Zlatan İbrahimoviçin 2011-ci ilin ən yaxşı məşqçisi ilə bağlı seçimi geniş müzakirələrə səbəb olub. İsveç yığmasının kapitanının münasibətlərinin pis olduğu Qvardiolaya səs verməsi təəccüblə qarşılanıb. Buna səbəb hücumçunun tez-tez tənqid etdiyi, hətta ələ saldığı mütəxəssisi ən yaxşı göstərməsi olub. Onun bu addımı dünya futbol ictimaiyyətində təəccüblə qarşılanıb. İsveçli futbolçu ikinci yerdə "Real"ın baş məşqçisi Joze Mourinyonu, üçüncü sırada isə "Çelsi"yə başçılıq edən Andre Villaş Boaşı göstərib.
   

"Mançester Siti" aparıcı futbolçularından biri David Silvanın müqaviləsini uzatmağı qərara alıb. İspaniyalı futbolçu daha iki il "şəhərlilər"in şərəfini qoruyacaq. Həftəlik 150 min funt qazanan 26 yaşlı oyunçunun yeni müqaviləyə görə 200 min avro qazanacağı bildirilir. Sərgilədiyi oyunu ilə hər kəsin diqqətini cəkən Silva cari mövsüm Premyer Liqada 10 qol ötürməsi ilə komandasının liderliyini davam etdirməsində böyük pay sahibi olub.
   

Madrid "Real"ının aparıcı üzvü Anxel Di Mariya karyerasını İngiltərədə davam etdirə bilər. Argentinalı futbolçu "Çelsi"nin maraq dairəsinə düşüb. London təmsilçisi 23 yaşlı futbolçu üçün 42 milyon avro ödəməyə hazırdır. Lakin "Real" klubu hələlik bu təklifə münasibət bildirməyib. Di Mariya cari mövsüm keçirdiyi 14 oyunda 13 məhsuldar ötürmə edib.
   

"Mançester Yunayted"in müdafiəçisi Rio Ferdinanda məxsus "Rosso" restoranında polislər axtarış aparıblar. "Daily Mail"in yaydığı məlumata görə, axtarış nəticəsində Mançester şəhərinin mərkəzindəki iaşə obyektində baş aşpazın şkafından 29 çanta çətənə aşkarlanıb. Belədə 55 yaşlı aşpaz həbs olunub. Ona qarşı narkotikləri yayma məqsədilə saxlama ittihamı irəli sürülüb. Ferdinandın özü restoranında narkotik maddələrin saxlanıldığını zənn etməyib.
   

İngiltərə Federasiya Kubokunda "Liverpul" - "Oldham" qarşılaşmasında irqçilik qalmaqalı yaşanıb. Matçın başa çatmasına 10 dəqiqə qalmış meydan sahiblərinin azarkeşləri ilə qonaq komandanın üzvü Tom Adeyemi arasında mübahisə düşüb. İrqçi şüarlara məruz qalan futbolçunu Stiven Cerrard və Dirk Kuyt çətinliklə sakitləşdirə bilib. İrqçi şüarlar səsləndirən tərəfdarların əynində Luis Suaresin adı yazılmış formalar olub. Məsələ ilə bağlı "Liverpul" klubunun rəsmiləri araşdırma aparır və bunun nəticəsi tezliklə ictimaiyyətə açıqlanacaq. Xatırladaq ki, bir müddət öncə "Mançester Yunayted"in müdafiəçisi Patris Evraya "zənci" deyən Suares İngiltərə Futbol Federasiyası tərəfindən 8 oyunluq cəzalandırılıb.
   

İtaliya "A" Seriyasında növbəti baş məşqçi dəyişikliyi baş verib. "Parma" rəhbərliyi Franko Kolomba ilə yollarını ayırıb. Buna çempionatın son turunda komandanın "İnter"ə 0:5 hesablı yenilgisi səbəb olub. 56 yaşlı mütəxəssisin başçılıq etdiyi komanda qələbəyə həsrət idi. Son altı oyunda "Parma" aktivinə cəmi 4 xal yaza bilib. Məhz bu səbəbdən klub rəhbərliyi Frankonu işindən azad edərək, komandanın sükanını Roberto Donadoniyə tapşırıb. İtaliya yığmasının sabiq baş məşqçisi komandanı hazırkı vəziyyətdən çıxarmağa çalışmalıdır. Mütəxəssis komandanı turnir cədvəlinin 15-ci pilləsində qəbul edib. Donadoninin son iş yeri "Kalyari" olub. 48 yaşlı mütəxəssis vaxtilə "Genoa", "Livorno" və "Napoli"ni də çalışdırıb.