"Qarabağ"ın baş məşqçisi Rasim Kara bir neçə gündür Türkiyədədir. Yox, o, yerli futbolçularla danışıq aparmaq üçün vətəninə yollanmayıb. Sadəcə, çempionatda yaranmış fasilə ailəsinə baş çəkmək üçün Karanın köməyinə çatıb. Kubok yarışları və milli komandayla əlaqədar 40 gün matç keçirməyəcək "Qarabağ" bu müddətdə yalnız hazırlıq keçməklə kifayətlənəcək. Həftəsonu Bakıya dönəcək mütəxəssis bundan sonra gündəlik məşqlərə birbaşa nəzarət edəcək. Bu müddətdə komandanın ölkə xaricinə yollanmayacağı dəqiqləşib. Düzdür, Karanın futbolçularını yenidən Antalyaya aparmaq istədiyi deyilirdi, amma rəhbərlik təlim-məşq toplanışının Azərbaycanda təşkilini lazım bilib. "Qarabağ" hazırlıq dönəmində bir neçə yoxlama matçı keçirməyi planlaşdırıb.