"Barselona"nın baş məşqçisi Pep Quardiola İspaniya kubokun 1/4 finalında "Real" keçirəcəkləri oyun haqda danışıb. Gənc mütəxəssis bu derbinin çox həyəcanlı keçəcəyini bildirib: "Real"la yenidən qarşılaşmağımız azarkeşlər üçün böyük bayramdır. Çox həyəcanlı bir oyun olacaq. "Real" güclü komandadır və ən böyük rəqibimizdir. Bununla belə, harada oynamağımızdan asılı olmayaraq, meydana yalnız qələbə üçün çıxacağıq. Kubok oyunları dünyanın sonu deyil. Burada qalib gəlmək də olar, məğlub olmaq da. Ancaq La Liqa bizim üçün daha fərqli yarışdır".

"Milan"ın yarımmüdafiəçisi Kevin Prins Boatenq bazar günü qarşılaşacaqları "İnter"lə derbi oyunu haqda danışıb. 24 yaşlı futbolçu derbidə qələbə qazanmaqla "İnter"i çempionluq yarışından uzaqlaşdırmaq istədiklərini bildirib: "Milanda derbini izləməyi çox sevirəm. Hər kəs bu oyun üçün həyəcanlanır. Ancaq biz "İnter"dən daha güclüyük. Onları məğlub etməklə, "İnter"i çempionluq yarışından uzaqlaşdırmaq niyyətindəyik. Azarkeşlərin bizə "dəli "Milan" deməsi də xoşuma gəlir. "Dəli" ləqəbli futbolçulardan biri də mənəm. Digərləri isə Mark van Bommel, Antonio Kassano və təbii ki, Zlatan İbrahimoviçdir".
   

"Çelsi"nin sabiq baş məşqçisi Avraam Qrant özünə yeni iş yeri tapıb. İsrailli mütəxəssis Serbiyanın "Partizan" klubu ilə bir illik müqavilə imzalayıb. Qrant "Partizan"da çalışacağı bir il müddətində 1,1 milyon avro qazanacaq. Lakin Qrant "Partizan"ı Çempionlar Liqasına daşıyacağı təqdirdə daha 500 min avro mükafat alacaq. Qeyd edək ki, son olaraq "Vest Hem"i çalışdıran 56 yaşlı mütəxəssis komandasının aşağı diviziona yuvarlanması ilə klubdan qovulmuşdu.
   

Amerikanın "Los Angeles Qalaksi" klubunun futbolçusu Devid Bekhem yenidən "Mançester Yunayted"ə qayıdacağı haqda yayılan xəbərlərə münasibət bildirib. Məlumatları təkzib edən 36 yaşlı futbolçu bir daha "Mançester Yunayted"də çıxış etməyəcəyini açıqlayıb: "Tyeri Anrinin "Arsenal"a qayıdışından sonra mənim də "Mançester Yunayted"ə dönəcəyimlə bağlı xəbərlər yayıldı. Ancaq bu belə deyil. Bir daha "Mançester Yunayted"ə qayıtmayacağam. Sadəcə olaraq, ziyarət üçün Mançesterə gəlmişəm. Amerika liqasında fasilə başa çatan kimi, yenidən komandama qayıdacağam". Qeyd edək ki, 1993-2003-cü illərdə "Mançester Yunayted"in şərəfini qoruyan Bekhem keçirdiyi 265 oyunda 62 dəfə rəqib qapıçılarını məyus etmişdi.
   

Çempionlar Liqasının qrup mərhələsində keçirilən "Viktoriya" (Plzen) - BATE matçından sonra dopinq qalmaqalının yaşanması haqda xəbər vermişdik. Belə ki, "Viktoriya" klubunun müdafiəçisi David Bıstronun qanında qadağan olunmuş preparat aşkarlanmışdı. Məsələ ilə bağlı araşdırmaya başlayan UEFA İntizam Komitəsinin 29 yaşlı futbolçuya ağır cəza verəcəyi gözlənilir. Çexiya millisinin üzvü 4 il müddətinə futboldan kənarlaşdırla bilər. Bu isə "Viktoriya" klubu ilə yanaşı, Çexiya millisi üçün də ciddi itki olacaq. Bıstron 4 illik cəzalandırılacağı təqdirdə, futbolçu bu ilin yayında Ukrayna və Polşada keçiriləcək Avropa çempionatında da Çexiya millisinə kömək edə bilməyəcək. Qeyd edək ki, BATE ilə görüşdə rəqibini 1:0 hesabı ilə məğlub edən Çexiya təmsilçisi H qrupunu 3-cü pillədə bitirərək, Avroliqaya vəsiqə qazanmışdı.
   

