"Qalatasaray" mövsümün sonunda həyata keçirmək istədiyi transferlərin bir neçəsinin adlarını açıqlayıb. Bunlardan biri də "Yuventus"un keçmiş futbolçusu İqor Tüdordur. Hazırda "Syena"nın şərəfini qoruyan xorvat futbolçu da "Qalatasaray"a gəlmək fikrində olduğunu bildirib. Tüdor Didye Deşamın "Yuve"yə baş məşqçi təyin olunmasından sonra komandanı tərk etmişdi. "Qalatasaray" isə müdafiəni möhkəmləndirmək üçün Tüdorun transferində israrlıdır. Bundan başqa rəhbərliklə "Cim-Bom"un müdafiəçiləri Sonq və Tomas arasında münasibətlər elə də yaxşı deyil. Mövsümün sonunda bu iki futbolçunun "Cim-Bom"da qalacağı sual altındadır. Buna görə də "Qalatasaray" işini ehtiyatlı tutmağa çalışaraq, Tüdorla ortaq məxrəcə gəlməyə çalışır.
   "Qalatasaray"ın transfer siyahısında olan futbolçulardan biri də Sərvət Çətindir. Bir vaxtlar "Fənərbağça"nın şərəfini qoruyan Sərvət hazırda "Sivasspor"da çıxış edir. "Qalatasaray"ın vitse-prezidenti Adnan Polad bildirib ki, Sərvətlə artıq razılıq əldə olunub və gələn mövsümdən başlayaraq, o, "sarı-qırmızı" formanı geyinəcək.