Bir müddət öncə "Çelsi"dən Nikolya Anelkanı heyətinə qatan Çinin "Şanxay Şenxua" klubu "zadəganlar"ın daha bir üzvünü "qaralayıb". Asiya təmsilçisi indi də gözünü London klubundan ayrılacağı gündəmdə olan Didye Droqbaya dikib. Çinlilər kot d"ivuarlı hücumçuya illik 23 milyon avro təklif ediblər. Əgər Droqba razılıq versə, onun yeni klubundakı həftəlik gəliri 480 min avro olacaq. Ancaq forvard "Şanxay Şenxua" rəsmilərinin bu təklifinə hələlik cavab verməyib.
   Qeyd edək ki, Droqba ilə "Aston Villa" da yaxından maraqlanır.

"Milan"ın braziliyalı futbolçusu Robinyo verdiyi açıqlama ilə gündəmə gəlib. Təcrübəli yarımmüdafiəçi PSJ-yə keçidi gündəmdə olan Pato haqda danışıb. O, həmyerlisinin "Milan"da qalacağı təqdirdə uğur qazanacağını bildirib: "Patoya məsləhət görərdim ki, "Milan"dan ayrılmasın. Xüsusən də hazırkı dövrdə getməsi düzgün deyil. Əgər Pato "Milan"da qalsa, nə vaxtsa "qızıl top" mükafatı ala bilər".
   

Qışda komandadan ayrılmaq istədiyini bildirən "Bavariya"nin üzvü İvitsa Oliç italyan klublarının hədəfindədir. Xorvatiyalı forvard birdən-birə paytaxtın iki klubu - "Roma" və "Latsio"nun maraq dairəsinə düşüb. Əzəli rəqiblər hücumçu üçün artıq Münhen klubuna rəsmi təklif də göndərib. "Roma" və "Latsio" MOİK-in sabiq futbolçusuna illik 2 milyon avro ödəməyə hazırdır.
   

İspaniya mətbuatı "Barselona"lı futbolçuların maraqlı şəklini yayıb. İspan həmkarlarımız son 3,5 ildə oynadığı oyun və qazandığı nəticələrlə hər kəsin rəğbətini qazanan Kataloniya klubunun üzvlərinin ağlayarkən çəkilmiş fotosunu üzə çıxarıb. Nadir hallarda meydanı başıaşağı tərk edən "Barsa" üçün ötən mövsüm İspaniya Kral Kubokunun finalında əzəli rəqibi "Real"a məğlubiyyət çox ağır olub. Təsadüfü deyil ki, komandanın üzvləri paltardəyişmə otağında göz yaşlarını saxlaya bilməyiblər.
   

"Sanderlend"in üzvü Stefan Sesenyon "Liverpul"un maraq dairəsinə düşüb. Cari mövsüm Premyer Liqada 4 qol və 5 assistlə oynayan afrikalı yarımmüdafiəçi üçün "Liverpul" 7 milyon funt ödəməyə hazırdır. Ancaq Sessenyon "Liverpul"un təklifindən imtina edəcəyi gözlənilir. Çünki o, Fransaya dönməyi istəyir.
   

Vaxtilə "Barselona", "Parma" və Bolqarıstan millisində çıxış etmiş Xristo Stoiçkov bundan sonra ölkəsində baş məşçqçi kimi fəaliyyət göstərəcək. 45 yaşlı canlı əfsanə "Liteks"in çalışdırıcısı təyin olunub. Artıq klubun sahibi Qrişa Qançev Stoiçkovu ictimaiyyətə təqdim edib.
   "Liteks" rəhbərliyi Atanas Cambazkinin işindən narazı olduğundan, baş məşqçi postuna Stoiçkovu gətirib. Xatırladaq ki, "Liteks" hazırda turnir cədvəlinin 7-ci pilləsində qərarlaşıb.
   

Beynəlxalq Futbol Tarixi və Statistikaları Federasiyası (IFFHS) 2011-ci ilin ən yaxşı qapıçılarının siyahısını dərc edib. Siyahıya İspaniya yığmasının və "Real"ın qolkiperi İker Kasilyas inamla başçılıq edir. Sonrakı iki pilləni müvafiq olaraq Manuel Noyer ("Bavariya", Almaniya) və Viktor Valdes ("Barselona", İspaniya) tutur.
   

İngiltərənin "Çelsi" klubu yeni hücumçu axtarışına başlayıb. London təmsilçisi istədiyi futbolçunu İtaliyada tapıb. Nikolya Anelkanın Çinə getməsi və Didye Droqbanın formasından uzaq olması "Çelsi" rəhbərliyini ciddi addımlar atmağa vadar edib. "Zadəganlar" "Napoli"nin hücumçusu Edinson Kavaniyə "elçi" düşüb. "Çelsi" 24 yaşlı futbolçu üçün 35 milyon funt-sterlinq ödəməyə hazır olduğunu bildirib. Qeyd edək ki, "Napoli" rəhbəriyinin Kavani üçün daha yüksək məbləğ istədiyi bildirilir.
   

Cari mövsüm "Nyukasl"ın heyətində xarüqələr yaradan fransalı hücumçu Demba Ba uğurlu çıxışının sirrini açıqlayıb. 26 yaşlı futbolçu inamlı çıxışını çiyələk şirəsi içməsi ilə əlaqələndirib":10 yaşımdan çiyələk şirəsi içirəm. Həkim deyiləm. Amma tam əminliklə deyə bilərəm ki, bu şirə mənə çox yaxşı təsir edir". Oyunçu bu mövsüm Premyer liqada keçirdiyi 19 oyunda rəqib toru 15 dəfə silkələməyə nail olub. Demba Ba bombardirlik yarışında "Arsenal"lı Van Persi ilə mübarizə aparır.
   