Klubun dərgisində yazısı yayınlanan "Trabzonspor"un baş məşqçisi Şenol Günəş maraqlı açıqlama verib. O, türk futbolunun hazırkı durumundan danışıb. Açıqlamasında son vaxtlarda türk futbolunun durğunluq yaşadığı, hazırda isə inkişaf əvəzinə geriləmənin olduğunu bildirən çalışdırıcı yaxşı oyun belə sərgilənmədiyini deyir: "Son vaxtlar ölkə futboluna qayğı artsa da, bunun nəticəsi olduqca zəifdir. Daha yaxşı oyunçuları üzə çıxara bilmədiyimiz azmış kimi, indi bir o qədər də yaxşı oyunun şahidi olmuruq. Bunun üçün heç nə bəhanə olmamalıdır. Hamı üzərinə düşəni artıqlaması ilə yerinə yetirməlidir ki, futbolumuz yenidən əvvəlki sürətilə inkişaf etsin".
   

Braziliya mətbuatı maraqlı məlumat yayıb. Ölkə mətbuatının verdiyi məlumatda "Korintians"ın "Fənərbağça"nın braziliyalı ulduz futbolçusu Kristian Baroniyə olan iddiasından əl çəkmədiyini bildirib. Futbolçu ilə bir müddətdir maraqlanan "sambaçılar" hələ də ümidlərini itirməyiblər. Braziliyanın tanınmış "Globo" nəşrinin yaydığı məlumatda bu barədə xəbər verilib. Məlumata görə, bundan əvvəl də braziliya təmsilçisi "Fənərbağça" ilə təmasa keçsə də, qarşı tərəf futbolçu üçün tələb olunan məbləği həddən çox - 7 milyon avro demişdi. Lakin aradan vaxt keçməsinə baxmayaraq, futbolçunun qiyməti sabit qalıb, çıxışları kimi. Transferlərdə fəallıq edən "Korinyians"ın isə futbolçunun transferini reallaşdıracaq vəziyyətdə olmaması işin yubanmasına səbəb olub. Bundan başqa, "Korintians" rəsmiləri futbolçunun keçidi ilə bağlı məsələyə ciddi yanaşırlar, hətta onlar futbolçu dəyişikliyi+pul variantını da irəli sürəcəklərini gizlətməyiblər. Bunun üçün kluba maliyə dəstəyi verən bir sıra iş adamının da dövrəyə girə biləcəyi istisna edilmir.
   

"Beşiktaş"lı azarkeşlərin Türkiyəyə geri qayıtmasını böyük səbirsizliklə gözlədiklər Rikardo Quarejma ilə bağlı şok məlumat verilib. Doğma ölkəsi Portuqaliyada bir qrup silahlı şəxslərin hücumuna məruz qalan futbolçu kimliyi naməlum qalan şəxslər tərəfindən soyulub. Bu barədə Portuqaliyanın "Correo de la Manana" qəzetinin verdiyi xəbərdə paytaxt Lissabonun Çelas adlı yerində bir tanışını ziyarət edərkən soyulduğu bildirilir. Məlimatda gecəyarısı dostunun evinin önündə olarkən maskalı 3 nəfərin ona hücum etdiyi bildirilir. Həmin şəxlər əllərindəki silahı Quarejmanın başına tutaraq ondan üzərində olan bütün dəyərli əşyaları və pullarını istəyib. Üzük, saat və üzərindəki 8 min avronu alan bu şəxslər futbolçuya 44 min avro ziyan vurublar. Hadisədən dərhal sonra Çelas polisinə məlumat verən futbolçu həmin hadisə ilə bağlı şikayət verib.
   

"Orduspor"un tanınmış çalışdırıcısı Hektor Kuper maraqlı açıqlama verib. Təcrübəli çalışdırıcı türk klublarından daha əvvəl "Qalatasaray"dan təklif aldığını bəyan edib. Argentinalı məşqçi bunun iki il əvvəl oduğunu bəyan edib: "İki il əvvəl "Qalatasaray"dan təklif aldım. Lakin həmin vaxtlarda hadisələr fərqli cərəyan etdiyi üçün transfer reallaşmamışdı. Sonradan isə yenidən yolum Türkiyəyə düşdü. Bu dəfə "Orduspor"da iş başındayam. Bu ölkədə futbol çox sürətlə inkişaf edir. Yerli futbolçular içərisində yeni yetişən nəsildə olduqca istedadlı gənclər var. Bir şeyi deyə bilərəm ki, türk futbolunun gələcəyi parlaqdır".