"Xəzər-Lənkəran"ın yarımmüdafiəçisi Rəşad Kərimov bir müddətdir zədələnib. Ayaq əzələsini dartan oyunçu iki həftəyə yaxındır məşqlərə qatılmır. Dünən "Bakı"yla keçirilən görüşü kənardan izləyən havbekin cərrahiyyə əməliyyatına ehtiyacı var. Komandanın həkimi Boris Xetaqurovun müayinəsindən sonra onun Türkiyəyə göndərilməsi qərara alınıb. Bu gün qonşu ölkəyə yollanacaq futbolçu Ankarada Mehmet Binnətin şəxsi klinikasında yerləşdiriləcək. Futbolçunun bütün xərcləri klubu tərəfindən ödəniləcək.