunun özü komandamızda qalmaq istəyir. Bizdən narazılığı da yoxdur". Juninyo Osvaldo ayyarımdır "Xəzər-Lənkəran"dan gəlsə də, hələ ki zədəsini sağaltmayıb. Deyəsən, özünə gəlməsi üçün ona minimum 6 ay lazımdır. Məmmədovun bildirdiyinə görə, onun məsələsi də Şeferdən asılıdır: "Gedib-qalacağını hələ biz də bilmirik. Baş məşqçi necə istəsə, məcburuq ki, elə də edək. Komandayla işləyən Şeferdir. Juninyonun zədəsinin tez sağalacağını gözləsək də, olmadı. Braziliyalını heç səfərə də apara bilmədik".
   

"Qəbələ" yeni transferlərini ictimaiyyətə təqdim edəcək. Toni Adamsın rəhbərlik etdiyi bölgə təmsilçisi mövsümün startından 3 gün öncə - avqustun 4-də təqdimat mərasimi keçirəcək. Mərasimin Qəbələdə baş tutacağı bildirilir. Hələ ki, yalnız bir əcnəbi - Yamayka yığmasının keçmiş üzvü Deon Bartonla müqavilə bağlayan şimallıların düşərgəsində İngiltərə, Braziliya, Qana və Avstriyadan oyunçular da var. Klub rəhbərliyi yaxın günlərdə onlarla da müqavilə imzalayacaq. Bilindiyi kimi, ingilis baş məşqçi baxışa çağırdığı yerliləriylə bağlı yekun qərarını verib. MOİK-lə 0:0 hesabı ilə başa çatan oyunda həmyerliləri - Uill Hendri və Ben Cilli sınayan Adams onları bəyənməyərək, geri qaytarılmaları barədə qərar verib. Əvəzində isə "Qəbələ" iki məşhur futbolçunu baxışa dəvət edib. Onlardan biri ingilis Terri Kukdur. Baxışa gələn digər bir futbolçu isə Qana yığmasının üzvüdür - Samad Opponqu. Tam adı Abdul Ueyn Samad Opponq olan futbolçu 21 iyul, 1988-ci ildə Kumasi şəhərində dünyaya gəlib. 22 yaşlı hücumçu Qananın "Korners Babies" klubunun yetirməsidi. 2006-cı ildə ilk peşəkar müqaviləsini "Kinq Faysal Babes"lə bağlayan futbolçu 2009-cu ildə "Asante Kotoko"ya transfer olunub. Opponq 2003/05-ci illərdə Qananın U-17 yığmasında 17 oyun keçirib, 8 qola imza atıb və 2005-ci ildə Peruda keçirilən 17 yaşlılar arasında dünya çempionatına qatılıb. 2006/09-cu illərdə U-20-yə dəvət alan futbolçu 12 oyunda 7 dəfə fərqlənib. Opponq 2009-cu ilin 1 oktyabrında Argentina ilə yoldaşlıq oyununda Qananın əsas yığmasında debüt edib. Braziliya A seriyası təmsilçisi "San Paulu"dan 3 futbolçu dəvət edən Adams onlarla bağlı yekun qərarını dünən açıqlayıb. Onlardan ikisi müqavilə bağlamaq üçün, digəri isə baxışa gəlmişdi. Artıq birbaşa müqavilə üçün gələn legionerlərlə münasibətlər rəsmiləşib. Hər iki futbolçu hücumameylli yarımmüdafiə mövqeyində çıxış edir. Bunlardan Bruno Auqusto Dos Anjos sol insayd mövqeyində oynayır, Julio Sezar de Mora Almeyda isə hücumda oynamaq bacarığı ilə seçilir. Bununla da "Qəbələ"nin yeni transferlərinin sayı yeddiyə çatıb. Buna qədər yerli oyunçulardan Arif İsayev, Ramin Quliyev, Nodar Məmmədov, Asif Qədirini heyətinə qatan bölgə təmsilçisi legionerlərdən yalnız Deon Bartonla münasibətlərini rəsmiləşdirmişdi. Baxışda olan və dayaq yarımmüdafiəçisi mövqeyində çıxış edən 22 yaşlı Bruno Barbosa da Silva və Beka Bayramovla bağlı qərar isə yaxın günlərdə veriləcək. Qəbələ təmsilçisi ilə 2 illik müqavilə imzalayan Nodar Məmmədov hazırlığın yüksək səviyyədə davam etdiyini bildirib. İsti hava şəraiti də onların hazırlıq planına təsir etməyib: 22 yaşlı müdafiəçi bu gündən etibarən məşqləri intensivləşdirəcəklərini və fiziki hazırlığa fikir verəcəklərini vurğulayıb. Komandanın yeni trenajorlarla təmin olunması ingilis məşqçinin işini bir qədər asanlaşdırıb: "Toni Adams taktiki hazırlığa xüsusi önəm verir. Tez-tez məşqləri yarımçıq saxlayıb, hər şeyi izah edir. Hər bir futbolçuya harada durmaq lazım olduğunu başa salır. Havaların isti keçməsi hazırlığımıza heç bir mənfi təsiri olmur. Gündə iki dəfə məşq edirik. Baş məşqçimiz Toni Adams futbolçuların istirahətinə diqqət yetirir. Bəzən gündə bir dəfə məşqlə kifayətlənirik. Mən də əməliyyatdan sonra özümü yaxşı hiss edirəm və məşqlərdə səylə çalışıram. Çox güman ki, məşqlərimiz daha da intensivləşəcək. Artıq yeni trenajorlar gətirilib. Bundan sonra trenajor zalında məşq edəcəyik. Adams haqda əlavə nəsə deməyə ehtiyac yoxdur. Yüksək səviyyəli məşq keçir. Heyətə uyğunlaşmaq baxımında da heç bir problemlə rastlaşmamışam".

