Ötən sayımızda Beynəlxalq Sığorta Şirkəti ilə "Simurq"un rəsmən yollarını ayırdığını, şirkətin futbolla vidalaşmasında prezidenti Cəmil Soltanovun müstəsna xidməti olduğunu vurğulamışdıq. Məsələ ilə bağlı bəzi müəmmalar olduğunu nəzərə alaraq mövzuya bir daha toxunacağımızı qeyd etmişdik. Odur ki, Beynəlxalq Sığorta Şirkətinin "Simurq"a sponsorluqdan imtina etməsinin səbəblərini araşdırdıq və mövzuya qayıtmağı labüd bildik.
   Göstəriş belədi
   Qeyd edək ki, nə "Simurq" rəhbərliyi, nə də Beynəlxalq Sığorta Şirkəti ayrılığa dair rəsmi bəyanat yaymayıb. Ayrılıq siqnallarının rəsmi deyil, qeyri-rəsmi kanallar vasitəsi ilə duydurulmasının bir neçə səbəbi var. Başlıca səbəbi cəmiyyətdən verilə biləcək reaksiyadı. Belə ki, BSŞ-nin gedişindən sonra ictimaiyyətdə "Simurq"un bir klub kimi məhv olacağı barədə rəyin formalaşmasına imkan vermək olmaz. Bu rəsmi Bakının qəzəbini oyada bilər və nəticədə, Azərbaycan Beynəlxalq Bankının vəziyyəti daha da qəlizləşər. Ayrılıq siqnalının rəsmi ağızlardan səslənməməsinin əsas səbəblərindən biri də Beynəlxalq Bankın buna izin verməməsidi. Hazırda şirkətdə audit yoxlamaları aparıldığından, Cahangir Hacıyev bu yoxlamalarının ciddi olmadığını və yoxlamalar nəticəsində ciddi pozuntular tapılmadığını, dolayısıla rəhbərlik etdiyi holdinqdə heç bir problem və maliyyə sıxıntısı olmadığını sübut etmək üçün Beynəlxalq Bankın törəmə orqanı olan BSŞ-nin futboldan kənarlaşdığının rəsmən elan olunmamasını istəyib.
   BSŞ nə üçün ayrılıb?
   Azərbaycan sığorta bazarının böyük bir hissəsinə nəzarət edən, ölkənin ən böyük sığorta kompaniyası sayılan Beynəlxalq Sığorta Şirkətinin "Simurq"dan məhz maliyyə probleminə görə imtina etməsi ilə bağlı səslənən fikirlər tam mənada həqiqəti əks etdirməsə də, səbəblərdən birinin bu olması şübhəsizdi. Büdcəsi 9 milyona yaxın olan hansısa təşkilatın hər il təkbaşına minimum 4-5 milyon hansısa kluba xərcləməsi az inandırıcıdı. Belə olsaydı, BSŞ çoxdan tarixə qovuşardı. Deməli, bu məslədə BSŞ-yə dəstək olan əlavə qurumlar da olub. Çox güman ki, dəstəyin çəkilməsi Cəmil Soltanovu "Simurq"dan üz döndərməyə məcbur edib. Cəmil Soltanovun futbol ailəsindən ayrılmasının başqa bir səbəbi isə heç şübhəsiz ki, "Simurq"un heç vaxt əsas və güclü komanda olma şansının olmamasıdı. "Altılığ"ın qalması bu ehtimalı daha da gücləndirib ki, nəticədə BSŞ rəhbərliyi futbolda qalmağın anlamsız olduğunu dərk edib. Həmişə ikincidərəcəli kluba rəhbərlik etmək isə istənilən işadamı, rəsmi və nüfuzlu şəxs üçün arzuolunmazdı. Axı güclü şəxs hərtərəfli güclü insanlara deyilir!
   Mövsümün əvvəli...
   Əldə etdiyimiz son məlumata görə, Beynəlxalq Sığorta Şirkəti "Simurq"la yollarını ayırdığını hələ ki elan etməyəcək. Amma bu daimi olmayacaq. BSŞ uzağı mövsümün ilk yarısı Zaqatala təmsilçisini maliyyələşdirməkdən imtina etdiyini elan edəcək. Elə həmin vaxt "Simurq"un yeni baş sponsorunun adı açıqlanacaq. O vaxtadək isə bütün açıqlamalarda, bəyanatlarda Zaur Məmmədovun imzası olacaq.