"Liverpul"un uruqvaylı hücumçusu Luis Suares üzr istəyib. Buna futbolçunun "Mançester Yunayted"ə qarşı keçirdiyi oyunda Patrik Evraya irqçi ifadələr işlədərək 8 oyunluq cəzalanması səbəb olub. 24 yaşlı futbolçu heç kimi alçaltmaq istəmədiyini bildirib: "Heç kimi alçaltmaq istəmirəm. Belə fikrim yoxdur. Əgər kimisə təhqir etmişəmsə, buna görə üzr istəyirəm. Düzdür irqçi ifadələr işlətmişəm. Bundan sonra bu cür səhvə yol verməyəcəm"
   

"Şaxtyor"un baş məşqçisi Mirça Luçesku üçün 2012-ci il bədbəxt hadisə ilə başlayıb. Təcrübəli mütəxəssis Buxarest küçələrinin birində şəxsi avtomobili ilə hərəkət edərkən tramvayla toqquşub. Bundan sonra isə qarşı tərəfdən avtomobil Luçeskunun maşına çırpılıb. Nəticədə ciddi xəsarətlər alan rumıniyalı mütəxəssis ağır vəziyyətdə xəstəxanaya çatdırılıb. Həkimlərin sözlərinə görə, Luçeskunun döş qəfəsinin qabırğaları sıradan çıxıb. Rumın çalışdırıcının vəziyyəti hələ də ağır olaraq qalır.
   

Rusiyanın "Anji" klubu qış transfer pəncərəsində növbəti hədəfini açıqlayıb. Mahaçqala təmsilçisi "Beştiktaş"ın portuqaliyalı ulduzu Rikardo Quarejmaya "elçi" düşüb. "Anji" klubunun yaxın günlərdə İstanbula gedərək Quarejma ilə danışıqlara başlayacağı iddia olunur. Süleyman Kərimovun komandasının portuqaliyalı ulduz üçün 8 milyon avro ödəməyə hazır olduğu bildirilir. Lakin daha öncə Quarejma üçün gələn təklifləri birmənalı şəkildə rədd edən "qara qartal"ın "Anji"nin bu təklifini necə qarşılayacağı böyük maraq doğurur. Quarejma zədə səbəbindən uzun müddətdir "Beşiktaş"da çıxış edə bilmir.
   

Türkiyənin "Beşiktaş" klubu uzun sürən danışıqlardan sonra stadionun sökülməsi haqda razılıq alıb. İstanbul təmsilçisinin stadionu "İsmət İnönü" arenası mövsümün sonunda söküləcək. Bununla bağlı açıqlama verən "Beşiktaş" rəsmisi Orxan Saka söküləcək stadionun yerində UEFA standartlarına uyğun bir arena tikiləcəyini bildirib: "Uzun sürən danışıqlardan sonra stadionun sökülməsi ilə bağlı lazımi icazəni aldıq. Artıq mövsümün sonunda arenanın sökülməsinə başlanacaq. Layihə hələ tam hazır olmadığından yeni tikiləcək stadionun tamaşaçı tutumu haqda dəqiq bir şey deyə bilməyəcəyəm. Ancaq yeni arenanın UEFA standartlarına uyğun tikiləcəyini nəzərə alsaq, stadionun ən azı 40 min tamaşaçı tutumuna malik olacağını söyləyə bilərəm".
   

Braziliyanın "Santos" klubunun istedadlı futbolçusu Neymarı komandada saxlamaq üçün oyunçu ilə astronomik məbləğə anlaşması haqda xəbər vermişdik. Neymarı Avropa nəhənglərinə vermək istəməyən "Santos" rəhbəlriyi futbolçuya ilinə 15 milyon avro təklif etməklə onunla 2014-cü ilə qədər müqavilə imzalayıb. Ancaq bu yükün altından çıxamaq elə də asan görünmür. Yüksək məğləğ qarşılığında Neymarı komanda saxlamağa müvəffəq olan sambaçılar qadın və mini futbol komandalarını bağlamaq qərarına gəliblər. Bu xəbəri təsdiqləyən klub prezidenti Neymara nə qədər önəm verdiklərini bildirib. Neymarla "Real" (Madrid), "Barselona" və "Mançester Siti" klubları yaxından maraqlanırdı.
   

"Real" (Madrid) klubunun baş məşqçisi Joze Mourinyo və komandanın hücumçusu Kriştiano Ronaldo "Qızıl top" mükafatının təqdimetmə mərasimində iştirak etməyəcəklər. Portuqaliyalılar yanvarın 9-da keçiriləcək tədbirdə iştirak etməkdən boyun qaçırıblar. Buna səbəb kimi isə onların yanvarın 11-də İspaniya kubokunun 1/8 final mərhələsinin cavab qarşılaşmasında səfərdə "Malaqa" ilə keçiriləcək oyuna yaxşı hazırlaşmaları göstərilir. Madriddə keçirilən ilk oyunda 3:2 hesabı ilə qələbə qazanan "Real" səfər matçına da çox ciddi hazırlaşır. Gələn həftə isə dünyanın ən yaxşı futbolçusu və məşqçisinin adı açıqlanacaq. Həm Ronaldo, həm də Mourinyo bu mükafata iddialıdırlar.
   

PSJ-nin uruqvaylı müdafiəçisi Dieqo Luqano komandasını dəyişə bilər. "Roma" 31 yaşlı futbolçunu icarəyə götürmək istəyir. Paris klubunun baş məşqçisi Karlo Ançelotti oyunçunu komandada saxlayacağına dair heç bir açıqlama vermədiyindən sabiq "Fənərbaxça"lının italyan klubuna keçəcəyi gözlənilir. "Roma" Luqanonu zədələnən Burdissonun yerində oynatmağı düşünür.