Təlim-məşq toplanışını Gürcüstanda davam etdirən "Turan" artıq 2 yoxlama matçı keçirib. Tovuz təmsilçisi əvvəlcə Sxinvalinin "Spartak" komandası ilə üz-üzə gəlib. Əsasən gənclərdən təşkil edilən Premyer Liqa klubu məğlub olub - 1:2. "Turan"ın heyətində Xəyal Qarayev fərqlənib. Təmsilçimiz dünən Gürcüstanın sonuncu çempionu "Olimpi" ilə üz-üzə gəlib. Oyun qonşu ölkə təmsilçisinin qələbəsi ilə başa çatıb. Fasiləyə qədər qapılara qol vurulmayıb. İkinci hissədə 2 dəfə fərqlənən "Olimpi" meydanı qalib tərk edib. Qərblilər bir neçə legioneri baxışa çağırıb. Yuri Ksenzov "Olimpi" ilə oyunda Tovuz təmsilçisinin formasını geyinib. Ampluası sol cinah yarımmüdafiəçisi olan Ksenzovsun 29 yaşı var. Latviyalı futbolçu karyerası ərzində "Jurmala", "Dauqava", "Auda", "Ventspils" və "Ziben"in formasını geyinib. Boyu 174 sm olan yarımmüdafiəçi son mövsümü Belarus çempionatında keçirib. O, "Vitebsk" klubunun uğurları üçün tər töküb. Yoxlama oyununda özünü yaxşı tərəfdən göstərməyi bacaran yarımmüdafiəçinin "Turan"a keçəcəyi realdır. Onunla klub vətənə döndükdən sonra müqavilə imzalanacaq.

Vaqif Cavadovun formasını geyindiyi "Tvente" təlim-məşq toplanışında növbəti yoxlama oyununu keçirib. Hollandiya təmsilçisinin rəqibi "Xetafe" olub. İspanların 2:1 hesabı ilə qələbə qazandığı oyunda 21 yaşlı hücumçumuz meydana start heyətində çıxmayıb. O, görüşün başa çatmasına 7 dəqiqə qalmış komandasının yeganə qolunu vuran Ruisi əvəzləyib. Mişel Pryudomun komandası növbəti oyunlarını iyulun 31-də keçirəcəklər. Həmin gün baş tutacaq superkubok görüşündə "Tvente" "Ayaks"la üz-üzə gələcək.